آيا د آلمان په هوايي ډګرونو کي به د کرونا تيست اجباري سي؟
۱۳۹۹ مرداد ۲, پنجشنبه
امکان لري په آلمان کي هغه مسافر د کرونا تيست کولو ته مجبور سي چي له نورو هغو هيوادونو څخه راځي چي پکښي د کوويد ۱۹ ناروغي د اخته کيدو خطر ډير دی. خو دغه پريکړه لا تر اوسه په رسمي توګه نه ده تصويب سوې.
انځور: picture-alliance/dpa/B. Pedersen
اعلان
د آلمان د روغتيا وزير ينس شپان او ددغه هيواد په ۱۶ ايالتونو کي د هغه همکارانو د چهارشنبې په ورځ په دې اړه يوه توافق ته سره رسيدلي، څو هغه مسافر په هوايي ډگرونو کي تيست کړي چي له نورو هغو هيوادونو څخه چي د کرونا پيښي پکښې ډيري دي جرمني ته راځي.
د نوي وړانديز پر اساس هغه کسان چي له هغو هيوادونو څخه آلمان ته راځي چي پکښي د کرونا په ويروس د اخته کيدو خطر لږ دی، تیست کولو ته مجبور نه دي. په دغه ډله کي د فرانسې، هسپانيا او يونان هيوادونه شامليږي. د آلمان د روغتيا وزارت نوموړې پريکړه لا په رسمي ډول نه ده تائيد سوې او په دې اړه خبري اتري به د جمعې په ورځ هم ادامه پيدا کړي.
رابرت کوخ انستيتوت چي د کرونا د کنترول او د هغې په نتيجه کي ناروغۍ د مخنيوي مسئوليت پر غاړه لري، په بهرنيو هيوادونو کي د کرونا په ويروس باندي د اخته کيدو خطر ډير لوړ بولي. دغه قانون به د تائيد په صورت کي پر هغو آلمانانو هم تطبيق سي چي له رخصتيو تيرولو وروسته به راستنيږي.
د دغه وړانديز په اړه د جرمني هوايي ډګرونو انديښنه ښودلې او وايي چي د هغوی له کارکوونکو څخه بايد د کرونا د آزمويلو له پاره کار وانه خيستل سي، بلکي مسئول مقامات بايد په هوايي ډګرونو کي د هغه د سرته رسولو شرايط برابر کړي.
د آلمان د هوايي ډګرونو په وينا پاڼه کي راغلي دي: «که د روغتيايي چارو چارواکي د يوې سمدستي آزمويني سپارښتنه وکړي په دې صورت کي به مسئول مقامات د هغه د سرته رسولو له پاره شرايط آماده کړي.» ددغي وينا په ادامه راغلي: «بايد دا هم مشخص سي، له هغو مسافرو سره چي د آزموينو نتيجه يې مثبت وي، څه ډول چلند کيږي.»
تر اوسه پوري دغه ډول مسافرين چي د کرونا له بحراني هيوادونو څخه راغلي، ۱۴ ورځني قرانطين ته مجبوريږي.
د بايرن ايالت صدراعطم مارکووس زودنر د يکشنبې په ورځ وويل چي د دغه ايالت مسوولين په هوايي ډګرونو کي د آزمويلو د مرکزونو جوړولو له پاره هلي ځلي کوي. او په دغو مرکزونو کي به د کرونا آزموينه په وړيا ډول او د ورځي په هر ساعت کي ترسره سي.
په اروپايي هيوادونو کي د کرونا وبا د پيښیو په لږېدو سره په ډيرو اروپايي هيوادونو کي د مسافرو محدوديتونه راکم سول او د آلمان زياترو اتباعو د رخصتي تيرولو له پاره د خپلي خوښي وړ هيوادونو ته سفرونه پيل کړل.
د هسپانيا د مايورکا په جزيره کي د ميلو جوړولو په اړه رپوټونه د ځينو سياستوالو د انديښنې وړ وګرځيدل. ويل کيږي چي په دغو ميلو کي ټولنيز واټن نه مراعاتيږي او هيڅوک ماسک نه تړي. دغه ټاپو په تيره بيا په آلمانانو کي ډير محبوبيت لري.
زموږ له آرشیف څخه:
کرونا؛ د هوايي شرکتونو راتلونکی به څنګه وي؟
د کرونا بحران پر هوايي شرکتونو ډېر ناوړه اغیز کړی دی. د آلمان هوايي شرکت لوفتانزا سره دولت مرسته کوي خو منتقدين پرې خوښ نه دي. خو دمګړۍ د ټولې نړۍ هوايي شرکتونه د حکومتي مرسته په لټه کې دي.
انځور: AP
مرسته په مو کار ده، مداخله نه!
د آلمان حکومت د لوفتانزا هوايي شرکت سره د نهو ميلياردو يورو مرسته کوي. تر دې مرستې وروسته به حکومت د لوفتانزا شرکت د ۲۰ فيصده ونډو مالک وي او دا فيصدي لوړيدی هم شي. د آلمان د اقتصاد وزير پيټر آلتماير روښانه کړې چې له مالي مرستې سره به هم حکومت د شرکت په داخلي پريکړو کې مداخلت نه کوي.
انځور: picture-alliance/dpa/A. Dedert
د سمارت يا ځيرک ونګز ځيرک تړون
د چيک جمهوريت حکومت غواړي چې د چيک هوايي شرکت د سمارت ونګز پر څانګه خپل کنترول ډېر کړي. د چيک جمهوريت د صنعت وزير ويلي چې حکومت د سمارت ونګز بشپړ کنترول په لاس کې اخيستلی شي. خو بل لوري ته د دې شرکت مشر روښانه کړې چې هغه د کرونا بحران په ترڅ کې يوازې د مرستې غوښتونکی دی او نور څه نه غواړي.
انځور: picture-alliance/dpa
لا ډېرې دولتي مرستې ته اړتيا!
د پرتګال ملي هوايي شرکت «ټي پي ای» د خپلې بقا له پاره غواړي چې له حکومته پور واخلي. خو کارکوونکي یې پر مالي مرستو سربيره د لا زيات حکومتي کنترول غوښتونکي هم دي. لومړي وزير د دغه شرکت د دولتي کولو خبره هم کړې ده. حکومت لا دمخه د دې شرکت ۵۰ فيصده ونډې لري.
انځور: picture alliance/M. Mainka
مرستو ته شديده اړتيا
د ناروې د «نارويجين» په نوم ارزان بيه هوايي شرکت په اصطلاح د دولتي مرستو پر مټ په هوا کې دی. د کمپنۍ په جوړښت کې تر تغیراتو وروسته ورسره حکومت د مرستو اعلان وکړ.
انځور: picture-alliance/dpa/M. Mainka
کابو ۵۰ کاله وروسته لومړی تاوان
د سنګاپور هوايي شرکت په خپل ۴۸ کلن تاريخ کې په لومړي ځل روانه اوونۍ د تاوان خبره وکړه ځکه د کرونا د وبا له کبله يې زیاتره الوتکې پروازونه نه کوي. د دې هوايي شرکت ډېره برخه د حکومت تر کنترول لاندې ده خو حکومت ته دا مهمه ده چې شرکت په خپله اداره کې خپلواک وي.
انځور: Singapore Airlines
د خليج هوايي شرکتونه: دولتي مرستې، د تجارت بڼه!
د خليج د اماراتو، اتحاد او قطر دولتي هوايي شرکتونو ته یې سيالان لا له ډېرې اوږدې مودې راهيسې تنقيدي کتنه کوي. نور هوايي شرکتونه ادعا کوي چې د خليج د سيمې دغه درې هوايي شرکتونه د نامحدودو دولتي مرستو په ترلاسه کولو سره غير عادلانه ګټې په لاس راوړي او په دې توګه نور هوايي شرکتونه څنډې ته کوي. خو د کرونا بحران پر دغه شرکتونو هم سيوری غوړولی دی.
انځور: C. Furlong/Getty Images
دولتي کنترول د يورو فلات له پاره نوې خبره نه ده
د ایروفلوت ډله چې د يورو فلایت روسيه او پوبيدا هوايي شرکتونه هم پکې شامل دي، د هغو شرکتونو يو بل مثال دی چې په دولتي مرستو پايي. د دې شرکت ۵۱ فيصده برخه د روسیې په حکومت پورې اړه لري. د ويکيپيديا په حواله د نړۍ کابو ۱۵۰ د هوايي شرکتونو زیاتره برخه په دولتونو پورې تړاو لري. په ټوله نړۍ کې کابو ۵۰۰۰ هوايي شرکتونه موجود دي.
