دواړو سياستوالو زياته کړې: «د ويجاړو شويو کورونو، ښوونځيو، سړکونو، پلونو او زېربناو بیرته رغونه او انرژۍ ته لاس رسی هغه څه دي چې باید اوس ورته لاس په کار شو څو دغه هېواد ډېر ژر بيرته په پښو ودريږي.»
د مارشال پلان له لارې امريکا متحده ايالاتو د ۱۹۴۸م او ۱۹۵۲م کالونو ترمنځ د آلمان او اروپا د نورو هېوادونو له بيارغونې سره د ميليارډو ډالرو مرسته کړې وه.
فون ډېر لاين او شولڅ وويل چې په اوږد مهال کې به دا ډېره مهمه وي چې شخصي بسپنه ورکوونکي او شرکتونه د اوکراين په بيارغونه کې پانګونه وکړي. دوی زياته کړه چې په دې برخه کې د اروپايي ټولنې نقش مهم دی ځکه چې اوکراين د اتحادیې غړيتوب ته کانديد دی: «له همدې کبله دا بيارغونه په اروپايي اتحادیې د اوکراين د شامليدو لار هم ده.»
فون ډېر لاين او شولڅ پر دې هم ټینګار وکړ چې: «له اوکراين سره مرسته نه يوازې سمه او اړينه ده بلکې زموږ په خپله ګټه هم ده. ځکه اوکراين يوازې د خپلې خپلواکۍ له پاره نه جنګيږي. بلکې پر اصولو د ولاړ نړيوال نظم دفاع هم کوي چې په ټوله نړۍ د ګډ ژوند او سوکالۍ بنسټ دی.»
اولاف شولڅ او د اوکراين لومړی وزير دينېس شميهال نن، دوشنبه په برلين کې پنځم آلمانی - اوکراينی اقتصادي فورم هم افتتاح کوي. دا پر دغه هېواد د روسیې تر يرغل وروسته د خپل ډول لومړۍ دوه اړخیزه غونډه ده.
کارپوهان د اوکراين د «بيارغونې» پر دوسیې کار کوي
د آلمان د اقتصاد له خوا تر جګړې وروسته د اوکراين د بيارغونې پلان لا دمخه چمتو کړل شوی دی. د آلمان د آر ان ډي شبکې په حواله د کارپوهانو يوې پنځوس کسيزې ډلې د وړاندیزونو يوه مفصله دوسيه چمتو کړې ده.
د آلمان د اقتصاد د ختیځ کمېسيون د نوښت مشر ميشايل هارمز وويل: «موږ بايد چټکه مرسته وکړو، د مثال په توګه د زيربنا او يا انرژۍ ته د لاس رسي په برخه کې خو په عين وخت کې د راتلونکی په اړه هم باید فکر وکړو.»
اولاف شولڅ او اوزولا فون ډېر لاين په بروکسل کېانځور: Geert Vanden Wijngaert/AP/dpa/picture alliance
د آر ان دي په حواله د «اوکراين د بيارغونې» په نامه دې دوسيه کې توصیه شوې چې په بيارغونه کې ګډون کوونکي اروپايي هېوادونه او همدا راز اروپايي ټولنه هر يو یې باید د اوکراين له پاره يو لوړ رتبه همغږي کوونکي باید ونوموي.
دغه همغږي کوونکی بايد بيا يوه شورا رامنځته کړي چې د اوکراين له حکومت سره پر اړتياو او د پروژو په اړه معلومات تبادله کړي.
زيلنسکي: روسیه يو ډېر ناوړه څه ته چمتووالی نيسي
د اوکراين ولسمشر ولوديمير زيلنسکي يو وار بيا پر نړيواله ټولنه د روسیې له خوا د اوکراين د جګړې د لا پراخولو پر وړاندې د کلک مقاومت غږ کړی دی. زيلنسکي د يوه ويډيويي پېغام له لارې ويلي دي: «کله چې مسکو پر اوکراين د په اصطلاح يوه «کثيف بم» کارولو ته د چمتووالي نيولو تور لګوي «نو دا په دې معنا ده چې روسیې هر څه چمتو کړي دي.»