مذهبي رسمونه له ډول ډول رنګونو سره لمانځل کیږي. د آلمان د بوخم د ښار انځوریز نندارتون د میرمن بریګیته کرمر په وسیله اخستل شویو انځورونو ته ځانکړې کړای شوی وو. په دغه انځور کې د آلمان د هرنه په ښار کې د سوریايي ارتدکس عیسویانو د عبادت مراسم ښوول شوي دي.

د ۱۹۰۰ عیسوې کال په شاوخوا کې د آلمان د «روهر» په سیمه کې یو شمیر لویې کنیسه ګاني «د یهودانو عبادت ځایونه» جوړ شول چې وروسته بیا دغه عبادت ځایونه د نازیانو له خوا ړنګ شول. خو په وروستیو لسو کلونو کې د یهودي عبادت ځایونو شمیر په آلمان کې یو ځل بیا زیات شوی دی.

د هغو مسلمانانو شمیر چې د آلمان د راین او روهر په سیمو کې ژوند کوي ۱،۵ میلیونو ته رسیږي. له نن څخه ۵۰ کاله مخکي کله چې په لومړې ځل مسلمانان آلمان ته راغلل هغوی په دغه هیواد کې مسجدونه نه لرل او مجبوره ول چې خپل لمونځونه په کور یا په یو لوې سالون کې ادا کړي، خو اوس د آلمان په مختلفو ښارونو کې د مسلمانانو مسجدونه جوړ شوې دي.

د ګلزن کیرشن په ښار کې د مسجد الاقصی ملا امام د وعظ او نصیحت له پاره تیاری نیسي.

په کاتولیکي کلیسا کې یوځایي یا د ګډ حرکت عبادت ۱۵۰۰ کلن تاریخ لري. د دغو مراسمو له ډلې څخه یو یې د کرهڼیزو محصولاتو د زیاتوالي له پاره دعا کول دي. خو اوس د دې عبادت دعا یوازې د کرهڼیزو محصولاتو له زیاتوالي پورې محدوده نه ده بلکې د ټول ولس له پاره د کار پيدا کیدل، د سولې د ثبات او همدارنګه د ټولې نړۍ د وګړو له پاره د خوړو د پریماني له پاره ده.

د «روهر» په سیمه کې د عیسویانو او نورو دینونو ۱۵۰ مرکزونه فعالیت کوي. یو د دغو مرکزونو څخه د هاتینګن په ښار کې د «سری واراسیتهی وینایاګار» په نامه د هندوانو عبادتځای دی.

«سری کاماچی آمپال» په اروپا کې د «دراویدا» د هنداونو تر ټولو لوېې عبادتځای دی. دا عبادت ځای په ۲۰۰۲ کال د آلمان د هام په ښار کې جوړ شو. هر کال په زرګونو تنه هندوان له ټولۍ اروپا څخه دغه عبادت ځای ته راځي.

د «سینګ سبها» جشن د سکانو له پاره نسبتآ یو نوی جشن دی. دا مذهبي جشن په ۱۸۷۳ کال کې د هند د هیواد د پنجاب په ایالت کې رامنځ ته شو. د دې عقیدي درلودونکي خپل عبادت ځای ته «ګورداوارا» وايي.

په مجموع کې په آلمان کې ۱۳۰ زره تنه آسیايي بودایان او ۱۲۰ زره تنه آلماني بودایان ژوند کوي. د بودایانو دا راهب د دوسلدورف په یو بودایی کلیسا کې د کلیسا زنګ وهي.

بریګیته ګرمر، د آلمان په لویدیځ کې د «روهر» په سیمه کې د مختلفو دینونو، تنوع ته خاصه پاملرنه کړي ده. دغه مسلکي عکاسه د آلمان د مشهورو رسنیو، لکه شټیرن، شپيګل، او سایت سره همکاري لري.