استرالیا تر اوسه پورې په افغانستان کې خپل ۴۱ عسکر له لاسه ورکړي دي. دغه هیواد چې اوس په افغانستان کې ۲۵۰ سرتیري لري پتېيلې يې ده چې ۲۰ تنه نور عسکر به هم افغانستان ته ولېږي.

تورنبال اوس په یوه ناڅاپي سفر افغانستان ته رسیدلی دی. هغه په کابل کې د خپل هیواد په سفارت کې د خبرو پر مهال له خپلې دې پریکړې څخه چې په افغانستان به د خپلو سرتریو شمیر زيات کړي، دفاع وکړه.

دا په داسې حال کې ده چې تیره اوونۍ هغه د ولسمشر اوباما هغه غوښتنه چې استرالیا دې په عراق او سوريه کې د اسلامي دولت پر ضد جګړه کې خپله ونډه زیاته کړي، رد کړې وه.

مالکوم تورنبال وویل: «رښتیا خبره خو دا ده چې په ۲۰۱۶م کال کې نړۍ دومره سره نزدې شوې ده چې يو له بل سره هيځ لیري نه ده. نړۍ دومره سره نښتې ده چې تر دې مخکې بل هیڅ وخت هم داسې نه وه. دا ډیره مهممه خبره ده چې موږ په دې خبره پوه شو چې امنیت یوه نړیواله موضوع ده.»

په همدې حال کې افغانستان، پاکستان، چین او امریکا متحد ایالات هڅه کوي چې له طالبانو سره د خبرو اترو له پاره لاره هواره کړي. طالبانو بیا خپلو بریدونو ته زور ورکړی دی او په هلمند ولایت کې یې د افغان امنیتي ځواکونو پر وړاندي سخته جګړه پيل کړې ده.

د استرالیا لومړی وزیر به د سه شنبې په ورځ په واشنګټن کې د امریکا متحدو ایالاتو له ولسمشر بارک اوباما، سره وویني. د دواړو مشرانو د خبرو اترو په اجند کې د منځني ختیځ امنیت هم شامل دی.