د سیمې د اړونده چارواکو د وینا له مخې په کمپ کې په ټوله کې ۳۰۰ کسان معاینه شوي دي. زیاته شوې ده چې له دغې ډلې یې ۷۰ تنه د کرونا په ویروس اخته ول چې اوس په یوه تجرید شوې برخه کې ساتل کیږي. د نورو کسانو د معاینې نتیجې ته انتظار کیږي.
د ځایي چارواکو په وینا په دغه کمپ کې په کرونا ویروس د اخته کسانو زیات یې د دغې ناروغۍ سخت علایم نه لري. دا چې په کمپ کې کارکوونکي او همداشان د امنیت له پاره مؤظف کسان هم په دغه ویروس اخته شوي، لا معلومه نه ده. زیاته شوې ده چې ۶۰ کسان چې د کرونا ویروس د معایناتو نتیجه یې منفي وه نورو ځایونو ته انتقال شوي دي.
په دغه کمپ کې د ۶۰۰ کسانو د ځایدو ظرفیت شته، چې شا او خوا ۵۰۰ کسان پکې اوسیدل. د سانکت اوګستین د مهاجرو کمپ په نورد راین ویستفالن ایالت کې پر نورو کمپونو د مهاجرو د ویشلو اصلي مرکز دی.
د مهاجرو تر ثبتیدو وروسته پر نورو کمپونو تر ویشل کیدو دمخه هغوی معمولا یوه اوونۍ په دغه کمپ کې پاتېږي. د کمپ زیاتره اوسیدونکي ځوانان دي خو کورنۍ هم دغلته اوسیږي.
د آلمان زرغون ګوند له لوري انتقاد شوی دی. د دغه ګوند د نورد راین ویستفالن د پارلمان غړي هورست بېکر د «کولنر شتات انڅایګر» ورځپاڼې سره په خبرو کې ویلي دي: «موږ څو وارې دا غوښتنه کړې وه، چې په کمپ کې د [کرونا ټېسټ] ترسره شي.» د هغه په خبره دا ښیې چې دغه چاره ډیره ناوخته ترسره شوې ده.
ورته پيښې
تر دې دمخه هم د نورد راین ویستفالن ایالت په اویز کېرشن او مېتمن کې دغه ډول پيښې رامنځ ته شوي دي. په اویزکېرشن کې د مهاجرو په یوه کمپ کې تر۵۰ زیاتو کسانو د کرونا ویروس د ټېسټ پایله مثبته ختلې وه او دوسلدورف ته څیرمه په مېتمن کې هم د مهاجرو په یوه استوګنځای کې تر ۳۰ زیات کسان د کرونا ویروس په دغه نوي ډول باندې اخته شوي ول.
په تیرو وختونو کې د آلمان ایالتونو هڅه وکړه چې د ټېسټونو، قرنطین، د پاکۍ د سختو قوانینو او په ډله ایز شکل د خلکو پر راټولیدو باندې پر بندیز لګولو سره د دغه ویروس د خپریدو مخه ونیسي. پر دې سربیره په کمپونو کې د ماشومانو په ډله ایز شکل د تدریس لړۍ دریدلې ده. همداشان دا هڅه هم شوې ده چې په کمپونو کې اوسیدونکو کسانو ته د دغه ویروس د خپریدو د خطر په اړه په بیلا بیلو ژبو کې معلومات ورکړل شي.
زموږ له آرشیف څخه:
د کرونا بحران: ایا روبوټونه د انساني قوې ځای نیسي؟
د هغه راهیسي ، چي د کرونا ویروس په ټوله نړۍ کي شیوع سوی، په ډیرو هیوادونو کي د انساني قوې په عوض د روبوټونو څخه استفاده کیږي. په دغه انځوریز البوم کي وینئ، چي روبوټونه د نڅا د معلم، نرس او حتی پولیس په حیث کار کوي.
انځور: Reuters/China Dailyچین، چي د کرونا ویروس د شیوع منبع بلل کیږي، په پایتخت پیکینګ کي يې د روبوټونو یو »پنځم نسل« اماده کیږي، چي احتمالأ به د نڅا د معلم ځای ونیسي.
د جاپان په پایتخت ټوکیو کي رسنیو ته یو ربوټ ورښکاره کیږي، چي په روغتون کي په کرونا د اخته کسانو د مربوطه څانګي مسؤلیت پرغاړه لري. دغه روبوټ ، چي »پیپر« نومیږي، هغو مریضانو ته چي د کرونا لږ علایم لري، صحي توصیې هم ورکوي.
په ایټالیا کي بیا دغه روبوټ حداقل د انساني قوې ځای نه دی نیولی، بلکه د نرسانو کمبود یې پوره کړی دی. دغه روبوټ د ایټالیا د یوې شفاخانې د صحي پرسونل سره کومک کوي، چي د کرونا مریضانو ته رسیدګي وکړي.
دغه ربوټ د جرمني د آیزنبِرګ د ښار په یوه روغتون کي د ډاکټرانو سره په جراحي عملیاتو کي کومک کړی دی. په جرمني کي هم، چي صحي بخش یې د انساني قوې د کمبود سره مخامخ دی، کوښښ کیږي، چي ځیني کارونه روبوتونو ته وسپارل سي.
د کرونا د بحران پر وخت لږ کسان کولای سي د زړو خلګو احوال واخلي. دغه زاړه کسان ، چي په کرونا د اخته کیدو خطر یې ډیر دی، دزړو په لیلیو او یا خپلو کورونو کي ډیر یوازي او منزوی سوي دي. په بلجیم کي دغه روبوټ د زړو خلګو سره د ارتباط پخاطر جوړ سوی دی.
د هغه ځایه څخه چي چینايي محصلین نسي کولای د خپل فراغت په مراسمو او میله کي برخه واخلي، دغه روبوټونه چي »نیومي« یا »زه نوی« نوم لري، د هغوی څخه نمایندګي کوي.
په هندوستان کي دغه روبوټ د ضد عفوني موادو د یوې ادارې مراجعینو ته ښه راغلاست وايي، او هغوی ته د کرونا په ویروس د اخته کیدو صحي مشورې هم ورکوي.
د چین په پایتخت پیکینګ کي دغه روبوټ د پوسته رسان وظیفه پرغاړه اخیستې ،پارسلونه او پاکټونه سره ځای پرځای کوي.
اندونیزیا پولیس هغو کسانو ته چي د کرونا د قیوداتو څخه سرغړونه کوي، د هغوی د کنټرول او خبرداري پخاطر ددغه «کواد کوپتر« څخه استفاده کوي. د جرمني په ځینو ښارونو، لکه دوسلدورف کي هم دغه ډول عملیات تر سره سوي دي، چي دخلګو د مخالفتونو سره مخامخ سوي دي. په چیلي کي هم کواد کوپتر د انسانانو د اجتماعي رفتار نظارت او کنټرول پرغاړه لري.
د تونس په پایتخت کي د پولیسو یو روبوټ د کرونا دویروس د قیوداتو څخه د سرغړوني کنټرول او نظارت کوي.
ددغه سپي ډوله روبوټ نوم»اسپات« دی او ددغه هیواد په یوه پارک کي خلګو ته خبرداری ورکوي، چي د کرونا پخاطر وضع سوې معینه فاصله مراعت کړي.
د افغانستان په یوه رستورانت کي هم د ګارسون په عوض د روبوټ څخه کار اخیستل کیږي. البته دغه عکس د کرونا ویروس تر شیوع دمخه اخیستل سوی دی.
په فرانسه کي هم ددغه روبوټ څخه د کرونا ویروس په سبب مړو سوو کسانو د تابوتونو د جوړولو، ضدعفوني کولو او رنګولو کي استفاده کیږي.
