د اروپايي کمییسیون مشر جان کلود یونکر، په يوه تازه مرکه کې د مهاجرت موضوع په تړاو د ترکيې او اروپايي اتحاديې تر منځ د شوي تړون په اړه ويلي دی چې که چيرې دغه تړون لغوه کيږي نو مسئولیت به یې د ترکيې پر غاړه وي. يونکر خبرداری ورکړ چې ترکیه له دې کار سره له اروپايي ټولنې سره خپلې نژدي روابط په خطر کې اچوي.
د اروپايي کميسيون مشر د یکشنبې په ورځ بلجيمي ورځپاڼې «لوسوا» ته وويل: «د ترکيې چارواکو لخوا ورکړل شوي خبرداري پر مونږ اغیزه نشي کولای. که چيرې د ترکيې حکومت د تړون پر موادو عمل نکوي، نو بيا د ويزو پر موضوع کې هم پرمختګ نشي راتلاي.»
يونکر په واضحه ډول وویل چې که چيرې دغه تړون لغوه کيږي نو مسئوليت به يې د ترکيې د حکومت پر غاړه وي.
ترکيې د روان کال په مارچ میاشت کې له اروپايي اتحاديې سره تړون لاسليک کړ چې د آژه سمندرګي له لارې يونان ته د تلونکو غيرقانوني مهاجرو مخنيوي به کوي او یونان ته راغلي مهاجر به هم بيرته ترکیې ته انتقالوي. د دې په مقابل کې اروپايي اتحاديې له ترکيې سره مالې مرستې وکړې، او د دې هیواد وګړو ته یې د نورو تر څنګ د شنګن غړو هیوادونو ته د آزاد سفر کولو د شرایطو برابرولو ژمنه وکړه.
خو د تړون له لاسليک کولو راپديخوا ترکيې څو ځله دغې اتحاديې ته خبر داری ورکړ که چيرې یې د ويزو شرط عملي نکړي نو دوی به تړون لغوه کړي.
روانه اوونۍ د ترکيې د بهرنيو چارو وزير مولو چاوش اولوني، يو ځل بيا اروپايي اتحاديې ته په دې اړه خبرداری ورکړ، چې د نه ځواب په صورت کې به انقره د روان کال تر پايه تړون لغوه کړي.
تیره ورځ د اتريش د دفاع وزير پيتر دوسکوسيل ويلي وو، که چيرې د ترکيې لخوا دغه تړون لغوه شي، د دې امکان شته چې یو ځل بيا د اروپا پر لور ډیر شمیر کډوال حرکت وکړي.
د اتريش د دفاع وزير زیاته کړې چې په دې اړه به د راتلونکې اوونۍ په پيل کې په ويانا کې د مرکزي اروپا هيوادونو د دفاع وزيرانو په کيدونکې غونډه کې خبرې وشي.
له ځنګل کمپ څخه پاريس ته او بيا ...
د فرانسې په کاله کې پولیسو لخوا د «ځنګل» موقت کمپ له ورانيدو وروسته، په زرونو مهاجر پلازمينه پاریس راوړل شول. خو لا هم زیات شمير مهاجر غواړي بيرته کاله ته ولاړ شي تر څو له هغه ځایه بريتانيا ته تللي وي.
انځور: Reuters/C. Platiau پاریس کې د مهاجرو د خيمو غورځول
د فرانسې پولیسو د پاریس ښار د ستالينګراد ميترو ستيشن ته نژدې د پياده روونو پر سر د مهاجرو درول شوې خيمې او د خوب لپاره هوارې کړل شوې دوشکې او بیسترې ټولې کړې. د کالې کمپ له ورانيډو وروسته پاريس کې د مهاجرو شمير تر ۳۰۰۰ پورې لوړ شو.
دا به د کمپ د پاک کارۍ وروستی ځل وي؟
مهاجرې ښځې په سړه هوا کې بسونو ته ولاړې دي تر څو یې د فرانسې ښار بلې سيمې ته د مهاجرو د پزيرش مرکز ته رسولي وي. په پاريس کې د مهاجرو کمپ په وروستيو مياشتو کې هم دوه ځله پاک کاري شوی وو. د پزيرش مرکزونه به په راتلونکې کې د موقتي کمپونو د جوړيدو مخنيوي وکړي.
په زرونو هغه مهاجر چې د «ځنګل» کمپ تر ورانيدو وروسته د فرانسې پلازمينې پاریس ته راغلي، په دې هيله دي چې بيرته کالي ته ولاړ شي، تر څو له هغه ځايه بريتانيا ته تللي وي.
د فرانسې حکومت لخوا په کالې کې د مهاجرو کمپ تر ويجاړيدو وروسته، یو شمير مهاجرو د پاريس ښار په کوڅو کې خپلې خيمې ودرولې. له همدې کبله اوس د فرانسې په کوڅو کې د مهاجرو شمير زیات شوی دی.
کوم مهاجر چې تيرکال فرانسې ته رسيدلي ول، اکثره یې د افغانستان، عراق، اريتيريا او سوډان هيوادونو څخه دي. دوي غالباً هڅې کړي تر څو د لاريو او نوور وسايطو په ذريعه د بريتانيا پر لور وتښتي.
يوه ډله ځوان مهاجر په کاله کې «ځنګل» کمپ ته نژدې ولاړ دي. د اکتوبر میاشت په ۲۶ مه، کله چې پوليسو له کمپ څخه د شاوخوا ۱۰ زره مهاجرو د وښکلو کار پیل کړ، کمپ ميشتو په اعتراض کې اورونو بل کړل.
مهاجر له کالې څخه د وتلو په حال کې
د فرانسې د کالې په «ځنګل» نومې کمپ کې شاوخوا لس زره مهاجر په دې اميد ميشت ول چې بريتانيا ته به ځي. چارواکو د فرانسې نورو سيمو ته د دغو مهاجرو د انتقال پر وخت هڅې وکړې، تر څو يې د اعتراضاتو د پيښيدو څخه مخنيوی کړی وي.
دا په کاله کې د «ځنګل» کمپ یوه برخه ده. په دغه کمپ کې مهاجر په ناپاکه کانتينرونو او خيمو کې په بد حالت کې ژوند کاوه. دغو خيمو د باد او لمر په مقابل کې ډیر کم مقاومت لاره.
د فرانسې ولسمشر فرانسوا اولاند وویل چې نور به څوک پرې نښودل شي چې د کالې د مهاجرو په کمپ کې له سره میشت شي. د «ځنګل»کمپ په اروپا کې د مهاجرو د بحران د سمبول په توګه بدل شو.
