کله چې دویچه ویله له ۱۸کلن نایجیریایې مهاجر محمد څخه پوښتنه وکړه چې په پټه سره بار وړونکو ریلونو ته ختل څومره خطر لري؟ هغه ځواب ورکړ: که خطر پر ځان ونه منم، ژوند خوند نه راکوي.

الجزایري انور او احمد په یوه زوړ اورګاډي کې ناست دي او راتلونکي باروړونکي اورګاډې ته انتظار باسي. انور دویچه ویله ته وویل چې «قاچاقبر د یوه جعلي پاسپورت جوړولو له پاره ۱۵۰۰يورو غواړي. له پورټ آف پترس څخه تر ایټالیا پورې ۶۰۰ يورو اخلي. زما سره یوازې ۲۵ يورو دي چې هغه زه غواړم تر سربستان پوري له ځان سره وساتم.»

۲۹ کلن الجزایري مهاجر ذکي له نهو میاشتو راهیسې په یونان کې دی. هغه په یو زوړ اورګاډي کې ویده دی. ذکي شپږ واره آلمان ته د تللو کوښښ کړی دی.

یو مراکشی مهاجر وایې چې هغه درې واره د یونان او مقدونیا په سرحد کې او یو وار په پورټ آف پترس کې هغه وخت د امنیتي کسانو له خوا نیول شوی دی، چې د خپل سفر د دوام له پاره یې ځان په یوه لارۍ موټر کې پټ کړی وو.

۱۶ کلن جلوان له ۲۳ کلن عبدالرحمن سره د باروړونکي اورګاډي په لاندنۍ برخه کې د ځان پټولو پرمهال مرسته کوي. دغه باروړونکې ریل د انجن د بدلونو له پاره په یوه تم ځای کې تم شوی دی.

لکه څرنګه چې دغو مهاجرو ته د بار وړونکو ریلونو تقسیم آوقات معلوم نه وي، نو مهاجر پکښې تر ځان پټولو وروسته نه پوهیږي چې دوی چیرته رسیږي. ځني وختونه دغه ریلونه دوی د سرحد پولي پر ځای د اتن پر لور بېولي وي.

یو الجزایری مهاجر خپل ملګري ته لارښوونه کوي چې څنګه باید ځان په باروړونکو اروګاډو کې پټ کړي.

په دې انځور کې دوه تنه ځوان مهاجر لیدل کیږي چې په سیمه کې له امنيتي گزمې څخه د ځان پټولو په موخه د اورګاډي د دوو ډبو ترمنځ له ارتباطي وسیلې څخه ټوپ یا خیز وهي.

د محمد په نوم یو تن مهاجر د کډوالو له یوه کمپ څخه چې دوی ته نږدې دی، د خپلو هغو ملګرو له پاره د خوراک څښاک شیان لیږدوي چې ځانونه یې په بار وړونکو ریلونو کې پټ کړي دي.

د تهیسالونیکي د اورګاډي په تم ځای کې مامورين د غرمې د وقفې پر مهال قطې کوي. یو تن کارکوونکی وایې د تیرکال له دوبي راهيسي هره ورځ مهاجر د خطر په قبلولو سره ځان په دې ریلونو کې پټوي له دې ځایه زي او بله ورځ بیا بیرته دلته راځي. دا ډیر خطر لري، خو موږ د دوی د مخنیوي له پاره هیڅ هم نه شو کولای.

یوناني چارواکو د اورګادو پلټۍ په اړخ کي د برق تیریدونکو لینونو د خطر په حواله په عربي ژبه د خبرداري علایم نصب کړي دي. په نوامبر میاشت کې هم یو الجزایري مهاجر اورګاډي ته د ختلو په کوښښ کې وو چې برق ونیوه او مړ شو.

ماشومان، ښځي او زاړه سړي چې په خپلو هیوادونو کې یې له جگړو او فقر څخه تیشته کړې ده او ځان یې په ډیرې سختۍ سره یونان ته رسولی، په لیسبوس کې د اغزنو دیوالو تر شا کمپ کې ژوند کوي.

مهاجر چې څنگه د یونان ټاپوگانو ته ورسیږي، د دغه هیواد پولیس یې د ثبتولو مرکزونو ته بیایي. دغه مرکزونه په ډیرې سختۍ سره څارل کیږي. ترکیې ته د مهاجرو د بیرته ستنولو د پروگرام له کبله، هیڅ پناه غوښتونکی له کمپ څخه د وتلو اجازه نه لري.

یوازې هغه مهاجر چې د کمپ په دننه کې صحي خدماتو ته اړتیا لري، د مرسته کوونکو سازمانونو د ژمنې له مخې اجازه لري چې د نارنجي رنگه جاکټ په اغوستلو سره له اصلي کمپ څخه د داوو طلبو مرستندویانو د درملنې کمپ ته ولاړ شي.

په حقیقت کې د مهاجرو د نوم ثبتولو کمپ چې د یونان د دولت له لوري چلول کیږي، اوس په اجباري توگه د پناه غوښتونکو د ساتلو په یوه مرکز باندې اوښتی دی. هیڅ کوم پناه غوښتونکی اجازه نه لري چې د آتن پر لور خپل سفر ته ادامه ورکړي. اوس یو ځل بیا د انساني قاچاق وړونکو کاروبار ښه شوی دی.

هغه صفونه چې په موریا کمپ کې د داوطلبو کسانو له لوري د مهاجرو له پاره جوړ شوي ول او همدا څو اوونۍ تر مخه به له خلکو ډک وو اوس تش پراته دي او هیڅوک د اجتماعي خدماتو له داو طلبو کارکوونکو څخه کومه مرسته نه غواړي.

د یکشنبې په ورځ د یونان په ښارونو او ټاپوگانو کې د اروپايي اتحادیې او ترکیې تر منځ د شوي تړون پر ضد لاریونونه وشول. په دغو لاریونونو کې د ټولنیزو چارو مرسته کوونکو او د یونان ځیني خلکو هم ترکیې ته د مهاجرو د ستنولو پر ضد شعارونه ورکړل او د اروپایي اتحادیې څخه یې د دغه تړون د لغوه کیدو غوښتنه وکړه.

د اروپا د پولې ساتنې ادارې «فرونټکس» او د ناټو کښتۍ په آژه سمندرگي کې گزمه کوي. هغوی د مهاجرو د کښتیو د لیدلو په صورت کې د یونان له ساحلي څارونکو سره تماس نیسي. تر هغې وروسته مهاجر کمپونه ته استول کیږي.