Ерлинд од Косово го прашува Лазар од Нови Сад за состојбата со медиумите во Србија. Заедно со уште 23 млади од земјите од Западен Балкан и Бугарија, тие учествуваат во проектот „Западен Балкан оди на училиште“.

Јута Зиберц-Поца, раководителка на германско-албанскиот оддел во гимназијата „Сами Фрашери“, во Тирана, вели:

„Дел од Берлинскиот процес не се само големите, министрите за надворешни работи на државите од Западен Балкан, туку мислевме дека тука припаѓаат и младите. Значи, иднината на една држава. И тие мора да соработуваат и да бидат дел од ова меѓусебно разбирање. Никогаш не работи само од врвот кон дното. Мора да функционира и од дното нагоре.“

Младите ги ставаат под лупа медиумските пејзажи во ЈИЕ, учат за лажни вести, дезинформации, 
манипулации со медиумски содржини и вештачка интелигенција, со што станува сѐ поедноставно создавањето на дипфејкови.

Ваквите проекти им овозможуваат на младите не само да ги анализираат медиумите и да препознаваат лажни вести, туку преку нив младите и се зближуваат.