په برلین کې د آلمان د بهرنیو چارو د وزارت یوه ویاند  د جمعې په ورځ (۲۰۲۵ م کال د اکتوبر ۱۷ مه) اعلان وکړ چې د سیمه ییزو کارمندانو له پروگرام  څخه ۱۸ کسان او د آلمان له خوا د منلو د پروگرام په چوکاټ کې شامل دوه تنه پردې توانیدلي چې بيرته پاکستان ته ننوځي.

پاکستان څو اونۍ مخکې د ښځو او نارینه وو په گډون شاوخوا ۲۵۰ تنه هغه افغانان چې د آلمان له خوا یې د منلو ژمنې درلودې، خپل ټاټوبي ته اخراج کړي وو.

اړوند:د بشري حقونو استازی: افغانان په بیړه ویزې ته اړتیا لري

په اوس وخت کې لا شاوخوا، ۱۹۰۰ افغانان په پاکستان کې په دې تمه دي چې آلمان د هغوی د منلو په اړه خپله ژمنه پوره کړي.

په دغو کسانو کې د آلماني پوځ او یا هم نورو آلماني بنسټونو پخواني ځايي کارکوونکي شاملیږي چې په افغانستان کې یې کار کاوه او یا هم د یوه ډیموکراټیک هیواد د بیارغونې له پاره د خپلو فعالیتونو له امله نن ورځ د طالبانو له تعقیب او ځورونې څخه په بیره کې دي. 

د آلمان پخواني حکومت هغوی ته د حفاظت ژمنه ورکړې وه او د منلو ډیری پروگرامونه یې پر لارې اچولي ول.

اړوند:په جرمني کي د افغانانو د منلو پروگرام برخلیک لا معلوم نه دی

خو د مسیحي سوسیال او مسیحي ډیموکراټ  CDU/CSU او سوسیال ډیموکراټ SPD گوندونو څخه جوړ نوي ایتلاف دغه پروگرامونه تر پوښتنې لاندې راوستل، له افغانستان څخه یې د خلکو د منلو مخه ونیوله، او د ژمنو د پابندۍ پر ماهیت یې شک وښود. یوازې د اداري محکمې د وروستیو پریکړو پر بنسټ په وروستیو اونیو کې تقریباً ۸۰  کسانو ته اجازه ورکړل سوه چې آلمان ته ننوځي.

له سوسیال مسیحي گوند CSU څخه د  آلمان د کورنیو چارو وزیر، الکساندر دوبرینت، د نوموړي وزارت په حواله په اوس وخت کې په جلا توگه د هرې قضیې د څېړلو په حال کې دی. په دې ترڅ کې پر هغو کسانو دایره راتنګيږي چې آلمان ته د راتګ په انتظار دي. پاکستان د روان کال په دوبي کې په دې پیل وکړ چې افغانان اخراج کړي او په دې اړه یې هغه کسان هم له پامه وغورځول چې د آلمان له خوا یې د منلو ژمنې درلودې. د آلمان د بهرنیو چارو وزارت د معلوماتو له مخې به د روان ميلادي  کال تر پایه پورې د هغوی قضیې بلاخره وڅېړل سي.