اسرائیل: د رفح بندر د فلسطیني غاړې کنترول مو ترلاسه کړ
۱۴۰۳ اردیبهشت ۱۸, سهشنبه
په دې اعلامیه کې راغلي دي چې د اسرائیل پوځ د ټانکونو ۴۰۱ قطعه د سه شنبې (د می میاشتې ۷ نیټه) په سهار د رفح سرحدي بندر ته داخله شوې ده.
د دغې اعلامیې پر اساس، ځانګړي ځواکونه د سیمې د بررسۍ په حال کې دي او عملیات په خاص ډول د رفح په ختیځه برخه کې د تیرې شپې راهیسې پيل شوي دي.
د اسرائیل پوځ ویلي دي: «اوس زموږ ځانګړي ځواکونه سیمه ارزوي... موږ د سیمې او سرحدي پولو عملیاتي کنترول په خپل لاس کې نیولی دی.»
د اسرائیل پوځ همدارنګه ویلي دي چې د اسرائیل او غزې تړانګې ترمنځ د کرم شالوم سرحدي پوله د سه شنبې په ورځ د امنیتي دلایلو له کبله په موقت ډول وتړل شوه او کله چې امینتي وضعیت اجازه ورکړي، بیرته به پرانیستل شي.
د اسرائیل پوځ یوه ویډیو خپره کړې ده چې لیدل کیږي یو ټانک د رفح بندر ته رسیږي. په دې ویډیو کې هیڅ بل کس یا نقلیه وسیله نه تر سترګو کیږي.
د اسرائیل پوځ د دوشنبې په ورځ ناوخته وویل په رفح کې یې «هدفمند بریدونه» ترسره کړي او د دغو عملیاتو په ترڅ کې یې د حماس د ۲۰ جنګیالیو د وژلو او درو تونلونو د کشفولو خبر ورکړی دی.