Земјотрес во Турција: Последните преживеани
18 февруари 2023![Сцени од спасувањето на три лица во Антакија по 296 часови минати под урнатините](https://static.dw.com/image/64749563_800.webp)
Дури 296 часа, односно 12 дена, откако разорниот земјотрес го погоди јужниот дел на Турција, под урнатините на зграда во Анатакија беа спасени три лица, меѓу кои и едно дете. Според последните информации станувало збор за двајца сопружници и нивното дете
Спасувачките тимови, меѓу кои и спасувачи од Киргистан, по извлекувањето од под урнатините ги предале повредените на медицинските служби и се пренесени во болница. Телевизиските снимки прикажуваа три лица кои медицински тимови ги префрлаат во болница.
Меѓутоа 12-годишното дете, починало набргу по спасувањето, јавија турските медиуми. Родителите пак, според последните информации, се во стабилна состојба.
Иако постои надеж во урнатините да се пронајдат уште преживеани, шансите се намалуваат од час во час. Сепак чуда се и натаму можни. Вчера, под урнатините на зграда во покраината Хатај, беше спасен и еден маж дури 278 часа по земјотресот.
Турските спасувачки тимови и денеска продолжија да ги пребаруваат урнатините. Стручњаците велат оти најголем број преживеани можат да бидат спасени во перодот од 24 часа по земјотресот.
Бројот на починати во разорниот земјотрес на југот на Турција се зголеми на 39.672 лица, соопшти турското Минситерство за внатрешни работи.
Во соседна Сирија, претходно разорена од 12-годишната граѓанска војна, досега од земјотресот животот го загубија над 5.800 лица.
Со тоа бројката на загинати во двете земји порасна на 45.472. Ни Турција, ниту Сирија не соопштија колку луѓе сѐ уште се водат за исчезнати по земјотресот. Во Сирија најголемиот број жртви се на североистокот на земјата. Настојувањата да се помогне на населението ги попречуваат конфликтите меѓу владините сили и бунтовниците.