اسلامي دولت ډله له بمبار سره سره په پرمختگ کي ده
۱۳۹۳ مرداد ۲۱, سهشنبه![](https://static.dw.com/image/17842244_800.webp)
د امريکا د دفاع وزارت «پنتاگون» يو لوړ پوړي جنرال، وليام مايويل وويل چې د عراق په شمال کې د امریکا د هوايي ځواک بريدونو د «اسلامي دولت» ډلي پرمختگ ورو کړی دی، خو هغه کولاي نه شي چي ووايي آيا دغو بريدونو د نوموړي ډلي تحرک مات کړی دی که نه.
جنرال مايويل وويل: «د اسلامي دولت نومي ملېشې په دې لټه کې دي چي نوري سيمي هم ونيسي. د ځايي پوليسو د معلوماتو له مخي دغو ملېشو د بغداد په شمال ختيځ ۱۱۵ کيلومترۍ کې د جلاله ښار نيولی دی.
د دوشنبې په ورځ هم امريکايي جنگي الوتکو د عراق په شمال کې د «اسلامي دولت» ملېشو پر مرچلو باندي بمباريو ته دوام ورکړ. د پنتاگون د يو رپوټ له مخي د دغو ملېشو يو کتار چې غوښتل ېې اربيل ته نژدې پر کردي جنگيالانو بريد وکړي، بمبار شوی دی.
پنتاگون وويل، پلان نه لري چي د اوسنيو عملياتو چې د کردانو په ښار اربيل کې د امريکايي اتباعو او په سيمه کې د يزيدي مذهبي اقليت د ساتني له پاره کيږي، لمن پراخه کړي.
په عيني وخت کې د متحده ايالاتو د بهرنيو چارو وزرات په واشنگټن کې خبر ورکړی دی چې متحده ايالات به کردي جنگيالان «پيشمرگ» په وسلو سمبال کړي. په تيرو ورځو کې پيشمرگ د «اسلامي دولت» ډلي له ملېشو سره سخته جگړه کړې ده.
د پيشمرگ له پاره امريکايي وسلي
د متحده ايالاتو د دفاع وزارت يوي وياندي وويل چې پيشمرگو ته د وسلو ليږدول تيره اونۍ پيل شول. دغي وياندي چې نوم يي نه دي ښودل شوي وويل: «د متحده ايالاتو حکومت د عراق له حکومت سره همکاري کوي، څو «کردانو ته وسلې ورکړي، ځکه هغوی اوس وسلو ته اړ دي.»
پيشمرگ په ښو وسلو سمبال نه دي، په همدي وجه د اگست مياشتي په پيل کې نه وتوانيدل چې د «اسلامي دولت» نومي ډلي د ملېشو د حملو مخه ونيسي.
د دغو سني افراطيانو د هجوم له امله د عراق د شمال اوسيدونکي په خاصه توگه يزيديان او مسحيان له خپلو کورونو څخه تښتېدلو ته مجبوره شول.
په غرنو کې د کډوالو دېره کيدل
په آلمان کې د يزدي اقليت د مرکزي شورا د معلوماتو له مخې د عراق په شمال کې د سنجار سيمي په غرونو کې کابو ۴۰ زره يزديان ديره شوي او اوس په امن کې دي. دغه راز د موسول ښار په لوېديځه غرنۍ سيمه کې۴۰ زره نور يزيديان مرستو ته انتظار باسي.
د عراق په شمال کې يزيديانو ته مرستي
په عراق کې د ملگرو ملتو استازي، الينا نبا وويل چې دغه کډوال د ژوند له خطر سره مخامخ دي. د يزدي استازو د ويناوو له مخي په غرنۍ سيمه کي د سختي تودخې له امله يو شمير انسان له تندي مړه شوي دي.
د ژغورني عمليات پلان شوي
امريکايي الوتکو په غرنۍ سيمه کې کډوالو ته د مرستي کڅوړي ور غورځولي دي. د ناخوال وضعيت له امله امريکا اوس د ژرغورني د ستر پلان په لټه کې دی.
د متحده ايالاتو د ملي امنيت مرستيال مشاور، بن ردويز رويترز خبري آژانس ته وويل: «ځيني لاري چاري نيولې شوي دي چې څرنگه د سينجار ولسي وگړي وژغورل شي. د CIA پخواني کارپوه، کين پولاک وويل چې يو امکان دا دی چي د کردي پيشمرگو په مرسته د «تيښتي يو دالان» جوړ کړای شي.
پولاک وويل: «دا ځکه چي کډوال کولای نه شي ډيره موده په غرنو کې پاته شي. د متحده ايالاتو د ويناو له مخي ځينو نورو هيوادونو، لکه استرآليا، بريتانيا او فرانسې هم کډوالو ته د مرستو وړانديز کړی دی. د متحده ايالاتو د دفاع وزير، چاک هيگل وويل: «موږ د خپلو شريکانو ترمنځ د همغږې کار پيل کړی دی.»