اروپايي اتحاديه او مصر د ميليارډونو ډالرو تړون لاسلیک کوي
۱۴۰۲ اسفند ۲۷, یکشنبه
اروپايي اتحاديې او مصر د انرژۍ او مهاجرت پر موضوع د ۷ اعشاريه ۴ میلیارډ يورو په ارزښت تړون باندې توافق ته رسېدلي دي. اروپايي اتحاديې د غیرقانوني مهاجرتونو د مخنیوي له پاره هڅې کوي او مصر د نغدو پېسو ستونزه لري.
اروپايي اتحاديې او مصر د انرژۍ او مهاجرت پر موضوع د ۷ اعشاريه ۴ میلیارډ يورو په ارزښت تړون باندې توافق ته رسېدلي ديانځور: Dirk Waem/Belga/picture alliance
اعلان
په پام کې ده چې اروپايي اتحادیه او مصر به د یکشنبې په ورځ (د ۲۰۲۴م کال د مارچ ۱۷مه) د سلا شوو موضوعاتو اړوند تړونونه لاسلیک کړي. په دغه تړونونو کې مصر سره چې دا وخت د نغدو پیسو له کمښت سره مخ دی د ۷ اعشاریه ۴ ميليارډه یورو (۸ ميليارډ ډالر) په ارزښت د پور یوه بسته، بلاعوض مرستې او اروپا سره د انرژۍ په برخه کې همکاري شانته ټکي شامل دي.
د اروپايي کمیسیون یوه لوړپوړي چارواکي خبريالانو ته وويل چې دغه قرارداد به په راتلونکو کلونکو کې د ملیارډونو يورو اعتبار او د اوکراین جګړې په جريان کې «له روسي ګازو څخه د لا لرې پاتې کېدو له پاره» داسې معاملات په بر کې ولري چې اروپا سره د مرستې په موخه د مصرۍ انرژۍ واردات چټک کړي. دغه چارواکي وويل چې «مصر نن او سبا د اروپايي اتحاديې له پاره یو بحراني هيواد دی.»
د اروپايي کمیسیون مشره، اورزولا فون دير لاین (کيڼ لور) د مارچ په ۱۷مه په قاهره کې د مصر له ولسمشر، عبدالفتاح السیسی سرهانځور: Egyptian Presidency/AFP
د فرانسې خبري آژانس د رپوټ پر اساس، د اروپايي اتحاديې مشره، اورزولا فون دير لاین چې په پام کې ده د اتریش، بلجيم، قبرس، یونان او ايټاليا دولتي مشران به هم ورسره په قاهره کې یو ځای شي، نن ناوخته د مصر له ولسمشر، عبدالفتاح السيسي سره دغه تړون لاسليک کړي.
د اروپا د بهرنیو سرحدونو ساتونکي آژانس، فرانټيکس، تېر کال اروپا ته د نژدې ۱۵۸زره مهاجر ثبت کړي چې پر سختو سمندري لارو ېې ځانونه اروپا ته رسولي دي.
د اروپا د بهرنیو سرحدونو ساتونکي آژانس، فرانټيکس، تېر کال اروپا ته د نژدې ۱۵۸زره مهاجر ثبت کړي چې پر سختو سمندري لارو ېې ځانونه اروپا ته رسولي ديانځور: Rebecca Berker/ROPI/picture alliance
مصر دا وخت له جګړه ځپلې هېواد ليبیا سره پر پولو او همدارنګه په غزه او سوډان کې د روانو جګړو له کبله په سخت اقتصادي بحران کې ډوب دی. په غزې تړانګه کې د حماس او اسرائيلي ځواکونو تر منځ او په سوډان کې بیا د پوځ او د پوځ د رقيبي ډلې، د چټک ملاتړ ځواکونو (RSF) ترمنځ جګړه روانه ده.
د تروریزم ضد همکاري او د سرحداتو محافظت
د اروپايي کمیسیون دغه چارواکي د مصر «مهم موقعیت ته چې له ليبیا، سوډان او غزې تړانګې سره ډېر سخت ګاونډيتوب او سرحدونه لري» اشاره وکړه. هغه دا هم وويل چې په دغه تړون د «امنیت، د تروریزم ضد همکارۍ او د سرحداتو محافظت. په ځانګړې توګه جنوبي سرحدات» چې سوډان سره نښتې دي، موضوعات شامل دي.
په انځور کې له سوډانه مصر ته رسيدلی مهاجر لیدل کيږي، د مهاجرت نړېواله اداره په مصر کې د سوډاني مهاجرو شمېر ۴میلیونه ښييانځور: -/AFP via Getty Images
د مهاجرت نړېوالې ادارې د ارقامو له مخې، مصر واردمخه د ۴ ملیونه سوډاني او یونیم ملیون سوريايی مهاجرو په ګډون په ميلیونو مهاجرو ته ځای ورکړی دی.
په رپوټ کې زیاته شوې چې د قاهرې په ناسته کې به د حماس او اسرائيل پر روانې جګړې «اصلي تمرکز نه کيږي، خو د بحثونو یوه برخه به وي.» په غزې تړانګه کې د حماس او اسرائيلي ځواکونو تر منځ روانه جګړه د اپريل له ۷مې کله چې حماس پر اسرائيل حمله وکړه، ادامه لري. په دغه حمله کې شاوخوا ۱۲۰۰ کسان ووژل شول او شاوخوا ۲۵۰ نور يرغمل ونيول شول. د اسوشتید پریس د نن یکشنبې ورځې رپوټ پر اساس، په غزه کې د عامې روغتیا وزارت وايي چې تر اوسه په دغه جګړه کې ۳۱۶۴۵ تنه فلسطينیان وژل شوي دي.
حماس وسلواله ډله پر نورو هېوادونو سربیره د امريکا متحده ايالاتو، آلمان، اسرائيل او اروپايي ټولنې له خوا د تروريستي سازمان په توګه درجه بندي شوې ده.
(AFP)mks/aa/
له آرشیف څخه:
د مصر تر ټولو ښکلي سیل ځایونه چې په لېدلو ارزي
آیا تاسو تر اوسه مصر ته سفر کړی؟ سل کاله مخکې هوارد کارتر د مصر د پاچا، توت عنخ آمون، قبر کشف کړ. د دغې سلیزې په ارتباط په دغه انځوريز رپوټ کې د مصر څو تر ټولو مشهور ځايونه درپېژنو چې په ورتلو او لېدلو ارزي.
انځور: Givaga/Zoonar/picture alliance
د پاچا، توت انخ آمون، قبر
بريتانوي ارکيالوجیست يا لرغون پيژندونکي، هاوارد کارتر، د ۱۹۲۲م کال د نومبر په ۴مه د مصر د پاچا توت انخ آمون د قبر ځای کشف کړ. دا یو ستر کشف وو. دغه قبر د نورو موندل شوو قبرونو په پرتله تر ډيره لاس نا خوړلی پاتې وو او لوټ شوی نه وو چې په کې د پاچا د موميايي ترڅنګ ډير نور باارزښته آثار موجود ول.
که تاسو مصر ته سفر کوئ اما تر ټولو ستر هرم یا پېرامېډ او د ابوالهول له مجسمې څخه ېې کتنه نه کوئ، نو سفر مو بشپړ نه دی. دا د نړۍ د ۷ عجايبو له ډلې ېو دی. دغه ساختمان له ميلاده مخکې د ۲۶۲۰ او ۲۵۰۰ کلونو ترمنځ د ۱۰ زره کارګرو له خوا جوړ شوی دی. د ابوالهول مشهوره او لويه مجسمه، د دغه لرغوني کمپلیکس په دخولي ور کې موقعیت لري.
انځور: AlexAnton/Zoonar/picture alliance
د سینا غر
د سينا غر د نړۍ د ۷ تر ټولو مهمو زيارتي ځايونو له ډلې يو دی او په مختلفو ادیانو کې مقدس ګڼل کيږي. د بایبل په حواله، دا هغه ځای دی چې خدای له ابراهيم سره غږېده او موسی ته ېې لس فرمانونه وسپارل. د سينا غر د ۲۲۸۵ متر لوړ دی چې ختل ورته سخت اما د منظرو ننداره ېې په زحمت ګاللو ارزي.
د جوزر هرم (Step Pyramid of Djoser) په مصر کې تر ټولو قديمي له تېږې جوړ پېرامېډ دی او همدارنګه يوازينی پېرامېډ دی چې مربعي بنسټ نه لري. دغه هرم له ميلاده مخکې په ۲۷مه پېړۍ کې په مصر کې د اهرامو جوړولو په لومړنۍ مرحله کې جوړ شوی دی. له ۱۹۷۹ راهیسې د يونيسکو سازمان د نړۍ په لرغونو ميراثونو کې ثبت دی. د جوزر هرم د سقارې لرغونې هدېرې په زړه کې موقعیت لري.
انځور: XYZ PICTURES/ imageBROKER/picture alliance
د ابوسمبل معبد
دغه لرغونی معبد له میلاده مخکې په ۱۳مه پيړۍ کې د دوهم رامسس له خوا جوړ شوی دی. دا هم د يونسکو سازمان د لرغونو میراثونو له ویاړ څخه برخمن دی. دغه ځای د ځمکې او آسمان ترمنځ د ېوې اړېکې په توګه ډیزاین شوې دی. که تاسو غواړې له دغه لرغوني معبد څخه لېدنه وکړئ نو د کشتۍ په ذریعه به ورځئ او بیا د ناصر سېند له ساحل څخه معبد ته ورځئ.