آلمان:د مهاجرو اخراج له مقاومت او د ځواک له کاریدو سره مل دی
۱۳۹۸ مرداد ۲۲, سهشنبه
هیڅوک نه غواړي پخپله خوښه له آلمان څخه اخراج سي. ځکه اوس دا معلومه سوې ده چي د اخراج پر مهال د دې بهیر د مخنیوي له پاره د پناه غوښتونکو مقاومت ډیر شوی. خو پولیس یې هم په مقابل کي له زور څخه کار اخلي.
اعلان
دا موضوع چي ولې اکثره وختونه د مهاجرو اخراج نه سي تر سره کیدای او د هغوی د اخراج پلانونه له ناکامۍ سره مخامخ کیږي، ډیر لاملونه لري. مهاجرين خپلو او یا دریمو هغو هیوادونو ته چي دوی ورڅخه راغلي دي د اخراج د مخنیوي له پاره په محکمو کي دعوې کوي او په ډیرو مواردو کې هم کامیابه کیږي. او یا دا چې مخکي تر دې چي پولیس هغوی د اخراج په نیت ونیسي، له اخراج سره مخامخ پناه غوښتونکي ځانونه پټوي. کله کله د هغوی اخراج په اخرو دقیقو کي هم د ناکامۍ سره مخامخیږي او په هوايي ډگرونو کي د مقاومت په سبب نه سي تر سره کیدلای. یوازي د همدې ۲۰۱۹م کال په لومړۍ نیمايي کي د مختلفو شرکتونو پیلوټانو د ۳۳۵ مهاجرو له انتقال سره مخالفت کړی دی.
دغه شمیرې په پارلمان کي د حکومت څخه د چپیانو د یوې پوښتني په ځواب کي وړاندې سوي دي. خو د دغه ساده ارقامو تر شا د کلونو راهیسي په عملي توګه یوه ستونزه پرته ده او هغه دا چي د مهاجرو د اخراج په بهیر کې په مخ په زیاتیدونکي ډول له فزیکي ځواک څخه کار اخیستل کیږي: هم د مهاجرو او هم دولت له خوا.
د حکومت له خوا په وړاندې سوي ځواب کي راغلي چي د ۲۰۱۵ او ۲۰۱۸مو کلونو تر منځ د اخراج پر وخت د ولچک سویو مهاجرو شمیر د ۱۳۵ کسانو څخه ۱۲۳۱ تنو ته لوړ سوی.
دا هم په داسي حال کی ده چي په دغو کلونو کي د اخراجیدونکو مهاجرو په شمیر کي ډیر تغیر نه دی راغلی او څه نا څه ثابته پاته سوي دي: د بیلګې په توګه په ۲۰۱۷م کال کی ۲۳۹۶۶ او په ۲۰۱۸م کال کي ۲۳۶۱۷ کسان اخراج سوي دي. د روان کال تر جون میاشت پوري ۱۱۴۹۶ کسان اخراج سوي دي او اټل کیږي چې د کال تر پایه پورې شمیر د تیرو کلونو اندازې ته ورسیږي. دا په داسې حال کي دی چې د اخراج په موخه د ولچک سویو مهاجرو تعداد بیا لس وارې لوړ سوی دی.
د آلمان د کورنیو چارو وزارت ویاندي ایلیونور پیترمن، د دوشنبې په ورځ (د اگست میاشتي پر۱۲مه نیټه) د دې موضوع په هکله د دویچه ویله د یوې پوښتني په ځواب کي وویل: «له دې کبله چي اخراجیدل [د رد سویو پناه غوښتونکو] په خوښه نه تر سره کیږي، نو ورسره مخامخ کسان خپله ناراضایتي ښکاره کوي، ښايي د فزیکي مقاومت له ښوولو سره.»
هغې زیاه کړه چې د دې له پاره چي داخراجیدو پروسه سربیره پر هغه عملي سي، نو د هغوی د انتقال پر مهال ډیر وخت ولچکیږي او یا له نورو وسایلو څخه کار اخیستل کیږي. خو په خبره یې د دې څخه «یوازي د وروستۍ وسیلې په توګه کار اخیستل کیږي.»
خو د چپیانو له فراکسیون څخه اولا یېلپکه، د دواړو اړخونو له خوا مخ پر ډیریدونکی تشدد بل ډول بیانوي او وايي: «زه دا د منلو وړ نه بولم، چي د دغو انسانو شک او تردید ته تل په بې رحمانه ډول د زور څخه په کار اخیستلو سره ځواب ورکړل سي او د ارادې پر خلاف یې په خپلو هیوادونو کي فقر او بدبختۍ او یا هم ترانزیټي هیوادونو ته واستول سي.»
یېلپکه په دې ارتباط د اروپايي شورا د ربړونې ضد کمیټې هغه انتقاد ته هم اشاره وکړه چي د همدې کال په مي میاشت کي یې له آلمان څخه غوښتي وو، چي د مهاجرو د اخراج پر مهال «نامناسب او د انساني شان او شوکت خلاف» تشدد ته خاتمه ورکړي.
زمو آرشیف څخه یو انځوریز البوم:(30.12.2017 )
کوم شمیر پاکستاني مهاجر له اروپا اخراج شوي دي؟
آلمان سږ کال د نورو اروپایې هیوادونو په پرتله تر ټولو ډير مهاجر اخراج کړي دي. دا چي کوم اروپايي هيواد کوم شمېر پاکستاني مهاجر اخراج کړي دي، په دغه انځوريز راپور کي يې وګورئ:
انځور: picture alliance/dpa/J. Kalaene
بریتانیا
په تیرو پنځو کلونو کې نږدې ۴۰ زره پاکستاني مهاجر په غیر قانوني ډول په بریتانیا کې اوسیدل، چې د محکمې د حکم پر اساس ورته د هیواد پریښودلو ویل شوي ول. په همدې موده کې تر ۲۷ زرو ډیر پاکستاني مهاجر یا خو بیرته خپل هیواد ته ستانه شوي او یا هم کوم بل اروپایې هیواد تللي دي.
انځور: picture-alliance/dpa/J. Kalaene
یونان
په تیرو پنځو کلونو کې په یونان کې داسې ۴۳ زره پاکستاني مهاجر موجود ول چې په دغه هیواد کې یې د استوګنې قانوني اسناد نه درلودل او دوی ته امر شوی وو چې له دغه هیواد څخه دې ووزي. په دې موده کې ۱۶۷۰۰ پاکستاني مهاجر له یونان څخه وتلي دي.
انځور: Getty Images/AFP/R. Lafabregue
فرانسه
فرانسې له ۲۰۱۲ م څخه تر ۲۰۱۶ م کاله پورې په دغه هیواد کې هغو یولس نیم سوه مهاجرو ته له دغه هیواد څخه د وتلو امر وکړ چې د پناهندګۍ غوښتنلیکونه یې رد شوي دي. په دې موده کې یوازې ۲۶۵۰ پاکستاني مهاجر له فرانسې څخه وتلي دي.
انځور: picture-alliance/NurPhoto/A. Widak
هسپانیا
په همدې موده کې نږدې اته زره پاکستاني مهاجرو ته د هسپانیې د پریښودلو امر شوي دي، خو د رسمي شمیرو له مخې یوازې شپږنیم سوه یې پاکستان ته ستانه شوي او یا هم کوم بل اروپایې هیواد ته یې پناه وړې.