Според украинскиот претседател Володимир Зеленски, САД, со оглед на војната против Иран, побарале поддршка во заштитата од непријателските дронови Шахед. „Добивме барање од САД за специфична поддршка во заштитата од Шахед во регионот на Блискиот Исток“, потврди Зеленски на платформата X.

Тој наведе дека наредил да се обезбедат потребни средства и присуство на украински експерти. „Украина им помага на партнерите кои придонесуваат за обезбедување на нашата безбедност и заштита на животите на нашето население.“

Пресретнувачки дронови во замена за ракети Патриот?

Зеленски ја отвори можноста за размена на украински пресретнувачки дронови за ракети од американскиот противвоздушен систем Патриот. Според него, повеќе од 800 ракети Патриот наводно биле испукани за три дена за време на војната во Иран. Украина немала толку на располагање за време на повеќе од четири години од руската инвазија. Тој рече дека ќе се разговара за дополнителни количества на пресретнувачки дронови, кои ќе бидат произведени, а потоа разменети за ракетите Патриот. 

Скапата муниција за американските системи Патриот е во недостиг на глобално ниво. Украина стравува дека, поради високите трошоци во војната со Иран, би можела да биде потисната на листата на земји кои чекаат испорака на ракети. Системите Патриот, меѓутоа, се најсигурното средство за одбрана од руски балистички ракети.

Зеленски неодамна, поради бројните напади од ирански дронови, им понуди на лидерите на земјите од Персискиот Залив помош од украински експерти во одбрана од овие беспилотни летала.

Релативно евтините дронови од типот Шахед првично ги разви Иран, но сега модели произведува и Русија. Дури и американската војска неодамна призна дека ги користела дроновите како инспирација за развој на свои, понапредни модели.