۱۲۸۶ کډوال چې د لرګیو په دوو او څلورو پلاستیکي کښتیو کې سپاره وو، د لیبیا په ۶۰ کیلیومتري کې د مدیترانې په اوبو کې د ډوبیدو په حال کې وو چې د آلماني پوځ او نورو ځواکونو له خوا وژغورل شول.
په ژغورل شویو کسانو کې ۹۹۰ نارینه، ۲۲۰ ښځې او ۷۴ ماشومان شامل دي چې د جمعې په ورځ د ډوبیدو له ګواښ سره مخامخ ول.
د آلمان د پوځ په حواله لومړی د لیبیا سواحلو ته نزدې د لرګیو یوه کښتۍ ولیدل شوه چې شاوخوا ۵۰۰ کسان په کې سپاره وو. له دې سیمې څخه بیا وروسته ټول ټال په شپږو کښتیو کې سپاره کډوال وژغورل شول.
د آلماني پوځ کښتۍ د دغو کډوالو له ډلې څخه ۴۸۵ تنه ژغورلي او د سلهاو تنو نورو د ژغورنې په عملیاتو کې یې ګډون کړی دی. د کډوالو تر ژغورنې وروسته بیا درې کښتې ډوبې شوې دي.
د آلمان پوځ سمندري ځواکونه د «سوفیا» عملیاتو په ترڅ کې چې د انسانانو له قاچاق سره د اروپايي ټولنې د مبارزې ماموریت دی، دې سیمې ته استول شوي دي.
په مدیترانه کې د کډوالو د کښتې د ډوبیدو انځورونه
د ایتالیا سمندري ځواکونو په مدیترانه کې د کډوالو د یوې کښتۍ د ډوبیدو انځورونه خپاره کړي دي. په دې کښتۍ کې ۵۰۰ کسان سپاره وو. په روان کال کې شاوخوا ۱۳۷۰ انسانان اروپا ته د رسیدو په هڅه کې ډوب شوي دي.
انځور: Reuters/Marina Militareد ایټالیا د سمندري ځواکونو کښتۍ د چهارشنبې په ورځ د هغو کډوالو مرستې ته ورسیده چې د کب نیوونکو په یوې وړوکې کښتۍ کې په مدیترانه سمندر کې په حرکت کې وه. په روان کال کې له ۴۰ زرو څخه ډیر کډوال له مدیترانه سمندر څخه ایټالیا ته لیږدول شوي دي.
دغه زړه کښتۍ هغه وخت چپه شوه چې کډوال یې یوازې یوې خوا ته راټول شول. ځینې کډوالو ځانونه له کښتۍ ځانونه سمندر ته اچولي وو. ډیر کډوالو د ژغورنې واسکټونه هم په تن کې لرل.
د کښتې تر چپه کیدو وروسته په هغې کې سپرو کسانو په سمندر کې لامبو پیل کړه. د ایټالیا سمندري ځواکونو ویلي دي چې په دې پیښه کې لږ تر لږه پنځه کسانو خپل ژوند له لاسه ورکړی دی.
یوې بلې کښتۍ هم له کډوالو سره د مرستې په موخه سیمې ته یوه څرخي الوتکه استولې ده. هغوی کډوالو ته د ژغورنې واسکټونه ورسول.
د مهاجرت نړیوال سازمان ویلي دي چې په روان کال کې لږ تر لږه ۱۳۷۰ کسان اروپا ته د رسیدو پر لاره په اوبو کې ډوب شوي دي.
د ایټالیا سمندري ځواکونو اعلان کړی دی چې په ټوله کې ۵۶۲ تنه کډوال له دې ډوبیدونکې کښتۍ څخه ژغورل شوي دي. اروپايي چارواکي اندیښنه لري چې د هوا له ګرمیدو سره ښایي ډیری کسان د مدیترانې له لارې اروپا ته د رسیدو هڅه وکړي.
چارواکي وایي چې د کډوالو په مخ د بالکان هیوادونو د لارې تر تړل کیدو وروسته اوس ډیری پناه غوښتونکي د مدیترانې له لارې اروپا ته رسیدو هڅه کوي.
دغو ځواکونو په تیرو اووه اوونیو کې ۱۶۳۸۹ کډوال له ډوبیدو څخه ژغورلي دي. اوس مهال د آلماني پوځ ۲۰۰ سرتیري په دې عملیاتو کې ښکیل دي.
اروپايي ټولنه غواړي خپل دغه عملیات لا پسې پراخ کړي او غواړي په دې برخه کې د لیبیا سمندري ځواکونو ته هم روزنه ورکړي.
خو د بې سرحده ټاکترانو سازمان بیا پر دغه ماموریت باندې نیوکه کوي او وايي چې هغه د کډوالو پر ویرولو ولاړ دی نه د هغوی د ژوند په اړه پر اندیښنو.
تیر کال له ۳۷۰۰ څخه زیاتو کسانو اروپا ته د رسیدو پر لاره، په اوبو کې خپل ژوند له لاسه ورکړ. د کډوالو نړیوال سازمان یا (IOM) ویلي دي چې د روان کال د مې میاشتې تر ۲۹مې نیټې پورې ۱۴۰۰ تنه د مدیترانې په سمندر کې ډوب شوي دي.
