ډیری وخت لابراتوارونه په دې نه سي توانیدلای چې د ټِسټونو نتایج ژرمعلوم کړي. د رابرت کوخ انستیتوت په حواله تیره اونې ۶۹ لابراتوارونو په مجوعي ډول پر ۹۸ زره ۹۳۱ ټِسټونو باندي کار وکړ. د دغه انستيتويت په حواله، تر هغه لا دوې اونۍ مخکي، ۵۲ لابراتوارونو پر ۲۰ زره ۷۹۹ ټسټونو کار کړی وو.
د رابرت کوخ انستیتوت لیکي چي د ټِسټونو د بیروبار له امله د هغو د نتایجو د معلوملو کار هم له ځنډ سره مخامخ کیږي او په دې ډول د جرمني د روغتیا په اداره کي د هغوی د نومونو ثبتیدل هم ځنډیږي. د نوموړي انستیتوت په حواله، په تیرو اونیو کې داسي خبرونه هم خپاره سول چې لابراتوارونه تر سخت فشار لاندي دي او خپلو کارونو ته نه سي رسیدلای.
په جرمني کي په تیرو دوو میاشتو کي د کرونا د مثبتو پیښو شمیر څلور برابره سوی.
نوی ریکارډ
په يوه اونۍ کې د ټِسټونو شمیر په تیرو دوو میاشتو کي څه د پاسه ۴۰۰ زرو ته رسیدلی. په دې وروستیو کې۱۹۱ لابراتوارونو په یوه اونۍ کې د شاوخوا یو اشاریه ۶ میلیونو ټسټونو د اجرا کولو څخه خبری کړي چې دا په جرمني کې یو نوی ریکارډ دی.
د ډیرو مثبتو ټِسټونو معلومول دا ښیی چي په آلمان کي په کرونا باندي د نوو اخته کسانو شمیر مخ په زیاتیدو دی.
نن، پنجشنبه (د نومبر ۵ نيټه) هم په کرونا باندي د نوو اخته کسانو شمیر خپل نوي اوج ته ورسید. د رابرت کوخ انستیتوت په خبره، د آلمان صحي ادارو د یوې ورځي په ترڅ کي ۱۹ زره ۹۹۰ نوي پیښي ثبت کړي دي.
تر دې وخته پورې تر ټولو لوړ رقم تیره شنبه ثبت سوی وو چې ۱۹ زره ۵۹ پیښي وې.
زموږ له آرشیف څخه:
په اروپا کې د کرونا دوهمه څپه او نوي محدوديتونه
په اروپايي هيوادونو کې کرونا ناروغۍ تر کميدو وروسته، اوس يو ځل بيا دغې وبا زور اخیستی دی. حکومتونه په دې هڅه کې دي چې د کرونا ويروس د لا ډير خپريدو د مخنیوي له پاره نوی محدودیتونه ولګوي.
انځور: Philippe Lopez/AFP/Getty Imagesپه آلمان کې د هغو ښارونو شمير مخ پر ډيريدو دی چې د کرونا ويروس خطر پکې لوړ دی. مونشن د آلمان وروستي لوی ښار دی چې په دې ډله کې شامليږي. په برلین کې وروسته د ۷۰ کلونو پر شپې ګرځيدو بنديز لګول شوی دی. لږ تر لږه د اکتوبر میاشتې تر پايه بايد د شپې پر ۱۱ بجو ټول دوکانونه او سوداګريز مرکزونه تړلي وي.
د چک جمهوريت د کرونا ويروس له ويرې اوس پر عمومي يا ملي قرنطين فکر کوي. د اکتوبر له پنځمې د ماسکونو اغوستل جبري شوي، په غونډو کې بايد له لسو کسانو ډير اشتراک و نه کړي. مغازو ته هم امر شوی دی چې د ځوانانو د راټوليدو د مخنیوی له پاره دې د وایفای خدمات بند کړي.
د هسپانيا کابينې د کرونا د مثبتو پيښو له ډيريدو سره د مقابلې له پاره، په پلازمينه مادرید کې ۱۵ ورځنی بيړنی حالت وضع کړی. دغه اقدام حکومت ته فرصت ورکړ چې د ټول هيواد په سطحه قرنطين عملي کړي چې دغه کار اعتراضونه هم له ځانه سره لرل. دغه حالت وروسته له هغې وضع شو چې د مادريد سيمه ایز حکومت د ټول هيواد په سطحه د ملي قرنطين غوښتنه رد کړه.
په پاريس کې د کرونا د مثتبو پيښو په بيا ډيريدو سره بارونه په خپل حال تړلي پاتې شول. فرانسې یوازې د يکشنبې په ورځ د کرونا نژدې ۲۷ زره نوې مثبتې پيښې اعلان کړې. دا په دغه هیواد کې د کرونا ناروغۍ د خپريدو له پيله تر اوسه، په يوه ورځ کې تر ټولو ډيرې مثبتې پيښې دي.
پولند کې هم د کرونا پيښې له سره ډيري شوي، خو ښوونځي لا هم خلاص دي. خو نوي ټولنيز محدوديتونه پکې لګول شوي دي. د بيلګې په توګه د هغو کسانو له پاره چې عمرونه يې د ۶۰ او ۶۵ کلونو تر منځ دي، د هغوی له پاره د سهار له لسو بجو تر غرمې پورې ځانګړي دوکانونه خلاص وي. د ماسکونو اغوستل د ټولو له پاره اجباري شوي دي. پولند له ۳۸ ميلیونه نفوس سره د کرونا څه باندې ۱۲۰ زره مثبتې پيښې لري چې ۲۹۷۲ کسان يې مړه دي.
سلواکیا د اکتوبر له ۱۳مې نېټې څخه امر کړی دی چې په غونډو کې باید تر شپږو کسانو ډير نه وي. د کورنيو غړي استثنا دي. د ماسکونو اغوستل اجباري دي او د هر ډول ټولنيزو مناسبتونو لمانځل، په کلیساو کې د مذهبي مراسمو په ګډون، ممنوع دي. ورزشي کلپونه تړل شوي او رستورانټونو ته اجازه نه لري چې دننه مشتريانو ته ډوډۍ ورکړي. دغه انځور د سپتمبر ۳۰مې دی چې پکې د هاکي لوبې مينه وال د اعتراض پر مهال ليدل کيږي.
د انګلستان حکومت، د کرونا د خطر له مخې، ټول هيواد په درو درجو «متوسط»، «لوړ» او «ډير لوړ» ويشلی دی. حکومت په دې اړه خلکو ته يو «درې درجه يي» سیستم معرفي کړی دی. د دغه سیستم له مخې، ليورپول او شمال لوېديځ اينګلند په «ډيره لوړه درجه» خطرناک ځایونو کې راځي. په دغو ښارونو کې به محدودیتونه ډير شي، لکه د ورزشي کلپونو، شرابخانو او قیمارخانو په څير ځایونو بندول.
