د آلمان د کورنيو چارو وزارت په يوه اعلامیه کې ويلي دي چې پر «هامبورګ اسلامي مرکز» يا «آی زيد اچ» د «اساسي قانون ضد کړنو» او «حزب الله ترهګرۍ ډلې د ملاتړ» شک کیږي.
په اعلاميه کې زياته شوې ده چې د تلاښيو په ترڅ کې څوک نیول شوي نه دي او د دې شک په تړاو د ډاډمنو شواهد ترلاسه کولو په موخه ترسره شوي چې د هامبورګ مرکز او شريکې ډلې یې د حزب الله له فعالانو څخه ملاتړ کوي.
په ۲۰۲۰م کال کې آلمان د حزب الله ډله د يوه ترهګریز سازمان په توګه درجه بندي کړه او په آلمان کې یې پر فعاليت بندیز وضع شو.
آلماني سياستوالو څه ويلي ؟
د آلمان د کورنیو چارو وزیرې نينسي فېزر چې د آلمان د سوسيال ډیموکرات ګوند سره تړاو لري، ويلي دي چې د هامبورګ اسلامي مرکز له ډېرې مودې راهېسې د آلمان د استخباراتي ادارې تر څار لاندې وو او د يوه «اسلامستي» سازمان په توګه درجه بندي شوی دی.
هغې وويل: «په ځانګړي توګه په داسې يوه وخت کې چې ډېر يهودان ځانونه په خاصه توګه تر ګواښ لاندې احساسوي، مهمه ده چې وويل شي: موږ به اسلامستي پروپاګند او يا يهود او اسرائيل ضد پارونه ونه زغموو.»
فېزر په خپلو خبرو کې زياته کړه: «اوس په ځانګړي ډول د تیارسۍ اوسيدو او کلک چلن کولو وخت دی. همدا وجه ده چې موږ هر معقول شک په جدي توګه تعقيبوو.»
د آلمان د سوسيال ديموکرات ګوند سياستوال اندي ګروټه چې د هامبورګ د کورنیو چارو سناتور هم دی، دا تلاښۍ پر دغه مرکز يو «کلک ګوزار» وباله چې په خبره یې د هغه «وخت اوس ختم شوی دی.»
هغه وویل: «څومره ژر چې آي زيد اچ له هامبورګ څخه ورک شي، هومره ښه ده. او نن موږ دغه ستر کار ته ډېر نېږدې شوي يو.»
ګروټه وويل چې په هامبورګ کې استخباراتي ادارو د دغه مرکز د «افراطي تمايلاتو» په اړه له اوږدې مودې راهېسې خبرداري ورکاوه او «فشار یې پرې اچولی وو.»
نوموړي زياته کړه: «زه خوښ يم چې د کورنيو چارو فدرالي حکومت [پر دغه مرکز] د بندیز لګولو له پاره فشار راوړي. زه ډاډه يم چې دا پروسه به بشپړه توګه نتیجې ته ورسيږي او آي زيد اچ به ژر وتړل شي.»
د هامبورګ اسلامی مرکز څه شی دی؟
سيمه ایزه استخباراتي اداره په دې آند ده چې د هامبورګ اسلامي مرکز په آلمان کې د ایران د رژيم يوه آله يا را اوږد شوی لاس ګڼل کيږي او پر يو شمير مسجدونو او ټولنو ډېر نفوذ لري او يا حتی کنترولوي یې.
له دې مسجدونو څخه يو په هامبورګ کې د امام علي جومات دی چې د آبي مسجد په نوم مشهور دی.
دا مرکز په ۱۹۵۳م کال کې د ایراني کډوالو له خوا تاسيس شوی وو. د کورنيو چارو وزارت په حواله یې د فعاليتونو موخه د ايراني انقلابي نظرياتو خپرول دي.
ب. ص/ ن. ز (dpa,ap. Reuters)
زموږ له آرشيف څخه:
په آلمان کي د افراطي مسلمانانو له خوا د «شریعت پولیسو» جوړول
په آلمان کې یو شمیر سلفي مسلمانانو داسي کمیسان اغوستي ول چې ورباندې د Sharia Police یا د شریعت پولیس عبارت لیکل شوی وو. هغوی د آلمان په اوپرتال ښار کې گرځیدل او په خپله خبره یې ځوانان اسلام ته دعوتول.
انځور: Shariah-Polizei-Germany/Facebook
یو شمیر افراطي سلفي مسلمانانو د آلمان په اوپرتال ښار کې د شپې له خوا تگ راتگ کاوه او په خپله خبره يې ځوانان اسلام ته رابلل. هغوی د نارنجي رنگ کمیسانو په اغوستلو سره ځان پولیسو ته ورته کاوه. دا کار د آلمان د پولیسو له پاره د منلو وړ نه وو.
انځور: Shariah-Polizei-Germany/Facebook
د هغوی پر کمیسانو باندي د Sharia Police عبارت لیکل شوی وو. هغوی د شپې له خوا ځوانان درول او د اسلام په اړه يې معلومات ورکول.
انځور: Shariah-Polizei-Germany/Facebook
د بېلگې په توگه دغه کسان د شپې له خوا ځوانان دروي او ورته دیسکو ته د نه تلو سپارښتنه کوي. پر دې سربیره دغه سلفیان پلورنځایونو ته ننوتلي ول او پیریدونکو ته یې په خپله خبره اسلامي قوانین تشریح کړي ول.
انځور: Shariah-Polizei-Germany/Facebook
دغو کسانو د خپلو فعالیتونو په اړه په انترنت کې یوه لنډه ویدیو خپره کړې ده. دغه افراطي وگړي د ۱۹ او ۳۳ کلونو تر منځ عمر لري.
انځور: Shariah-Polizei-Germany/Facebook
دغې ډلې د خپلو فعالیتونو انځورونه هم خپاره کړي دي.
انځور: picture-alliance/dpa/O. Berg
د آلمان د اوپرتال پولیسو د ښار په مرکز کې خپل حضور ډیر کړی دی او پر خلکو یې غږ کړی دی چې د شکمنو کسانو د لیدو په صورت کې پولیسو ته خبر ورکړي.
انځور: picture-alliance/dpa/ W.Steinberg
د اوپرتال د پولیسو مشر ویلي دي: «په آلمان کې واک یوازي د دولت په لاس کې دی. د خلکو ویرول او هڅول د تحمل وړ نه دي.»
انځور: picture-alliance/dpa/B.Roessler
د آلمان د کورنیو چارو وزیز توماس دمزیر، هم په دې اړه غبرگون ښوولی وو. هغه ویلي ول: «د آلمان په خاوره کې شریعت د منلو وړ نه دی. هیڅوک د دې حق نه لري چې د آلمان د پولیسو له نوم څخه ناوړه گټه پورته کړي.»
انځور: picture-alliance/dpa/B.Roessler
په عین حال کې آلماني سیاستوالو پر دې باندي ټینگار کړی دی چې د قانون پلي کول یوازي د حکومت په واک کې دي.
انځور: picture-alliance/dpa/B.Roessler
د اوپرتال ښار په آلمان کې د سلفیانو مرکز بلل کیږي. د آلمان په نورد راین ویستفالن ایالت کې د سلفیانو شمیر ۱۸۰۰ تنو ته رسیږي.
انځور: picture-alliance/dpa
سلفیانو هغه مهال اعلان کړی وو چې د اوپرتال په څیر عملیات به د آلمان په نورو ښارونو کې هم ترسره کړي.
انځور: picture-alliance/dpa
د آلمان د اساسي قانون د ملاتړ فدرالې ادارې مشر گئورگ ماسن، له بیلد ورځپاڼي سره په مرکه کې ویلي ول چې سلفیان له ځانه سره د داسي شعارونو د لېږدولو حق نه لري چې د نورو پر وړاندې نفرت خپور کړي.
انځور: picture-alliance/dpa
ویل کیږي چې آلماني پولیس له ډیري مودې راهیسې سلفیان تر نظر لاندي لري.
انځور: picture-alliance/dpa/ W.Steinberg
له بلي خوا یو شمیر افراطي آلماني مسلمانان لا وختي سوریې ته د تندلارو اسلامپالو ډلو تر څنگ د جگړې په موخه تللي دي.
انځور: dapd
په آلمان کې اوس د هغو کسانو د برخلیک په اړه خبري رواني دي چې د سوریې له جگړې څخه بیرته دې هیواد ته راستنیږي.
