دا خبرونو له هغه وروسته خپاره شوي چې د چهارشنبې په ورځ (۲۰۲۴م کال د جنورۍ ۱۷) د طالبانو د ترانسپورت او هوایي چلند وزیر حمیدالله اخوندزاده په کابل کې د ترکیې له شارژدافیر جنک اونال، سره وليدل.

د افغانستان ځينو محلي رسنیو او د طالبانو د هوایي چلند ادارې دا خبر تائید کړی دی، خو په کابل کې د ترکیې شارژدافیر جنک اونال تر اوسه په دې اړه څه نه دي ویلي.

اونال پر خپله ایکس یا ټویټر پاڼه د طالبانو د ترانسپورت او هوایي چلند له وزیر حمیدالله اخوندزاده سره د لیدنې په اړه خبر ورکړی دی.

دوی همدا راز ویلي چې د طالبانو د ترانسپورت او هوایي چلند له وزیر حمیدالله اخوندزاده سره په کتنه کې یې د ترانسپورتي اړیکو پر پیاوړتیا خبرې کړي دي، خو د ترکیش ایرلاينز د الوتنو بیا پیل په اړه یې وضاحت نه دی ورکړی.

د یادونې وړ ده چې په افغانستان کې د طالبانو له بيا واک ته رسېدو سره سم ټولو بهرنیو هوایي شرکتونو خپلې الوتنې وځنډولې چې په دې وروستیو کې فلای دوبی او ایر عربیه هوایي شرکتونو کابل ته له څه باندې دوه کلن ځنډ وروسته له سره الوتنې پيل کړې.