له نورو انسانانو سره اړیکي د انسان په نېکمرغۍ کي مهم نقش لري. هغه کسان چي له نورو سره رنگارنگي ټولنیزي اړیکي لري تر نورو بختور او جوړ دي او همدارنگه اوږد ژوند کوي. د کورنۍ له غړو او دوستانو سره نژدې اړیکي، سړي ته مینه، د ژوند مفهوم، ملاتړ او پر ځان باندي د تکیه کولو قوي احساس ورپه برخه کوي. نو له همدې کبله له نورو سره اړیکي تقویه او پراخه کړئ.

له نورو انسانانو سره مرسته کول، زموږ د خوشحالۍ اساس جوړوي. دا کار روغتیا ته هم گټه رسوي او د انسانانو ترمنځ اړیکي لا پسې ټینگوي چی په دې ډول یوه نیکمرغه ټولنه رامنځته کیږي. دلته خبره پر مادي مرستو نه ده، بلکي موږ کولای سو خپل له وخت ، نظریاتو او بدن له انرژۍ څخه هم کار واخلو. نو که غواړئ ځانونه خوشاله احساس کړی، نورو ته گټه او خیر ورسوئ.

روح او بدن سره تړلي دي. بدني فعالیت سړي ته خوشحالي ورپه برخه کوي او زموږ صحت ته گټه رسوي. روحي آرامتیا تر لاسه کیږي او په دې ډول سړی له دیپریشن څخه خلاصوي. په ورځني ژوندانه کي ډیري آساني لاري سته چي موږ يې تعقیبولای سو. د مثال په ډول دباندي ووزی او دې ته پام وکړی چي آرامه خوب ولرئ.

راتلونکی ته په مثبت نظر کتل، زموږ د خوشحاله کولو له پاره مهم دي. موږ داسي اهدافو ته اړتیا لرو چي هغو ته د رسیدو له پاره وهڅیږو، خو دغو اهدافو ته رسیدل باید ممکن هم وي. که موږ وغواړو چي ناممکن شیان ممکن کړو، نو دا کار مو ناامیده کوي. کله چي رښتیني اهداف وټاکو او هغه ته ورسیږو نو په ژوندانه کي رضایت او خوښالي تر لاسه کوو.

له ځانه سره داسي فکر وکړئ چي په ژوند کي ډیر نور شیان هم سته. او واقعاً هم همداسي ده. موږ باید هغه پیدا کړو. د ژوندانه په ټولو برخو کي ځیرکتیا، موږ ته د آرامۍ احساس راکوي. څوک چي له اوس حالت څخه په دقت سره خوند اخلي د تیروخت مشکلات او د راتلونکی په اړه غم خوړل تر یو ځایه له پامه اچوي نو په دې ډول د خوشحالی احساس هم کوي.

مثبت احساسات لکه خوشحالي، شکر ایستل او قناعت نه یوازي د لنډ وخت له پاره صحت ته گټه رسوي، بلکي د پلټنو له مخی سړی په ژوندانه کي نور پرمختگ ته هم هڅوي. که څه هم په ژوند کي ډیري لوړي او ژوري راځي، خو سړی باید کوښښ وکړي چی د یوې پیښې پرمثبت اړخ باندي تمرکز وکړي. یو متل دی چی په اوبو نیم ډک گیلاس ته سړی څنگه گوري، ځینی یی نیم ډک ویني او ځیني يې نیم خالي.

د یوه نوي شي زده کول پر بدن باندي مثبه اغیزه کوي. موږ ته نوي آیډی گاني پیدا کیږي، کنجکاوي او لانور فعالیت ته هڅول کیږو. د نوو شیانو زده کولو سړی ته آرامتیا ورپه برخه کوي. د نوو شیانو د زده کولو له پاره ډیر امکانات سته، د مثال په ډول د یوې نوي ژبی زده کول، د موسیقۍ آلې ږغول، یو نوی سپورت او داسي نور.

هر څوک په ژوند کي له بیلابیلو مشکلاتو سره مخامخ کیږي. مهمه داده چي پر هغو باندي سړی څنگه برلاسی سي. زیاتره وخت موږ نه پوهیږو چي له څه ډول مشکلاتو سره مخامخ کیږو. خو موږ دا پریکړه کولای سو چي څنگه يې پر وړاندي مبارزه وکړو. یوه نوې پلټنه ښيي چي د ژوندانه د نورو لارو چارو په ډول، سړی دا هم زده کولای سي چی بیرته څنگه پر خپلو پښو ودریږي او له دغو مشکلاتو له عهدې څخه راووزي.

هیڅوک بې عیبه نه دی. خو زیاتره وخت موږ ځانونه له نورو سره پرتله کوو. کله چي تل په دې فکر کي اوسو چي کوم شی کمبود لرو نو هیڅکله به خوشبخته نه سو. موږ باید دا زده کړو چي پر کمبودیو سربیره، شکر وباسو او هر څه همداسي چی دي، قبول کړو. بیا به نو د نېکمرغۍ احساس هم وکړو. همدارنگه نور انسانان هم له خپلو کمبودیو او عیبونو سره قبول کړو او گوزاره ورسره وکړو.

هر هغه څوک چي د ژوندي پاتیدو له پاره یو دلیل ولري، خوشبخته دی. هغوی تر فشار لاندي نه دي او ډیر کم له بیري او یا دیپریشن سره مخامخ کیږي. همدارنگه ټینگه مذهبی عقیده، د کورنۍ جوړول او اولاد پیدا کول او یا هم یوه دنده پر مخ بیول هغه څه دي چي د سړي روح ته آرامتیا بخښي.