د اتريش خبري آژانس (APA) د راپور له مخي دغه ۲۲ کلن ځوان د »اسلامي دولت« (داعش) ترهګري ډلي د غړي، په يوه ترهګر سازمان کې د ګډون او ترهګريزو جرمونو او جرمي سازمان کي د ګډون په تور مجرم پيژندل سوی دی.

څارنوالۍ ويلي دي چي تورن د ۲۰۲۴م کال په کرسمس کي د بريد کولو اراده لرله.

د اتريش خبري آژانس زياته کړې ده چي هغه د بريد له پاره ممکنه هدفونه په زالڅبورګ کي د کرسمس بازار، د ښار د اورګاډي سټېشن يا هوهنزالڅبورګ کلا په پام کي نيولي ول.

د احتمالي بريد په اړه د چيټ پيغامونه

دغه ځوان اعتراف کړی دی چي له داعش سره يوځای سوی او د بريد پلانولو په اړه يې فکر کړی وو. د هغه د څرګندونو له مخي چي د يوه ژباړونکي له خوا ژباړل کيدلې، هغه وويل چي د بريد په اړه دا افکار »جدي نه ول«.

دا پريکړه لا تر اوسه مرعی الاجرا نه ده.

د تورن د څرګندونو برخلاف، څارنوالۍ هغه پيغامونه نقل قول کړل چي هغه له داعش سره په يوه چيټ کي تبادله کړي ول، په دغه چيټ کي داعش هغه ته په چاقو سره د بريد کولو مشوره ورکړې وه.

څارنوالی ويلي دي چي دغه ۲۲ کلن ځوان په يادو چيټونو کي ليکلي ول چي قصد لري د درو کسانو سرونو پرې کړي.