آیا طالبان او افغان حکومت مستقيمې خبرې پیلوي؟
۱۳۹۸ مرداد ۶, یکشنبه![Katar Doha Afghanistan Friedensgespräche (picture-alliance/AP Photo/A. Zemlianichenko)](https://static.dw.com/image/49418811_800.webp)
په افغانستان کې د سولې د چارو له پاره د تازه جوړ شوي وزارت وزیر عبدالسلام رحیمي پرون د یکشنبې په ورځ (د ۲۰۱۹م کال د جولای میاشتې په ۲۷ نیټه) وویل چې ټاکل شوې په راتلونکو دوو اونیو کې د طالبانو او د افغان حکومت د استازو ترمنځ مستقیمي خبرې پیل شي.
دا په داسې حال کې ده چې د کابو یوه کال راهیسې طالبان له امریکايي چارواکو سره د افغان سولې په هکله خبرې او مذاکرات کوي او تل یې له افغان حکومت سره مستقیمې خبرې رد کړي دي. طالبان د افغانستان اوسنی حکومت د امریکا ګوډاګۍ اداره ګڼي.
د سولې په چارو کې د دولت وزیر، سلام رحیمي، په خپلو خبرو کې پرته له دې چې نور جزئیات وړاندې کړي، وویل چې د راتلونکو دوو اونیو په ترڅ کې به یو ۱۵ کسیز افغان پلاوی په یوه اروپايي هیواد کې مستقیمې خبرې وکړي.
په ورته وخت کې د افغان سولې له پاره د امریکا متحده ایالاتو ځانګړي استازي زلمی خلیلزاد چې اوسمهال په کابل کې دی، په یوه ټویټ کې ليکلي چې د بین الافغاني مذاکراتو بل پړاو به وروسته له هغې صورت ونیسي چې زموږ خپل [د امریکا او طالبانو ترمنځ] توافقات نهايي شو وي.»
خلیلزاد د طالبانو او افغان پلاوي د مستقیمو مذاکراتو په هکله وویل چې په دې کتنه کې به د طالبانو استازي او یو ملي مرکچي ټیم په خپلو کې سره وویني. د نوموړي په خبره د افغان پلاوي په تشکیل کې به جګپوړي دولتي چارواکي، د کلیدي سیاسي ډلو استازي، د مدني ټولنې او میرمنو استازي ګډون ولري.
طالبانو بیا د یوې اعلامیې له لارې له افغان حکومت سره مستقیمې خبرې پیلول رد کړي دي. د طالبانو یوه ویاند ذبیح الله مجاهد، په خپله ټویټر پاڼه کې لیکلي: «بین الافغاني مذاکرات به د ټولو سیاسي جهتونو له مشترک مذاکراتي ټیم سره وي، د کابل اداره به د حکومت په حیث نه بلکې د نورو سیاسي جهتونه په څیر یو جهت وي او دا کار به له امریکایانو سره د مهال ویش تر اعلان وروسته کیږي.»
افغان حکومت تل د افغانانو په مالکیت او مشرې د سولې پر خبرو ټینګار کړی، خو طالبانو تر اوسه پورې د حکومت دغه راز یوه دریځ ته مثبت ځواب نه دی ورکړی. دا په داسې حال کې ده چې نن د جولای میاشتې په ۲۸ نیټه په افغانستان کې د ولسمشریزو ټاکنو له پاره کمپاینونو پیل شول او حکومت د ټاکنو په ترسره کولو باندې ټینګار کړی دی.
AP /KH-NS