په آلمان کې د مسیحي سوسیال گوند CSU د سیمه ایزې ډلې مشر الکساندر هوفمن، د سې شنبې په ورځ (۲۰۲۵م کال د جون دریمه) وویل: «د منلو ددغه ځانگړي پروگرام په چوکاټ کي څه ناڅه ۳۶ زره کسان آلمان ته راغلي دي.» خو اوس دا معلومه سوه چي د دغو کسانو په انتخابولو کي غیر دولتي سازمانونه هم گومارل سوي وو.

اړوند:په جرمني کي د افغانانو د منلو پروگرام برخلیک لا معلوم نه دی

په دې برخه کي د هغوی پر غلطو ژوند لیکونو یا بیوگرافیو او کورنیو اړیکو باندي کار سوی دی. هوفمن، له زرغون گوند څخه د جرمني  پخوانۍ د بهرنیو چارو وزیره انالینا بیربوک، په خپل دفتر کې په "چل او دوکه" تورنه کړې ده.

هوفمن وایي چي اوس باید دا معلومه سي چي: «دا هر څه تر کومه حده پیښ سوي دي.» هغه زیاتوي: «زه په ښکاره ډول د دې ټولو مسائلو په اړه د پلټنې د یوې کمېټې د جوړولو ملاتړ کوم.» په دې اړه به د ائتلافي حکومت له شریک، سوسیال ډیموکراټ گوند SPD سره خبرې اترې ترسره سي.

دا په داسي حال کي ده چي د آلمان اوسني صدراعظم فریدریش میرڅ څو وخته مخکې اعلان وکړ چې المان به «د داوطلبانه منل کیدو پروګرامونه، د بیلګې په توګه له افغانستان څخه پای ته ورسوي او هیڅ نوی پروګرام به پیل نه کړي.»

اړوند:ميرڅ: ځيني افغان مهاجر به اخراج او نور سيمه ايز کارکوونکي به و نه منو

دالمان نوی حکومت همدارنګه د هغو کسانو د کورنیو الحاق چې له فرعي ملاتړ څخه برخمن دي، خو اخراج یې په دې دلیل چې هیواد یې ناامنه ګڼل کیږي، ځنډوي.