Неколку таблоа на коишто можеа да се забележат повеќе професори од апсолвентина дел од факултетите  во Северна Македонија неодамна предизвикаа голем интерес во јавноста. Фотографиите од таблоата на Факултетот за ветеринарна медицина во Скопје и на Факултетот за земјоделски науки и храна, кои се споделуваа на социјалните мрежи, укажуваат на еден загрижувачки тренд. Дури 36 професори можат да се избројат на едно од таблоата, наспроти тројца апсолвенти кои успеале да го привршат своето школување на високобразовната установа. 

Ваквиот тренд го потврдуваат и последните податоци објавени од Државниот завод за статистика. Иако годинава се запишале на факултетите вкупно 53.821 студент, што претставува зголемување за 4.2 % во однос на лани, на одредени високообразовни институции има само по еден или двајца студенти. Ваквиот тренд особено се забележува на приватните факултети во земјата. 

Само еден правник 

На Европскиот универзитет во Скопје каде се запишале вкупно 580 студенти, на Факултетот за правни науки наставата ќе ја посетува само еден бруцош.

Слична е ситуацијата и на МИТ - Скопје каде на Факултетот за дентална медицина се запишале само двајца студенти. Десетици професори ќе бидат ангажирани и за едукација на двајца студенти кои покажале интерес да се школуваат на Факултетот за книжевност на Меѓународниот балкански универзитет - Скопје. 

Ваквиот тренд трае веќе подолго време. Статистичките податоци покажуваат дека за десет години бројот на ученици се намалил и тоа во сите степени на образование - основно, средно, високо, но во меѓувреме бројот на наставници и професори расте. Државниот завод за статистика во 2020 година во публикација „Северна Македонија во бројки“, објави дека за десет години има 30 илјади основци помалку, 22 илјади помалку средношколци и речиси 10 илјади помалку студенти. Наспроти тоа, статистичките податоци укажуваат дека во основните училишта е зголемен бројот на наставници за 2.331, 877 наставници плус има во средните училишта, додека бројот на професори на факултетите се зголемил со 919 нови кадри. 

Најголем интерес за државните универзитети 

Податоците на Државниот завод за статистика покажуваат дека најголем дел од студентите – 77,7 отсто се запишале на државните високообразовни установи, додека 22,3 отсто се  одлучиле да се школуваат на приватен факултет.

Прв на листата е „Св.Кирил и Методиј“ каде се запишале 21.448. Најголем интерес имало за на Факултетот за информатички науки и компјутерски инженерство (ФИНКИ), каде се евидентирани 4.468 нови студенти.

Најатрактивни за младите и понатаму се медицинските факултети. Најголем број студенти по медицина има на Тетовскиот универзитет - 3.309, по што следуваат Факултетот за медицински науки при Универзитетот „Гоце Делчев“ во Штип со 3.149 студенти и Медицинскиот факултет при Универзитетот „Свети Кирил и Методиј“ во Скопје, каде има 2.898 бруцоши. Интерес за Фармацевтскиот факултет при УКИМ покажале 816 студенти, додека стоматологија ќе студираат на 460 бруцоши. 

Покрај на државниот универзитет во Скопје, голем интерес за запишување студенти има и на Тетовскиот универзитет, каде минатата академска година се запишале вкупно 7.918 студенти. Меѓу приватните високообразовни установи пак, најпопуларен е Меѓународниот балкански универзитет во Скопје, каде се запишале 3.954 студенти, по што следува Универзитетот на Југоисточна Европа во Тетово со 2.088 студенти.