د آلمان د کورنيو چارو وزارت د سه شنبې په ورځ اعلان وکړ چي يوه بله ډله افغانان (۲۲ کسان) يې په يوه چارتر الوتکه کي افغانستان ته اخراج کړل. ياد وزارت ويلي دي چي دغو ټولو کسانو په آلمان کي جرمي سابقه درلوده.

د ياد وزارت په وینا، د هغوی د اخراج بهیر د افغانستان پلازمېني کابل ته د یوې چارټر الوتکې په واسطه ترسره او «په بریالیتوب سره پای ته ورسېد.»

په دې توګه، د آلمان د اوسني ایتلافي حکومت له واک ته رسېدو راهیسي خپل هيواد ته د اخراج سویو افغانانو ټول شمېر ۲۵۰ کسانو ته رسېدلی دی. تر دې مخکي د اخراج پرواز د اګست مياشتي پر ۲۵مه وو.

د آلمان د کورنیو چارو وزارت یوه ویاند د هغو کسانو د جرمونو لیست وړاندې کړ چي د سې شنبې په ورځ له دغه هيواده اخراج سول. په دغو جرمونو کي قتل، د قتل هڅه، غلا، مسلکي غلا، په زور سره د پیسو یا امتیازاتو اخیستل، سخته بدني صدمه او په قصدي توګه د اور لګولو جدي پېښې شاملې دي.

د جون مياشتي په نیمایي کي د آلمان د کورنیو چارو وزارت اعلان وکړ چي غواړي د افغان مجرمینو د اخراج لړۍ پراخه کړي. په هغه وخت کي ویل سوي ول چي په راتلونکي کي به په میاشت کي درې چارتر پروازونه ممکن وي. د راپورونو له مخي د طالبانو ادارې له آلمان څخه د افغانانو د بېرته راستنېدو په اړه «په اصولو کي» هوکړه کړې ده.

د آلمان حکومت په دوامداره توګه ټینګار کړی دی چي له طالبانو سره اړیکې په «تخنیکي کچه» دي او د طالبانو اداره د افغانستان د حکومت په توګه په رسميت نه پیژني.

د اخراج لړۍ پراخول، د آلمان د مسیحي او سوسيال دیموکرات ګوندونو له خوا جوړ سوي ایتلافي حکومت له اعلان سویو موخو څخه يوه ده.