اذربايجان او ارمنستان يو پر بل تورونه پورې کړي چې په ځايي‌ وخت د غرمې پر مهال نن ورځ پلی شوی اوربند يې نقض کړی دی. د ارمنستان د دفاع وزارت د رسنيو وياندې، شوشن ستېپانيان په تويتر کې ليکلي دي چې «ارمنستاني واحدونو د دښمن د بريد د درولو له پاره لازم تدابير پورته کړي دي.»

په ورته وخت کې د اذربايجان د دفاع وزارت هم داسې يوه بيانيه خپره کړې چې پر ارمنستان باندې يې پکې د اوربند د ماتولو تور لګولی دی. په دغه بيانيه کې راغلي دي چې «ارمنستان په ښکاره د اوربند له مقرراتو سرغړونه کوي.»

دغه اوربند د روسيې د بهرنيو چارو وزير سرګي لاوروف په منځګړتوب له لس ساعته خبرو اترو وروسته رامنځ ته شوی و. 

د سپتمبر د ۲۷مې نېټې راهيسې څه باندې ۴۰۰ کسان وژل شوي دي. د ناګورني قره باغ په نوم سيمه په رسمي توګه د اذربايجان خاوره ده،‌ خو د ارمني توکمو ځواکونو تر کنترول لاندې پاته شوې ده.‌ دغه ارمنيان په ۱۹۹۴ کال کې د بېلتون غوښتنې په سر د يوې جګړې راهيسې د ارمنستان له خوا ملاتړ تر لاسه کوي.