آلمان ـ پولسو ۱۱ تنه پر ماشومانو د جنسي تیري په تور نیولي
۱۳۹۹ خرداد ۱۸, یکشنبه
په بيلو آلماني ايالتونو کي مجموعا ۱۱ کسان پر ماشومانو د جنسي تېري او ورڅخه فلم جوړولو په تور ونيول سول. تورنو کي د يو قرباني پلار هم شامل دی.
انځور: picture-alliance/dpa/G. Kirchner
اعلان
د قضيې اصلي تورن يو داسي ۲۷ کلن کس دی چي د ماشوم زهيروني د تمايل له کبله تر روانې درملنې لاندي ؤ او مخکنۍ جرمي دوسيې هم لري. د دغې قضيې څېړونکي څارنوالانو او پوليسو پر ماشومانو د دا ډول بې رحمۍ له کبله هېښتيا ښودلې ده.
د کاتوليکي خبري آژانس د خبر له مخي د اونۍ په آخره (شنبه او يکشنبه) د آلمان په بيلو ايالتونو کي تلاښۍ تر سره سوي چي مقصد يې د ماشومانو د زهيروونکي يا ورباندي جنسي تېري کوونکي او ورڅخه انځوريز او ويډيويي مواد جوړونکي يوې تورنې ډلي پر ضد عمليات ول.
د يادو تورنو په ترڅ کي د آلمان په نورد راين وېستفالن، هېسن، نيدرزاکسن او براندنبورګ کي ۱۱ کسان تورن کړل سوي دي. پر هغوی تور دی چي پر ماشومانو يې جنسي تېری کړی، د دغو تېريو انځوريز او ويډيويي مواد يې جوړ کړي او بيا يې په انټرنټ کي خپاره کړي يا يې په يادو جرمونو کي يو بل ډول رول لرلی دی.
په دغه قضيه کي مرکزي تورن کس له ميونسټر ښار څخه يو ۲۷ کلن کمپيوتر پوه دی چي و ماشومانو ته د جنسي تمايل لرلو له کبله تر درملنې لاندي پاته سوی او څو ځله تر مخه د جرمنو د ثابتېدلو له کبله جزايي سوی هم دی. د آلمان د نارد راين وېستفالن د کورني چارو ايالتي وزير بېره څرګنده کړې ده چي ښايي قضيه تر هغه پراخه او د قربانيانو شمېر هم زيات وي، لکه دمګړی چي يې په هکله معلومات سته.
په ټوليزه توګه ۶ کسان د پوليسو له خوا نيول سوي دي. په نيول سوو کسانو کي د تورن کس مور هم شامله ده چي په ميونسټر ښار کي په يوه وړکتون کي کار کوي. د رسنيو د راپورونو له مخي د دغې قضيې مرکزي قربانيان د مرکزي تورن کس د ژوند د شريکي مېرمني لس کلن زوی او د يو بل تورن کس پنځه کلن زوی دی.
د ماشوم د جنسي ځوروني احتمالي علايم ـ انځوريز راپور
ماشومان د خپلو مشکلاتو په هکله د خبرو کولو توان نه لري او خپلي ستونزي نه سي بيانولای. که تاسو د خپل ماشوم په چلن کي بدلون وينئ، نو ورسره خبري وکړئ او ځان ډاډه کړئ چي هغه خو به په جنسي توګه نه ځورول کيږي.
انځور: picture alliance/ANP/R. Koole
که ماشوم خاموش خاموش سي
که ستاسو ماشوم په ناڅاپه خاموش خاموش غوندي سي، نو دغه چلن يې له پامه مه باسۍ. ښايي هغه تاسو ته د ويلو له پاره يو څه ولري، خو کولای نه سي چي ووايي. له هغه سره خبري وکړئ.
انځور: picture-alliance/dpa
د خوب کمېدل
که ستاسو ماشوم له څو شپو راهيسي سم خوب نه کوي يا له خرابو خوبونو ليدلو څخه شکايت کوي، يا وايي چي بيريږي، نو ورسره خبري وکړئ چي له څه شي څخه بيريږي.
انځور: Fotolia/pegbes
د ماشوم په غوسه کېدل
ماشومان د عمر په بېلابېلو پړاونو کي بېل چلن زده کوي. ځيني وختونه ډېر تکرار او ضد کوي او ځيني وختونه جنګونه کوي. خو د هغوی دغه غوسه او چلن که د هغوی له معمولي چلن څخه بېل وي، نو هڅه وکړئ چي ځان پوه کړئ چي ولي پکښي دغه بدلون راغلی دی.
انځور: Imago/Imagebroker
يوازيتوب خوښول
که يو ماشوم ناڅاپه داسي وکړي چې ټول وخت يوازي پاته سي، داسي لکه بېرېدلی چي وي، او يا له خپل ځان څخه چي يې بد راغلي وي، نو ورسره خبري وکړئ او ماشوم يوازي مه پرېږدئ.
انځور: picture alliance/ANP/R. Koole
له ځانګړي شخص يا ځانګړي ځای څخه بيره
که ستاسو ماشوم و ښوونځي ته له تلو څخه بيريږي، او يا له يو ځانګړي بل ځای يا شخص څخه بيريږي، نو په مينه ورسره خبري وکړئ او د بيري وجه يې وپوښتئ. تاسو ځان ډاډه کړئ چي له ماشوم سره خو به ناوړه چلن نه وي سوی.
انځور: picture alliance/ANP/R. Koole
د ډوډۍ نه خوړل
تقريبا ټول ماشومانو د ډوډۍ د خوړلو په ترڅ کي لانجې کوي. خو که يو ماشوم نه وږی کيږي او ډوډۍ نه خوري، نو ښايي سبب په کومه ناروغي کي وي او يا په ذهني فشار کي. له دغه ډول ممکنه فشار څخه د ماشوم را ايستل ډېر مهم دی.
انځور: picture-alliance/dpa
په بستر کي ميتيازي
که ماشوم په ناڅاپه توګه د شپې په خپل بستر کي ميتيازي (بولي) کول پيل کړي، نو ورباندي د مور او پلار په توګه په غوسه کيږئ مه، او هڅه وکړئ چي د دغه عمل په لاملونو ځان پوه کړئ.
انځور: picture alliance/dpa/P. Pleul
نوي الفاظ يا لغتونه
دا عامه خبره ده چي ماشومانو په ښوونځيو او همدې ډول له تلويزيون څخه نوي الفاظ او لغتونه زده کوي. خو که دغه الفاظ غېر معمولي او جنجالي وي، نو هڅه وکړئ چي ځان ډاډه کړئ چي داسي خو به نه وي چي يو څوک په قصد سره ماشوم ته دا ډول ښوونه کوي او غواړې په دې توګه ورڅخه ناوړه گټه واخلي.
انځور: picture-alliance/dpa/U. Zucchi
د ميتيازو پر وخت درد
که ستاسو ماشوم د ميتيازو (بولو) کولو پر وخت له درد يا زحمت څخه شکايت کوي، نو په سمدلاسه توګه يې تخصص ډاکټر يا ډاکټرې ته بوزئ. د ډاکټر له لاري بايد ځان ډاډه کړئ چي ستاسو د ماشوم د درد شکايت د جنسي زهيرونې لاملونه نه لري. له ډاکټره هيڅ خبره مه پټوئ.
انځور: picture alliance/ANP/R. Koole
د تناسلې غړو يا شرمځای شاوخوا زخمونه يا دردونه
ماشومانو ته پر وخت د تناسلي غړو په تړاو معلومات ورکړئ. کله چي خپلو ماشومانو ته غسل ورکوئ نو پر دغو غړو يې پام وکړئ چي زخمي خو به نه وي. مهمه خبره دا ده چي له ماشومانو سره په مينه او محبت خبري وسي او معلومات ترې واخيستل سي.
انځور: picture alliance/ANP/R. Koole
انځورونه1 | 10
د تورنو له مخي مرکزي تورن کس د ميونسټر ښار په يوه باغچه کي د نورو تورنو کسانو سره په ګډه په ساعتونو ساعتونو پر هغو ماشوم هلکانو تېری کړی او ورڅخه فلمونه يې اخيستي، چي تر مخه ورته د نشې مواد ورکول سوي ول.
د مرکزي تورن کس پر مور تور دی چي د وړکتون کيلۍ يې خپل زوی ته سپارلي وې، د کوم په باغچه کي چي دغه جرمونه تر سره سوي دي. پوليسو د يوې باغچې په جوړښتونو کي د کمپيوتر هارډ ډسکونه او د ويډيو جوړولو دستګاوي موندلي دي. پر مرکزي تورن کس تر دمګړي د ۱۵ دا ډول جرمونو تورونه لګول سوي دي.
پر مرکزي تورن کس تور دی چي خپل د ژوند د شريکي لس کلن زوی يې څلورو نورو کسانو ته د جنسي تېري کولو له پاره سپارلی او بيا يې ورڅخه ويډيو جوړه کړې ده.
په تورنو کسانو کي يو بل کس شامل دی چي پر خپل دولس کن وراره د جنسي تېري کولو تور ورباندي لګول سوی دی.
پر مرکزي تورن کس تر مخه هم څو ځله تر مخه د ماشومانو د جنسي تېري د موادو لرلو په تور ضمانتي سزاوي راوتلي وې. خو زياته سوې چي د يو زراعتي شرکت له پاره د نوي ټکنالوژۍ په برخه کي کار کوونکي دغه کس په هغو رواني مراقبتي او د درملنې په ناستو کي ګډون کړی ؤ چي د خپل تمايل له کبله دی په مکلف سوی ؤ.
