ويل کيږي چې هره شيبه د تیر وخت په اړه فکرونه او يا د راتلونکي په اړه اندیيښنې انسان آرامۍ ته نه پريږدي. د «دي پاور آف ناو» يا «د اوس د ځواک» په نوم د مشهور کتاب ليکوال ايکهارت تولې په خپل دې کتاب کې ليکي چې په حال کې ژوند کول او اوسنی وخت په بشپړ احساس سره تیرول، موږ د ماضي يا تېر وخت په سوچونو کې له ډوبيدو ژغولی شي. سبا چا ليدلی؟ نو ولې دا زده نه کړو چې څرنگه نن ښه ژوند کولی شو؟

د مادريد پوهنتون د يوې څيړنې په حواله د منفي فکرونو پر کاغذ ليکل او بيا دغه کاغذ ايسته اچول، له دې فکرونو څخه د ځان د خلاصولو يوه ډېره ښه لاره ده. د ارواپوهانو په حواله دا کار بايد په منظم ډول وکړو. پر خپلو فکرونو تمرکز کول او دې ته پام کول چې منفي سوچ مو کله پر ذهن حمله کوي او په چټکۍ سره د يوه ښه شي اړه فکر کول هم منفي فکرونه له منځه وړلی شي.

تل د راتلونکي په اړه فکر کول يو منفي عمل دی خو په ژوند کې د يوه هدف او مقصد ټاکل يوه مثبته خبره ده. که دا مقصد يا هدف د کتابونو لوستل، په خپل مسلک کې پرمختگ، د اولادونو سالمه روزنه او که بل څه وي، خو په ژوند کې د يوه هدف درلودل انسان ته د مخکې تلو همت ورکوي.

يو څه په لاس راوړل د هر چا خوښ دي خو ويل کيږي کوم خوند چې د تحفې په ورکړه کې دی په اخیستو کې یې نه شته. د «ټايني بدها» په نامه انټرنټ پاڼه کې په خپره شوې يوه مقاله کې راغلي چې له يوه اړمن دوست او خپلوان سره مرسته کول، يوه بې کوره او بې وزله ته د ډوډۍ ورکول او يا خيرات يا آن يو چا ته يوازې خندل، کولی شي تاسو ته خوښي در وبښي.

آیا تاسې زړور ياست، روښان فکره ياست او يا هر وخت د علم او زده کړې د ترلاسه کولو هڅه کوئ؟ تاسې څرنگه له خپلو مثبتو اړخونو څخه کار اخلئ؟ ويل کيږي چې له خپلو وړتياو څخه په بشپړه توگه د گټې اخيستو له لارې انسان نه يوازې په خپل ژوند کې لا پسې ډاډه کيږي بلکې د نورو ژوند هم ښه کولی شي.

مينه څرنگه خپره کړو؟ دا دومره مشکل کار هم نه دی. هغوی ته چې له تاسې سره مينه لري، د تحفې يا سوغات ورکول، په دفتر کې له کارکوونکو او يا همکارانو سره ښه چلن او يا کله کوم ماشوم ته آيس کريم اخيستل، دا ډول کوچني عادتونه د مينې په ويشلو او مينې په ترلاسه کولو کې مرسته کولی شي.

که انسان د نورو د سهوو د بخښلو هنر زده کړي نو ژوند یې له سکون او هوساينې ډکيدلی شي. يو ارواپوه چې د يو شمير واده شويو جوړو راهنمايي یې کوله، وايي چې زياتره مشکلات د ورځني ژوند له کوچنينو ترخو پېښو راټوکيږي. يو بل ته پاملرنه او پر يو بل پام کول او تر ټولو زيات د يو بل له بخښلو سره اړيکي له پرې کيدو ژغورل کیدای شي.

د نړۍ له مشهور وياندويانو څخه یې يو ټوني روبنز چې د خپلو ويناوو له لارې خلک هڅوي، په خپل «ان لميتد پاور» يا «لامحدوده ځواک» په نوم کتاب کې وايي چې د انسان بدني روغتيا د هغه د ذهني او رواني روغتيا او بریاليتوب سره ژوره اړيکه لري. له ډېرو غوړو خوراکونو ډډه وکړئ او تازه ميوه او سبزيجات د خپل خوراک برخه وگرځوئ. په منظم ډول قدم وهل او يا ورزش کول انسان تازه ساتي او انسان ځان ښه احساسوي.

د ۲۰۲۰م کال «د خوشالۍ نړيوال راپور» له مخي، فنلند د ارزول سوو ۹۵ هيوادونو څخه په نړۍ کي تر ټولو خوشال هيواد دی. دغه هيواد په پرله پسې څلورم کال د نړۍ د تر ټولو خوشالو هيوادونو په سر کي ځای مومي. د راپور له مخي د نړۍ تر ټولو بختور کسان په دغه هيواد کي ژوند کوي. د اروپا په شمال کي واقع دغه هيواد ښيي چي خوشالي صرف د اقتصاد سره تړلی څيز نه دی.

دغه هيواد د ۲۰۱۷ څخه تر ۲۰۱۹ کال پوري په پرله پسې توګه د نړۍ تر ټولو خوشال څلورم هيواد وو. خو د ۲۰۲۰م کال د راپور له مخي دغه هيواد ته اوس دويم مقام ورکړل سوی دی. دغه راپور د اقتصادي پرمختګ، د ژوند په هکله هيلو، اجتماعي مرستو او په ژوند کي د بيلو امکاناتو له پاره د آزاد انتخاب لرلو پر ارزښتونو جوړيږي.

د ۲۰۱۹م کال په پرتله د ۲۰۲۰م کال دغه راپور د کرونا پاندمي په جریان کي جوړ سوی دی. په دغه کال د انسانانو پر ژوند کرونا زیات اغېز درلود. په دغه ليست کي پر دريم او شپږم مقام راغلي هيوادونه هم د فنلند په شان د سکانديناويا هيوادونه دي. ډنمارک پر دریم او سوېډن پر شپږم مقام راغلي دي.

په دغه ليسټ کي سويس (انځور) پر څلورم مقام، هالنډ پنځم مقام او اتريش پر لسم نمبر راغلي درې نور اروپايي هيوادونه دي.

د ۲۰۱۷م څخه تر ۲۰۱۹م کاله پوري آلمان ته د خوشال هيوادونو په دغه ليست کي ۱۱ مقام ورکړل سوی وو. خو په نوي ليست کي دغه هيواد ۷ مقام ته راپورته سوی دی.

د نړۍ په تر ټولو خوشاله لسو هيوادونو کي د نيوزيلند هم شامل دی. دغه هيواد چي پر نهم مقام راغلی دی، يوازنی هيواد دی چي په اروپا کي نه دی واقع. نيوزيلند يو له هغو کمو هيوادونو څخه دی چي کرونا پاندمي يې تر کنټرول لاندي راوستلې.

په منځني ختيځ کي اسرائيل يوازنی هيواد دی چي د نړۍ د تر ټولو خوشاله هیوادونو په ليست کي په لومړيو شلو مقامونو کي قرار لري. دغه هيواد له مخکني ۱۲ مقام څخه و ۱۱ مقام ته راپورته سوی دی.

آستراليا د خوشبختو هيوادونو په ليست کي ۱۲م ځای لري.

امريکا متحده ايالات په دغه ليست کي ۱۴ مقام لري. دغه هيواد مخکي پر ۱۶ مقام وو.

کاناډا په مخکني ليست کي پر ۵ مقام وو. خو په تازه ليست کي دغه هيواد ۱۵ مقام ته راټيټ سوی دی.

سعودي عربستان تر فرانسې وروسته ۲۱ ځای نیولی. دغه هيواد په مخکنۍ ارزونه کي ۲۵م وو.

پاکستان ته د نړۍ د تر ټولو خوشبخته هيوادونو په ليست کي هيڅ ځای نه دی ورکول سوی.

افغانستان د نړۍ د تر ټولو خوشبخته هيوادونو په ليست کي هيڅ ځای نه دی ورکړل سوی. د مخکنيو ارزونو له مخي افغانستان په نړۍ کي تر ټولو غمجن هيواد دی.

ايران چي د ۲۰۱۷ او ۲۰۱۹ کالونو تر منځ په ارزونه کي ۷۷م ځای درلود، په تازه ارزونه کي ۹۵ مقام ته راټيټ سوی دی. دا مقام د خوشبختو هيوادونو د ليست تر ټولو لاندنی مقام دی. البته د ايران ګاونډي هيوادونه لکه پاکستان او افغانستان له سره په دغه ليست کي ځای نه لري.