د ۲۰۲۲م کال په لومړۍ نیمايي کې د اروپايي ټولنې په غړيو هيوادونو او ناورې او سويس کې د پناه غوښتنې عريضې په څرګند ډول ډېرې وې. د اروپايي ټولنې د پناه غوښتنې آژانس «EUAA» په حواله چې مقر یې د مالتا په پلازمېنه واليتا کې دی، د ۲۰۲۲م کال په لومړيو شپږو میاشتو کې اړوندو ادارو ته د پناه ۴۰۶ زره غوښتنليکونه رسېدلي دي. زياته شوې چې دا د تېرکال د همدې مودې په پرتله ۶۸ سلنه زياتوالی دی.
د لومړنيو شميرو په حواله اروپايي ټولنې د یوې میاشتې شمیرې په راخيستو سره په جون مياشت کې د څه نا څه ۷۳ زره او سلو عريضو په ترلاسه کولو سره کابو په هماغه اندزاه عريضې ترلاسه کړي دي چې د ۲۰۱۵ او ۲۰۱۶م کالونو ترمنځ وړاندې شوې وې.
«تر ټولو زیات افغانانو په اروپا کې د پناه غوښتنه کړې»
تر ټولو ډېر د پناه غوښتنليکونه د افغانانو، سوريې او د وينزويلا د وګړو له خوا وړاندې شوي دي چې دا په ترتيب ۹۱۰۰، ۸۹۰۰ او ۴۸۰۰ دي. د اروپايي ټولنې د پناه غوښتنې ادارې په حواله په جون مياشت کې ۱۲۰۰ اوکراينانو هم د پناه غوښتنه کړې وه. خو د چارواکو په حواله دا هم د يادلو وړ ده چې د جګړې ځپلي هیواد اوکراين څخه پر راغلو انسانانو بل ډول مقررات صدق کوي.
موقتي محافظت د جلا حالت په توګه
په اروپايي ټولنه کې د ۲۰۲۲م کال د فيبرورۍ له ۲۴مې نیټې څخه د سبتمبر تر ۴مې نيټې پورې تر ۴،۲ میليونو ډېرو وګړو چې زياتره یې اوکراينان ول، د موقتي محافظت د ترلاسه کولو له پاره ځانونه راجستر کړي ول.
په دې توګه هغه کسان چې د روسیې له خوا پر اوکراين د يرغل په نتیجه کې تښتې ته مجبوريږي، د پناه غوښتنې د پيچلې پروسې سره نه مخ کيږي او د يوې ځانګړې مودې له پاره په اروپايي ټولنه کې د زده کړو او حکومتي مرستو د ترلاسه کولو حق په لاس راړوي.
د اروپا په کچه اکثریت مهاجر په آلمان کې د پناه غوښتنه کوي
د اروپايي ټولنې په حواله په روان کال کې د پناه او موقتي محافظت د ۴،۶ ميليونه غوښتنليکونو سره دا شمير تاريخي لوړې کچې ته رسېدلی دی. په جون میاشت کې د پناه او موقتي محافظت دواړو حيثيتونو پيژندو ته په کتو سر د سوريايي او اوکرايني وګړو عريضې کابو تل منل شوي دي. په ټولیزه توګه د ۴۴ سلنه سره له دې غوښتنليکونو تر نيمايي لږ یې تصويب يا قبول شوي دي.
ب. ص/ ن .ز (dpa, Europäische Asylagentur)
زموږ له آرشيف څخه:
د جرمني څخه د مهاجرو د اخراج مقررات څه ډول دي؟
د جرمني داخله وزیر د ۱۶ ایالتونو د کورنیو چارو د وزیرانو سره تریوه ویدیو کنفرانس وروسته اعلان وکړ، چي د جنورۍ له اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي. نور جزيات دلته ولولئ:
انځور: picture-alliance/W. Rothermelد جرمني داخله وزارت وايي، چي د سوریایانو د اخراج د منع کیدو لایحه به تمدید نسي. داخله وزير هورست زېهوفر په دې تړاو مخکي هم څرګندونې کړي وې. خو منتقدین دا د پناه غوښتونکو څخه د ساتني بین المللي حقوقو خلاف بولي. د ویچه ویله دلته د دغي مسألې حقوقي اړخونو ته یوه کتنه کړې ده: هغه مقرره چي د ۲۰۱۲ م کال راهیسي په منظم ډول سره تمدیدیږي، په پام کي لري، چي سوریایان خپل هیواد ته د اخراج څخه وساتي.
په سوريه کي د امنيت نشته والی
په سوریه کي اوس هم جنګ دوام لري. دا په دې معنی ده، چي حتی رد سوي پناه غوښتونکي هم، د مجرمینو په شمول په جرمني کي پاته سي. منتقدین وايي، چي په سوریه کي هیڅ ډول امنیتي شرایط وجود نلري. خو داخله وزیر، هورست زیهوفر د ۱۶ ایالتونو د کورنیو چارو د وزیرانو سره تر یوه ویدیو کنفرانس وروسته اعلان وکړ، چي د جنورۍ میاشتي د اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي.
ولي د اخراجیدو ممانعت لغؤ سو؟
په جرمني کي د هغو پناه غوښتونکي، چي رد سوي، او یا یې جرمونه کړي وي، (دولدونګ) یا د پاته کیدلو مؤقتي ویزه ورکول کیږي. خو ددغو کسانو پرضد همیشه د ښی اړخو افراطیانو لخوا اعتراضونه کیږي او تر ټولو دمخه د مسلمانانو پر ضد. د ۲۰۱۱ م کال راهیسي د سوریې جنګ، چي تر ۳۸۷ زره اضافه انسانان پکښي ووژل او په ملیونو کسان د وطن پریښولو ته مجبوره سول، ددې سبب سو، چي شکمن کسان هم په جرمني کي پاته سي.
د جرمني په داخله وزارت کي د ساختماني او هیواد ساتني چارو معین، هانس ګیورګ انګلکه پرون جمعه خبریالانو ته وویل:«هغه کسان چي جرمونه کوي او یا تروریسټي اهداف مخته وړي، زموږ دولت او خلګو ته تاوان رسوي او باید د جرمني څخه اخراج سي.» خو د زیهوفر د اظهاراتو پراساس د تقریبأ ۷۷۰ زرو سوریایانو څخه چي په دې وروستیو وختونو کي جرمني ته راغلي دي، فقط تقریبأ ۹۰ کسانو ته یې د خطرناکو کسانو په سترګه کتل کیږي.
د اخراج څخه انتظارات محدود دي
د کرونا دویروس په سبب د سفر پر محدودیتونو سربیره، سوریې ته په نورو دلایلو هم اخراج ممکن ندی: د نیدرساکسن ایالت داخله وزیر، بوریس پستوریس په دې باب وویل،«په سوریه کي هیڅ داسي مؤسسه وجود نلري، چي موږ د هغه سره ډیپلوماتیک روابط ولرو.»په دې دلیل هغه او سوسیال دموکراټ حزب یې سوریې ته د نه اخراج د قاعدې لغؤ کیدل رد او کوښښ یې وکړ، چي هغه د ۶ نورو میاشتو دپاره تمدید کړي.
د یوه رپوټ پراساس آلمان په ۲۰۱۹ م کال کي۲۲۰۰۰ تنه اخراج کړي دي. البانیا، نایجریا، ګرجستان، روسیه او صربستان د هغو هیوادو د جملې څخه وه، چي په همدغه کال کي یې هر یوه ته زر زر تنه اخراج سول. په همدغه وخت کي تقریبأ ۹۳۰ افغانان او ۸۶۰ عراقیان هم اخراج سوي دي. د رپوټ پر بنأ په ۲۰۱۹ م کال کي د اخراجیدو تقریبأ ۴۰ فیصده موارده د اروپا د اتحادیې نورو هیوادو لکه فرانسې او ایټالیا ته تر سره سوي دي.
هغه کسان نباید د جرمني څخه اخراج سي، چي په خپلو هیوادونو کي یې د جنګونو، تعقیب او یا ازار په دلیل ژوند ته خطر موجود وي. په دغه صورت کي د هغوی اخراج د اروپا د بشر د حقوقو د کنوانسیون څخه سرغړونه ده. دغه کنوانسیون د هغوکسانو اخراجیدل هم منع کوي، چي په خپلو هیوادونو کي د شکنجې سره مخامخ کیدلای سي.
