Разгневени демонстранти синоќа накратко навлегоа во шведската амбасада во Багдад и запалија одделни простории. Очевидци сведочат дека многумина од демонстрантите успеале да ги прескокнат заштитните огради, извикувајќи пароли како „Да, да за Коранот“, а снимки на социјалните мрежи прикажуваат оган и облаци чад над зградата.

Протестот беше инициран од приврзаниците на влијателниот ирачки шиитски водач, Моктада ал-Садр, како реакција на планираното палење на примерок на Коранот пред ирачката амбасада во Стокхолм, за што шведската полиција веќе издаде дозвола. Според шведската новинска агенција ТТ, одобрена е акција во која едно лице ќе запали примерок на Коранот и ирачко знаме. 

Шведското Министерство за надворешни работи соопшти дека е во постојан контакт со своите соработници во Багдад и тие се наоѓаат на безбедно место. „Ги осудуваме нападите врз дипломати и соработници на меѓународни организации“, се вели во соопштението, во кое се истакнува дека заштитата на дипломатските претставништва е задача на ирачките безбедносни власти. За време на синоќешните немири, на видеата не се гледа голем отпор на припадниците на ирачката безбедност.

Ирачкото Министерство за надворешни работи го осуди нападот, а владата им издала налог на службите за безбедност „да ги преземат сите нужни мерки за расветлување на инцидентот и идентификување на извршителите“, како што изјави еден портпарол.

На крајот на јуни при масовна демонстрација пред Големата џамија во Стокхолм исто така беше запален примерот на Коранот, штово исламскиот свет предизвика жестоки протестии незадоволства. Во знак на протест, Мароко го повлече својот амбасадор од Шведска. За случајот се јави и папата Франциско, искажувајќи го својот револт и лутина.

Уништување или оштетување на примероци на Коранот во исламот важи за богохулство и во многу исламски земји тоа за последица има строги казни.