دا واکسين چې په عين وخت د ناروغيو د څو عاملينو پر ضد مبارزه کوي، «Cervavac» بلل شوی او د «سيرم انستيتويت» په نوم درملو شرکت له خوا جوړ شوی دی. دا واکسين د پاپيلوم ویروس د څلورو بڼو په مقابل کې محافظت رامنځته کوي.
په کلينکي آزموينو کې تر مثبتو نتايجو وروسته دې واکسين د ۲۰۲۲م کال په جون مياشت کې د هند د درملو د کنترول ادارې له خوا په بازار کې د عرضه کیدو اجازه ترلاسه کړه.
هند د HPV د لا ارزان بيه واکسين په لټه کې دی
ايچ پي وي، د جنسي اړيکې له لارې انتقاليدونکې ویروسي انفکشن دی چې جنسي اورګانونه او همدا راز خوله او ستونی يا غاړه اغیزمنوي. د علايمو پر درملنې سربیره دا ویروس بل کوم درمل نه لري او له همدې کبله یې مخنيوی کليدي نقش لري.
د «لانست» د طبي ژورنال د معلوماتو په حواله که څه هم چې په هند کې د ايچ پي وي واکسين له ۲۰۰۸م کال راهېسې موجود دی، خو په ټول هېواد کې یې د تطبيقولو کمپاين په ځانګړي توګه د جانبي عوارضو په اړه د انديښنو او همدا راز د لوړې بيې له کبله تل د ځنډ ښکار شوی.
د «سېراواک» واکسينو توليد د ۲۰۲۲م کال په پای کې پېل شو او د دوز پر سر به یې بيه د ۲۰۰ او ۴۰۰ هندي کلدارو ترمنځ وي.
د دغه شرکت اجرايوي رئيس ادر پونواله، دويچه ويله ته وويل: «لومړی به دا واکسین د هند پر وګړو تطبيق شي او بيا وروسته به نړيوال شي. موږ دا د نړۍ د ټولو ښځو له پاره جوړ کړی دی. دا د ښځو د روغتيا او ساتنې له پاره خورا مهم دی.»
څنګه کولی شو په سرطان له اخته کیدو ځان وساتو؟
ساينس پوهان تر ډیره پوه شوي دي چې انسان څرنگه د سرطان په شان وژونکو ناروغيو اخته کیږي. له دې ناروغۍ څخه د ځان ساتنې له پاره ممکن یو شمیر تدابير مرسته وکړي. خو د سرطان ځنې ډولونه ارثي وي چې ځان ساتل ترې ستونزمن وي.
انځور: picture-alliance/dpa/empics/S.Kelly
له سکریټ څکولو ځان ساتل
څیړنو ښوولې ده چې سړی کولای شي له احتیاط څخه په کار اخیستنې سره د سرطان له نږدې نیمایې ډولونو څخه ځان وژغوري. د سګړیټو څښکل نږدې د هر یوه پنځم تومور عامل وي. د سکریټو لوګې نه یوازې د سږو، بلکې د سرطان د یو شمیر نورو ډولونو سبب هم ګرځي.
انځور: R. Ben-Ari/abaca/picture alliance
زیات وزن
تر سکریټ څکولو وروسته د وزن ډېرښت د سرطان تر ټولو لوی عامل وي. په چاغو ښځو کې د سينې او تخمدان د سرطان خطر ډیریږي. همدارنګه چاغوالی په نارینه وو کې هم تر ډیره د سرطان په ناورغۍ د اخته کیدو چانس زیاتوي.
انځور: Getty Images/China Photos
لږ حرکت کول
په هغو کسانو کې چې ډیر کښینې او لږ حرکت لري د سرطان په ناروغۍ د اخته کیدو امکان ډیریږي. څیړنو ښودلې ده چې ورزش نه یوازې د سرطان، بلکې په ډیرو ناروغیو له اخته کیدو څخه مخنیوی کوي. ضروري نه چې باید سخت ورزش وشي، بلکي بایسکل چلول او قدم وهل هم په دې برخه کې مرسته کوي.
انځور: Colourbox
د غوښو استعمال
د لوی او کوچني څارویو لکه غوا، مېښه یا ګاومیش، پسه او داسي نورو غوښه د ګیډې د سرطان سبب کیدلی شي. د لوی مال غوښه ډیر زیان رسونکې وي. برعکس د کب یا ماهي غوښې خوړل د روغتیا له پاره ګټه رسوي.
انځور: AP
د چټکو خوړو خوړل
د سبزیجاتو او میوو استعمال ګټه رسوي او له سرطان څخه تر ډیرې اندازې مخنيوی کوي. برعکس چټک خواړه لکه برګر، چپس او سره کړې غوښه تر ډیره د سرطان په وژونکې ناروغۍ د اخته کیدو سبب ګرځیدلی شي.
انځور: Colourbox
انځورونه1 | 5
د سيرم انستيتويت په نوم د درملو دا شرکت د واکسين د دوزونو د مقدار له کبله چې جوړ او په نړۍ کې یې پلورلې دي، د نړۍ تر ټولو ستر شرکت دی.
دا شرکت د دېمفتري، تيتانوس، هېپاتايسس بي، شيري، بغوټ او روبيلا پر ضد واکسينونه توليدوي او په کال کې تر ۱،۵ ميليارده ډوزو ډېر واکسين په ارزانه بيه د نړۍ نورو هيوادونو ته ليږدوي.
