اکثره وخت زموږ پوست هغه لومړی نقطه ده چې موږ یې له لارې حالتونه درکوو او په وسيله یې له يو بل سره په تماس کې کیږو. څيړونکو موندلې ده چې انسان د لمس کولو له لاري ځيني احساسات لکه مینه، قار، قدرداني او کرکه حس کولی شي. له مثبت لمس کولو څخه ثابته شوې ده چې دا مقاومت له منځه وړي او ټولنیز مثبت چلن ته وده ورکوي. همدا راز لمس د انسانانو د احساساتي اړيکو په رامنځته کولو کې مرسته کوي.

لمس کول او يا تکتيکي ارتباط له يوې لوبډلې سره د همکارۍ او اعتماد په رامنځته کولو کې مرسته کوي. په يوه څېړنه کې خو آن موندل شوې ده چې د باسکټبال هغه لوبغاړي او لوبډلې چې د تمريني او نورو لوبو په ترڅ کې د تشويق په موخه او يا د خوښۍ په شيبو کې یو بل ته ورترغاړه وځي او يا پنجه ورکوي، وروسته په اصلي مسابقو کې ښه لوبه کوي.

ور ترغاړې وتل د مرستي نخښه ده چې ستريس يا عصبي فشار کموي. په غيږ کې نيول مرسته کوي چې تر یوې شخړې وروسته د انسان په زړه کې کرکه له منځه يوسي. يوې څېړني ښوولې ده چې هغه کسان چې د يوه جنجال د رامنځته کيدو په ورځ په غیږ کې نيول شوي ول، وروسته یې روحيه ښه شوې وه.

د ښځې او خاوند او يا ژوند د ملگرو ترمنځ تودې اړيکی، لاس په لاس کيدل او يو بل په غيږ کې نيول د زړه د عضلاتو پر روغتيا مثبت اغیز کوي او ستريس کمولی شي. د دې علت دادی چې مثبت جسمي سگنالونه د زړه د ضربان فريکوينسي ورو کوي، د کورتيزول په نوم د ستريس هارمون کموي او د وینې فشار ټيټوي.

د ډيوک پوهنتون د طبي مرکز څيړونکو موندلې ده چې د ټول بدن مالش د هغو ناروغانو دردونه آراموي او حرکت یې زياتوي چې په زنگونو کې arthritis يا د مفصلونو پاړسوب لري. همدا راز په ځينو نورو ناروغيو کې هم د مالش اغیزې جوتې دي. څيړونو موندلې ده چې نه یوازې د مالش، بلکې بل ته مساژ ورکول هم د انسان پر خپله روغتيا ښه اغیز کوي.

مالش په تر وخت دمخه زيږدلو ماشومانو کې د هغوی د وزن د زیاتېدو سبب کيږي. مالش د هغوی هاضمې سيستم ته وده ورکوي او د هغو هرمونو په خارجيدو کې مرسته کوي چې په بدن کې د خوراک د جذبيدو له پاره اړين دي. لمس کول او يا جسمي نزدې والې په دغه څير ماشومانو کې د کوچنيو جراحيو پر وخت د درد په کمولو کې هم مرسته کوي.

که څه هم چې سړی د لمس د گټو د ترلاسه کولو له پاره يوه تن ته اړتيا لري خو خپله د ځان مالش کول هم يو څه گټه لري. خو د دې مالش گټه هله ډيریدلی شي چې د يو څه زور په واسطه ترسره شي. يوگا او د جسمي نزدې والي بل ډول تمرينونه، هم ورته اغیزې درلودلی شي او عصبي فشار کمول شي.

د ژوند د ملگري يا ملگرې لاس په داسې حال کې نيول چې هغه له يوه درد څخه کړيږي، دواړو ته گټه رسوي. په لمس کولو سره مقابل لوری د درد د کميدو احساس کوي. دا ډول تماس کولی شي له هغو خلکو سره چې پر ځان ډېر متکي نه دی، د خود اعتمادۍ په پيدا کولو کې مرسته وکړي.

نن سبا د بدن د سنسور لرونکو مصنوعي غړيو په برخه کې دومره کار شوی دی چې هغه کسان چې د بدن کوم غړی یې پرې شوی وي، هم کولی شي د لمس له گټو برخمن شي. ثابته شوې چې د دغه ډول مصنوعي غړيو د کاروونکو فزيکي روغتيا وده کړې ده. د پوست د اليکترونيکي تکنالوژۍ د پرمختگ په موخه نورې څېړنې هم روانې دي، څو دغه مصنوعي غړي وکولی شي کلک او نرم شيان او يا گرمي احساس کړي.