د يورو پول يا اروپا پوليسو د آلمان د «ويلت ام زونتاگ» ورځپاڼې ته ويلي دي چې د اروپايي ټولنې په غړيو هيوادونو کې د پوليسو له خوا د کوکاينو ضبطولو پېښې مخ پر زياتېدو دي او ښايي ۲۰۲۰م کال په اتحاديه کې د مخدره موادو د قاچاق يو ریکارد ماتونکی کال وگرځي.
په دې وروستيو مياشتو کې چارواکو په بيلجيم او هالند کې د ډېر مقدار مخدره موادو د حمل او نقل مخه نيولې ده. په بيلجيم او هالند کې په ترتيب سره د انتويرپ او روتردم بندرونه له جنوبي امريکا څخه اروپايي ټولنې ته د دغه نشه يي توکو د داخليدو اصلي نقطې دي.
د «ويلت ام زونتاگ» ورځپاڼې په حواله په برلين کې هم د کوکاينو د ضبط پېښې ډېري شوي دي. په دغه ښار کې د روان ۲۰۲۰ م کال په لومړۍ نیمايي کې د تېر کال د همدې مودې په پرتله ۶۴،۵ سلنه زيات له کوکاينو سره تړاو لرونکي جرمونه ثبت شوي دي.
له مخدره موادو سره د مبارزې د قطعې مشر اولاف شیرم وويل: «برلين په ځانگړي توگه [د مخدره موادو د قاچاق له پاره] حساس دی.» نوموړي زیاته کړې: «ځيني سياستوال او ځيني نور ځوانان چې له بېلا بېلو مسلکونو سره تړاو لري او همدا راز منيجران کوکاين په پارتي گانو او محفلونو کې کاروي. د ټولنې په هر قشر کې دغه مخدره توکي کارول کيږي.»
په برلين کې چارواکي په ځانگړي توگه د «کوکاين ټکسي» يا د پاکټ ليږدولو د خدماتو له لارې د کوکاين د قاچاق د زياتېدو له وجې انديښمن دي. په ۲۰۱۹م کال کې د ښار پوليسو د دې ډول پاکټونو د انتقال د ۲۰۹ مواردو په اړه پلټنې کړي وې. د شيرم په حواله د ۲۰۲۰م کال په يوازې لومړيو شپږو مياشتو کې ۱۷۸ دغه ډول قضيې پېښې شوي دي.
نوموړي وويل چې زياتره وخت د فرمايش او موادو د سپارنې او يا انتقال ترمنځ يوازې ۱۵ دقيقې وخت وي، «نو پولیسو ته یې تعقيبولو ډېر سخت وي.» هغه زياته کړه: «مخدره توکي په عامه ځايونو کې نه سپارل کيږي. دا زموږ له پاره يوه لویه ستونزه ده.»
په ۲۰۲۰م کال کې نوی ريکارد؟
په ۲۰۱۹م کال کې په آلمان کې د بل هر کال په پرتله ډېر کوکاين نيول شوي ول. د ۲۰۱۷ او ۲۰۱۹ م کالونو ترمنځ د پوليسو له خوا د نيول شويو مخدره موادو مقدار له ۳۲۰۰ کيلو څخه ۱۰ زرو کيلو گرامو ته لوړ شوی.
هالنډ: د کوکاین ستر لابراتور کشف شوی
د آلمان د جنايي جرمونو د فدرالي ادارې په حواله دغه تمایل به ښايي په ۲۰۲۰م کال کې هم دوام ولري. د دغه ادارې مشر کرستيان هوپه ويلت ورځپانې ته وويل چې «محتاطې سروې گانې ښيي چې په ۲۰۲۰م کال کې به هم د کوکاينو د ضبطولو شميرې د تیر کال په کچه وي.»
هوپه زياه کړه چې د کوکاينو د وارداتو د مخنيوي پر هڅو سربیره د دې موادو بيه باثباته پاته ده. هغه وويل: «دا د دې ښکاروندوي کوي چې کاکاينو ته لاس رسی په دوامداره توگه مخ پر زياتېدو دی.»
په ټوله نړۍ کې د کرونا ويروس خپريدل د ټولنیزو بندیزونو باعث شول او پر تجارت او سفر یې هم اغیز وکړ. خو په اروپا کې په دې وروستيو کې د کوکاينو د نیولو پېښو وښووله چې د جنوبي امريکا د مخدره موادو پلورونکو د خپل تجارت د دوام لارې موندلې دي.
د تیرې اوونۍ په سر کې د آلمان پوليسو په هامبورگ ښار کې ۱،۵ ټنه کوکاين ونيول چې تر دې د مخه په دې شمالي بندري ښار کې هيڅکله دومره زيات مخدره مواد نه وو نيول شوي. د ۳۰۰ ميليونه یورو په ارزښت دغه مخدره توکي په کانتنري بیړۍ کې د وريجو د بوجيو ترمنځ موندل شوي ول.
د يورو پول د اټکلونو په حواله د اروپا له اټکل شويو څلورو ميليونو کوکاين کارونکو څخه یې ۹۰ سلنه په آلمان، ايتاليا، هالند، هسپانيا او بريتانيا کې دي.
bs/nz (DW English)
زموږ له آرشيف څخه:
د لاتین امریکا د مافیایي بانډونو تر ټولو خطرناک مجرمان
په دې انځوریز رپوټ کې تاسې ته د لاتین امریکاد نشه یي توکو او مافیایي بانډونو تر ټولو خطرناکې څیرې درپيژنو. ځنې له دوی څخه اوس هم په زنداننو کې دي.
انځور: picture-alliance/dpa/M. Guzmanد مکسیکو د سینالوآ په نوم ډلې مشر ګزمان، چې خلک یي ایل چاپو بولي په وار وار د خبرونو په سرټکو کې ځای نیولی دی. نوموړی دوه ځله له زندان څخه په تیښته بریالی شوی هم دی. د FBI او انټرپول په لیست کې تر اوسامه بن لادن وروسته دویم نوم د ده وو. ګزمان د پيسو سپينولو، سړي تښتونې، د مخدره توکو د پلورنې او قتل په پيښو کې په ښکیلتیا تورن په ۲۰۱۷م کال کې امریکا متحده ایالاتو ته سپارل شوی وو.
هیکټور پالما سالازار یا ایل ګوئیرو
سالازار د «ایل چاپو» تر ټولو مهم ملګری وو. نوموړی په ۲۰۰۷ م کال کې د کوکائنو د قاچاق په جرم امریکا ته سپارل شوی وو. د ایل ګوئیرو سزا د هغه د ښو اخلاقو له امله کم کړای شوې وه. هغه د ۱۶ کلونو پر ځای تر ۹ کلن بند وروسته د کولورادو له زندان څخه آزاد او مکسیکو ته وشړل شو. هغه اوس په مکسیکو کې د قتل د جرم له امله د التپلانو په زندان کې چې د سختو امنیتي تدابیرو درلودونکی دی بندی دی.
ګلبیرتو او میګیل رودریګیز اوریخوئیلا
میګیل او ګلبیرتو رودریګیز تر ۱۹۹۵م کاله پورې په کولمبیا کې د «تور» په نوم ډلې مشران وو. د دوی د همکارۍ له کبله پولیس وتوانیدل چې پابلو ایسکوبار هم ونیسي. دغه دواړه وروسته امریکایي چارواکو ته سپارل شوي وو چې په ۲۰۰۶ کې په عمري بند محکوم شول. میګیل د سويلي کارولینا او ګلبیرتو د شمالي کارولینا په زندانونو کې بندیان دي.
دیئیګو مونتویا سانچیز(ډون ډیئیګو)
د امریکا د داخلي استخباراتو FBI د مطلوب ترين کسانو په نوملړ کې د ده نوم په ۱۰ مقام کې ځای درلود. ډون ډیئیګو په ۱۹۹۰ لسیزه کې په کولمبیا کې د «نورتې دیل ویا» مافیایي ډلې مشري کوله. هغه په ۲۰۰۷م کال کې د کولمبیایي پوځ له خوا تر نیول کیدو یو کال وروسته امریکا ته وسپارل شو. په ۲۰۰۹م کال کې د مخدره توکو پر پلورلو، قتل او په زور د پيسو اخیستلو پر جرمونو اعتراف وکړ. هغه ته د ۴۵ کاله بند سزا اورول شوې.
خوآن کارلوس رامیریز آبادیا (چوپیتا)
د ایسکوباراس تر وژل کیدو او د رودریګیز د دواړو ورونو تر نیول کیدو وروسته د «چوپيتا» نوم ډیر اوریدل کیده. چوپيتا امریکا ته کوکائن قاچاق کول. هغه هم په ۲۰۰۷م کال کې په برازیل کې تر نیول کیدو وروسته امریکا ته وسپارل شو. ده ته د ۵۵ کاله بند سزا واورول شوه. هغه د خپل د مخ د بڼې بدلولو له پاره څو جراحي عملیاتونه کړي وو.
ایډګر والدیز ولیارئیل «لاباریي»
ولیارئیل له ایل چاپو سره نږدې اړیکې درلودلې. ده ته په مکسیکو کې د نشه یي توکو تر ټولو خطرناک او ظالم قاچاقبر ویل کیږي. نوموړی په ۲۰۱۰م کال کې په مکسیکو کې ونیول شو او په ۲۰۱۵م کال کې امریکا ته وسپارل شو. والیاریئل چې په ۴۹ کلن بند محکوم شوی اوس په زندان کې دی.
ساندر اویلا بیلتران چې د پاسیفیک په ملکې مشهوره ده، د مکسیکو هیواد پورې تعلق لري. دې ته د مکسیکو د سینالوآ او د کولمبیا د «نورتي دیل ویا» ترمنځ د یوه مهم ارتباطي کس په سترګه کتل کیده. په محاکمه کې پر دې کوم جرم ثابت نه شو، خو د غیر قانوني وسلو ساتلو په جرم کې په ۲۰۱۳م کال کې د میامي یوې محکمې په نږدې شپږ کال بند محکومه کړه. اوس دا د یوې آزادې تبع په توګه ژوند کوي.
نوموړی یو وخت د ایل چاپو ګزمان، یو تر ټولو نږدې ملګری ګڼل کیده خو وروسته یي بیا ډیر سخت دښمن شو. ده د مکسیکو د سینالوآ ډلې پر وړاندې ډیره خونړۍ جګړه هم کړې وه. الفریدو بیلتران لیوا، په ۲۰۰۸م کال کې په مکسیکو کې ونیول شو او په ۲۰۱۴ م کال کې هغه په امریکایي زندان کې وو. نوموړی د مخدره توکو د کاروبار په جرم کې د کولمبیا ښار په یوه زندان کې د خپل عمري بند سزا تیروي.
داماسو لوپيز(ایل لیسینسیادو)
ایل لیسینسیادو یو وخت د پوئنتي ګراندې په نوم زندان مرستیال وو. ایل لیسینسیادو په ۲۰۰۱م کال کې له ایل چاپو سره له زندانه په تیښته کې مرسته او همکاري کړې وه. وروسته له هغې دغه تحصیل یافته کس د ګزمان یا ایل چاپو د تر ټولو نږدې او د باور وړو کسانو په لیست کې شامل شو. نوموړی په ۲۰۱۷م کال په مکسیکو کې تر نیول کیدو وروسته امریکا ته وسپارل شو. د کوکائنو د قاچاق په جرم هغه د عمري بند سزا تیروي.
ویسینتی زمبلادا (ایل ویسینتیلو)
نن سبا د سینالوآ ګینګ مافیايي ډلې مشري اسمعیل زمبلادا کوي چې ویسینتی د هغه زوی دی. نوموړی په ۲۰۰۹م کال کې ونيول شو او درې کاله وروسته امریکایي چارواکو ته وسپارل شو. ایل ویسینتیلو د ایل چاپو پر ضد دوسیه کې له امریکایي چارواکو سره مرسته کوي او له همدې امله ده ته د ۱۵کاله بند سزا اورول شوې وه. خو هغه بیا د څلور کاله بند تر تیرولو وروسته آزاد کړای شو؟
