آیا د طالبانو او پاکستان ترمنځ اوربند به ادامه پیدا کړي؟
۱۴۰۴ مهر ۲۸, دوشنبه
د طالبانو او پاکستان چارواکو د یکشنبې په ورځ (۲۰۲۵م کال د اکتوبر ۱۹) د ترکیې او قطر په منځگړیتوب په دوحه کې پر یوه اوربند توافق وکړ، ترڅو د دواړو خواوو له خوا ستونزې د خبرو اترو له لارې حل سي.
د طالبانو د ادارې د دفاع وزیر ملا محمد یعقوب مجاهد،چې د دغو مذاکراتو مشري یې پرغاړه درلوده، د آنلاین په یوې خبرې ناسته کې له پاکستان سره دغه خبرې اترې او د اورنبد اعلان « بریالي»وبلل.
نوموړي د خپلو خبرو په یوې برخه کې وویل:«فکر کوم زموږ مذاکرت بریالي ول او یو بشپړ اوربند اعلان سو او هوکړه وسوه چې دغه توافق به دوامداره وي.»
اړوند:طالبانو او پاکستان د قطر په منځګړیتوب پر اوربند توافق کړی
د طالبانو د دفاع وزیر د دغې پوښتنې په جواب کې چې د پاکستان له خوا د اوربند د دغه توافق د سرغړونې په صورت کې به څه ډول اقدام وسي، وویل: «کله چې پاکستانیان دغه توافق ته ژمن پاته نه سي، موږ به د خپلې خاورې او خلکو دفاع وکړو او په دې برخه کې به هیڅ ډول ځنډ ونکړو.»
د طالبانو د دفاع وزیر همدارنگه زیاته کړه چې هیڅکله به اجازه ورنکړو چې د افغانستان له خاورې څخه د یوه بل هیواد پر ضد کار واخیستل سي: «بلاخره دې نتیجې ته ورسیدو چې هر هیواد یوه بل هیواد ته درناوی وکړي، د مقابل طرف له حقونو څخه سرغړونه ونه کړي، یو د بل پر وړاندې له دښمنانانه اقداماتو څخه ملاتړ ونکړي او هیڅ خوا او ډله به د دې اجازه ونه لري چې د کوم بل هیواد امنیت ته گواښ او یا هم پر هغه برید وکړي.»
د پاکستان د دفاع وزیر خواجه آصف، ویلي دي چې په دې توافق سره به "د پاکستان له خاورې څخه د پولې هاخوا ترهگري سمدلاسه ودرول سي. دواړه گاونډي هېوادونه د یو بل د حاکمیت او مځکنۍ بشپړتیا درناوی کوي."
د سعودي عربستان هرکلی
د دواړو هیوادونو چارواکو د هغو مذاکراتو په آسانتیاوو کې د قطر او ترکیې د نقش هرکلی وکړ چي د اوربند د رامنځته کیدو سبب سول.
سعودي عربستان هم د طالبانو او پاکستان ترمنځ د سمدستي اوربند په هکله توافق د لاسلیک کولو او د دواړو هیوادونو ترمنځ د دوامدارې سولې او ثبات د ټینگولو له پاره د میکانیزمونو له جوړولو هرکلی کړی دی.
نوموړي هیواد ویلي دي چې هیله مند دی دغه مثبت گام د دواړو هیوادونو ترمنځ د تاوتریخوالو د پای ته رسیدو سبب سي.
په څه د پاسه تیره یوه اونۍ کې، افغانستان او پاکستان د سرحدي نښتو شاهدان وو چې په ۲۰۲۱م کال کې واک ته د طالبانو له رسیدو راهیسې تر ټولو سختې نښتې بلل کیږي.
«نښتو ته د لیوالتیا نه درلودل»
د آسیا د جنوب د چارو کارپوه، مایکل کوگلمن ویلي دي: "طالبان له داسې یوې پراخې جگړې سره لیوالتیا نه لري چې هغوی له یو ډیر لوړ پوځي ځواک سره مخامخ کړي."
په افغانستان کې واک ته د طالبانو په بیا رسیدو سره، پاکستان د پوځي ملیشو په بریدونو کې د پام وړ زیاتوالي شاهد وو چې په تیره بیا له افغانستان سره په ۲۶۰۰ کیلومتره سرحد کې رامنځته سوي دي.
شنونکي وايي چې په ۲۰۲۱م کال کې د امریکايي ځواکونو له وتلو وروسته د طالبانو بری، په پاکستان کې د اسلامپاله ډلو د زړه ورتیا سبب سوی دی.
پاکستان وايي چې پاکستاني ملیشې لکه تحریک طالبان پاکستان(ټی ټی پی) په افغانستان کې پټنځایونه لري او د دغه هیواد له خاورې څخه د پاکستان پرضد کاراخلي. خو د طالبانو ادارې تل دا موضوع رد کړې ده.