Двајца поранешни генерални секретари во Владата денеска се најдоа во иста судница на рочиштето за незаконска набавка на софтвер за биометриска идентификација.Драги Рашковски како обвинет, а неговиот наследник во Владата, Мухамед Зеќири како сведок во случајот зборуваше за ингеренциите на Владата. 

Зеќири, против кого се води истрага за друг случај и е во куќен притвор, сведочеше против Рашковски, укажувајќи дека не бил запознаен со софтверот за определување на просечна брзина и одредување на казни.

Тој одговарајќи на прашањето на обвинителката Ивана Трајчева, рече дека „не постои одлука на Владата за набавка на софтверот“. Зеќири потенцираше дека Владата не може да изрекува казни и определува просечна брзина. Кога се набавува софтвер за друга институција, според него, тогаш треба тоа да биде побарано, па потоа да се донесе одлука на Влада и да се направи примопредавање. 

Обвинителката се интересираше дали бил запознат со металните кабини кои биле набавени од Рашковски за систем за биометриска идентификација во Владата. Зеќири рече дека за тоа разбрал кога добил барање од обвинителството.

„Ако не грешам имаше комисија, беше утврдено каде се наоѓаат и беа прикажани слики. Тие биле во просториите на стаклара и прашав зошто не се во Влада, а ми кажаа дека се големи и нема каде во Владата да се складираат и затоа се сместени таму“.

Претходно сведочеше и поранешниот директор на дирекцијата за заштита на лични податоци, Горан Трајковски, кој рече дека го предупредиле Рашковски за употребата на софтвер за обработка на биометриски податоци. Набавката на софтверот за биометриска идентификација е еден дел од обвинението против поранешниот генерален секретар на Владата, кое опфаќа и набавка на софтвер за сообраќајни прекршоци. Рашковски се гони за злоупотреба на службена положба и овластувања и перење пари.