آلمانۍ ورځپاڼي «زيود دويچه څايتُنګ» په خپل يو راپور کي ليکلي چي په ۲۰۱۶ کال د آلمان په مالي مرسته ۵۵۰۰۰ مهاجر له دغه هيواد څخه په رضا وتلي دي. دغې ورځپاڼي د خپل راپور منبع کډوالو له پاره د آلمان فدرالي اداره بللې ده.

په راپور کي راغلي چي په ۲۰۱۶ کال ۲۵۰۰۰ کسان ديپورت سوي چي د په رضا تلونکو مهاجرو نيمايي برخه لا نه جوړوي. له آلمان څخه په ديپورت سوو کي افغانان هم شامل ول.

هغه رد سوي افغان مهاجر چي د ۲۰۱۶ کال د دسمبر په ۱۵مه نېټه کابل ته ديپورت کړل سول، بعضو يې وروسته رسنيو ته وويل چي د دوی له رضا پرته کابل ته لېږدول سوي. يو له دغو څخه بعضو رسنيو ته وويل چي د ديپورت له پروسې ناراضه دي.

و افغانستان ته د افغان مهاجرو د ديپورت له کبله د آلمان په بيلو ښارونو کي افغان مهاجرو او د مهاجرو د ملاتړ سازمانونو احتجاجونه وکړل.

د آلمان د کورنيو چارو وزارت د افغان مهاجرو د بېرته لېږد په دفاع کي وويل چي په افغانستان کي خوندي ځايونه سته. د کورنيو چارو وزير توماس ديميزېر وويل چي بيا يې هم لومړيتوب رضاکارانه بېرته ستنېدنه ده. آلمان غواړي په ۲۰۱۷ کال کي ۱۲۵۰۰ افغانان ديپورت کړي.

د «زيود دويچه څايتنګ» د راپور پر اساس په ۲۰۱۶ کال تر ټولو زيات په خپله رضا خپلو هيوادونو ته ستنېدونکي، د لوېديځ بالقان هيوادونو مهاجر ول. زياته سوې چي دا هغه مهاجر ول چي په آلمان کي يې د قبولۍ هيڅ چانس نه ؤ موجود.

د راپور له مخي په ۲۰۱۶ کال له آلمان څخه تقريبا ۱۵۰۰۰ د آلبانيا هيواد مهاجر بېرته خپل هيواد ته په رضا ستانه سوي دي. د راپور له مخي په ۲۰۱۶ کال د ستنېدونکو مهاجرو څخه همدغه تر ټولو لويه ډله ده.

په راپور کي راغلي چي د سربستان، عراق او کوزوفو څخه راغلو مهاجرو هم په لوی شمېر بېرته خپلو هيوادونو ته مخه وکړه. زياته سوې چي له یادې هرې ډلې څخه تقريبا ۵۰۰۰ کسان په رضا بېرته خپل هيواد ته ستانه سوي.

د راپور له مخي د ۲۰۱۶ کال د نوامبر مياشتي پوري ۳۲۰۰ افغان مهاجر په رضا خپل هيواد ته ستانه سوي دي. زياته سوې چي د ۲۰۱۵ کال په پرتله دا د افغان مهاجرو په رضا بېرته تګ کي لس چنده زياتوالی دی.

د راپور له مخي د آلمان دولت هغه کورنۍ ته د بېرته تګ د مالي لګښت تر څنګ اضاف ۴۲۰۰ يورو هم ورکوي. خو دا هغه وخت چي د دغې کورنۍ د پناه غوښتنۍ وروستۍ او حتمي د ردېدو فيصله لا نه وي راغلې. د دې تر څنګ د په رضا ستنېدونکو مهاجرو سره د في کس ۱۰۰۰ او ۳۰۰۰ يورو پوري نوري مرستي هم کيږي.

په آلماني رسنيو کي د آلمان د سرحدي پوليسو په حواله داسي راپورونه خپاره سوي چي په ۲۰۱۶ کال تقريبا ۲۰۰۰۰ کډوال له سره آلمان ته دننه نه دي پرېښودل سوي. ويل سوي چي په ياد شمېر کسان له آلماني سرحدونو څخه بېرته جواب سوي دي.

د راپورونو له مخي د آلمان له پولو څخه ۳۶۹۵ افغانان، ۲۱۴۲ سوريايان، ۱۷۹۴ عراقيان او ۱۲۳۷ نايجيريايان جواب سوي دي.

هر څوک چي د يو هيواد سرحد ته داخيليږي نو د نړيوالو او د ملي قوانينو له مخي بايد د سفر اړين اسناد ولري. ويل کيږي چي زيات وخت مهاجر له سرحدونو څخه بېرته لېږدول کيږي ځکه چي هغوی د کنټرول پر وخت جادويي لغت «ازيول» يا د پناه غوښتنې خبره نه کوي. حال دا چي په زياتو مواردو کي د «ازيول»، «اسايلم» يا پناه غوښتني لغت د پولو د پرانستل کېدو سبب کيږي.