آلمان په ۲۰۱۶ کال ۱۰۵ زره هغو بهرنيانو ته په آلمان کې د اوسيدو ويزې ورکړي دي، چې د مخه يې د کور غړي يا خپلوان په آلمان کې مهاجر وو.

له ۱۰۵ زره ويزو څخه ۷۳ زره يې د سوريايي او عراقي مهاجرو خپلوانو او کورنيو غړو ته ورکړل شوي دي.

آلمان يوازې د هغو مهاجرو د کورنيو غړو ته د اقامت ويزې ورکوي چې په آلمان کې منل شوي وي.

آلمان تير کال د مهاجرو خپلوانو ته د ويزو د ورکړۍ يو نوی ريکارډ کلک کړ.

د مهاجرو د کورنيو پاتو غړو ته ويزې، د کورنيو د بېرته يوځای کېدو (Familienzusammenführung) قانون له مخې ورکول کيږي.

د کورنيو د بېرته يوځای کولو په قانون کې په زرونو هغه مهاجر نه راځي کوم چې په ۲۰۱۶ کال کې يې د يو آلماني او يا په آلمان کې د کوم بل ملک منل شوي کس سره واده کړی وي.

آلمان مخکې هم په دغه هيواد کې د ميشتو مهاجرو خپلوانو ته د اقامت ويزې ورکړي دي، خو نه په دغه شمېر.

په ۲۰۱۴ کال کې آلمان د مهاجرو نژدې ۵۰ زرو خپلوانو ته چې خپلو ملکونو کې پاتې وو، قانوني ويزې ورکړې وې.

په ۲۰۱۵ کال کې بيا د مهاجرو نژدې ۷۰ زرو خپلوانو ته د اقامت ويزې ورکړل شوي وې.

تر منل کيدو وروسته، بله لويه خوشالي هغه وخت وي چې د مهاجر د کور پاتې غړو ته د اقامت ويزې ورکړل شي.

خو رد شوي مهاجر د قبول شوو مهاجرو په پرتله د زياتو آسانتياؤ او چانسونو څخه محروم وي، په شمول د کورنۍ د غړو د راوستلو څخه.

افغانستان، سوريه او عراق درې هغه ملکونه چې په ۲۰۵۱ او ۲۰۱۶ کلونو کې یې د نړۍ تر ټولو زیات مهاجر لرل.

اروپا ته راتلونکي مهاجر هم، تر ټولو زيات آلمان کې ميشتيدل خوښوي.

په ۲۰۱۵ او ۲۰۱۶ کلونو کې شاوخوا يونيم ميليون مهاجر آلمان ته ورسيدل چې له ډلې څخه یې زيات شمير منل شوي دي.

صدراعظمه انګلا مرکل د مهاجرت په برخه کې د ښه سیاست لرلو په دليل په مهاجرو کې محبوبه وه. خو پر مرکل د خپل دغه سياست له کبله حتی د خپلو سياسي ملګرو له خوا فشارونه او انتقادونه زیات ول چي ښايي په راتلونکي کي د مهاجرو د کورنيو د رابللو په سياست او قواعدو کي د بدلون سبب شي.

آلمانیانو ته د نړۍ دروازې پرانستي دي. د لندن د مشورتي شرکت «هینلې او پارتنر» د معلوماتو په حواله آلمانان ۱۷۷ هیوادونو ته بې له ویزې سفر کولای شي. له دې سره آلمان په پرله پسې دریم کال لومړی ځای خپل کړی.

دوهم ځای سویډن لري. د ښایسته کلیو او ښکلي طبیعت خاوند دغه هیواد د نوري نړۍ د سیلانیانو له پاره یو په زړه پورې ځای دی. خو سویډنیان خپله هم ډیر د سفر شوقیان دي. د دوی د ټولو خارجي سفرونو ۷۱ سلنه د سیاحت په موخه ترسره کیږي. د نړۍ د ۱۷۶ هیوادونو دروازې دوی ته پرانيستي دي او پرته له ویزې ورته سفر کولای شي.

په آسیا کې د سنګاپور او جاپان پاسپورت لرونکي د سفر ډيره آزادي لري. د دغه هیوادونو وګړي ۱۷۳ ملکونو ته له ویزې اخیستو پرته تګ راتګ کولای شي. له دریم څخه تر نهم مقام پوري د ختیځې اروپا هیوادونو او همدا راز استرلیا، کانادا، جنوبي کوریا او نوی زیلاند خپل کړي. امریکا متحد ایالات وار د واره مخکې کیږي او څلورم مقام لري.

د برلین دیوال تر ړنګیدو وروسته د ختیځې اروپا ډيرو هیوادونو خپل سرحدونو خلاص کړل. په ۲۰۰۸م کال کې چیک جمهوریت او هنګري د اروپايي ټولنې د نورو هیوادونو سره په شریکه د شینګن په ساحه کې شامل شول. د آیسلند هیواد سره په شریکه د دغه هیوادونو پاسپورتونه لسم مقام لري. د دغه پاسپورت لرونکي ۱۶۷ هیوادونو ته پرته له ویزې سفر کولای شي.

کولمبیا په یوه کال کې ډير پرمختګ وکړ. د لاتین امریکا دغه هیواد ۲۵ مقامه مخکې شو او اوس پنځوسم ځای لري. همدا راز د سویل ختیځې آسیا ټاپو وزمه هیواد ختیځ تیمور له اروپايي ټولني سره د ویزې د یوه دوه اړخیز تړون له برکته ۵۷ مقام ته لوړ شو.

د جاپان، جنوبي کوریا او امریکا متحدو ایالاتو سره د ویزې د محدودیتونو د نرمولو له امله اوس چینایان هم د سفر زیاته آزادي لري. ډيري چینایان له اقتصادي اړخه هم د دې جوګه دي چې نورو هیوادونو ته سفر وکړي. د رسنیو د رپوټونو په حواله استرلیا او بریتانیا پر دې اړه فکر کوي چې د چینايي وگړو له پاره د سفر شرایط آسانه کړي.

سوریايي وګړي یوازې ۳۲ هیوادونو ته پرته له ویزې سفر کولای شي. دغه عربي هیواد له دې سره د پاسپورتونو په نړیواله درجه بندي کې ډیر شاته دی. خو د سوریايي پاسپورت درلودونکي بیا لږ تر لږه یو چانس لري چې د یوه پناه وړونکي په توګه په اروپا کې ومنل شي. د عراق او یا افغانستان د مهاجرو له پاره بیا دا ډيره مشکله ده.

افغانستان هم په دغه درجه بندۍ کې له هغو هیوادونو څخه یو دی چې وروستي مقامونه لري. په دې توګه دغه هیواد د سوریې، سومالیا، پاکستان او عراق ترڅنګ په هغو پنځوو هیوادونو کې شامل دی چې وګړو ته یې قانوني سفر تقریباً ناممکنه کوي. د دې وجه په دغه هیوادونو کې د څو کالو سیاسي بې ثباتي ده.

په دغه انځوريز راپور کي ښودل سوي معلومات له «پاسپورت اينډکس ټکی آرګ» څخه د ۲۰۱۷ کال د جنورۍ په ۱۴مه اخيستل سوي. ياده منبع ۲۳ هيوادونه يادوي چې افغانان ورته مخکنۍ ويزې ته اړتيا نه لري. خو د ۲۰۱۶ کال د نوامبر په ۳۰مه نېټه د «تليګراف» بريتانوۍ آنلاين رسنۍ او د ۲۰۱۶ کال د مارچ په ۱۱مه د «زيوډ ډويچه» آنلاين پاڼي ۲۵ هيوادونه ياد کړي ول چي پر افغان پاسپورټ ورته بېله مخکنۍ ويزې سفر کېدلای سي.