په لسګونو زره افغانان د چهارشنبې له ماښام راهیسې کله چي يې لوبډلې په نیپال کې هندۍ لوبډلې ته په پای لوبې کې ماته وکړه جشنونه کول. په پلازمینه کابل او د افغانستان په ډیر شمیر نورو ولایتونو کې دغه بریاليتوب په بي ساري توګه ولمانځل شو.
یوازې ولسي خلک نه وو چې له هوايي ډګرڅخه یي تر غازي لوبغالي پورې خپله لوبډله بدرګه کوله بلکه له سیاست والو نیولي، د پارلمان تر غړو، د کابیني وزیرانو او د بهرنیو هیوادونو دیپلوماتانو هم افغان لوبډله تر غازي ستیدیوم پورې بدرگه کړه. د افغانستان ولسمشر حامد کرزي، هم په هوایي ډګر کې له لوبغاړو سره وکتل او هغوی ته یې د هر راز مالي او تخنیکي امکاناتو د برابرولو ډاډ ورکړ. کرزي وویل چې افغانانو له دغې اتلولي سره نړۍ ته وښوله چې دوی پرمختګ کولای شي . ولسمشر وویل: «نن د افغانستان د ځوانانو بریاليتوب ټولو افغانانو ته مبارکي وایم. هغوی وښوله چې افغانان د پرمختګ وړتیا لري او کولای شي چې په هر ډګر کې بریاليتوب تر لاسه کړي.»
انځورونه: د افغانستان د بریا لمانځنه
تر هغه وروسته چې افغانستان په نیپال کې د سویلي اسیا هیوادونو جام وگاټه په ټول افغانستان کې خلکو دغه بریا ولمانځله. افغانان سړکونو ته راووتل، ډولونه یې ووهل، اټنونه یې وکړل او خپلو لوبغاړو ته یې مبارکي ووایله.
انځور: Hoshang Hashimiفغانستان د هندوستان پر وړاندې د سویلي اسیا د هیوادونو د جام په پای لوبه کې برلاسې شو او په دې ترتیب سره د دغه جام اتل شو. افغانانو د دغې بریا ډیر تود هرکلی وکړ.
دا د فوټبال په ډگر کې د افغانستان لومړۍ نړیواله اتلولي ده. افغانستان په ۲۰۱۱ کال کې هم د سویلي اسیا د هیوادونو جام پای لوبې ته رسیدلی وو.
د افغان لوبډلې په بریا کې گول ساتونکي منصور فقیریار ډیر مهم نقش ولوباوه. افغانانو د دغه لوبغاړي ډیره ستاینه کړې ده.
افغان لوبغاړي د پنجشنبې په ورځ کابل ته ورسیدل.
یو شمیر افغان چارواکي د افغانستان د ملي تیم لوبغاړو د هرکلي له پاره هوايي ډگر ته تللي ول.
افغان ولسمشر حامد کرزي هم په هوایي ډگر کې د افغان لوبغاړو هرکلی وکړ.
ولسمشر کرزی د تل به خلاف د سیاسي مسایلو په اړه نه بلکې د سپورت په هکله وغږید او له ورزشکارانو سره یو ځای یې خوشحالۍ وکړې.
د هوایي ډگر پر سړک خلک د افغان لوبغاړو د هرکلي له پاره ولاړ دي.
افغان له خپلې لوبډلې سره یوځای له هوایي ډگر څخه د کابل د فوټبال د ستیدیوم په لور ولاړل.
په دغه جشن کې د افغانستان د بیلابیلو ولایتونو اوسیدونکو گډون کړی وو.
افغانانو به دغه جشن کې د پولیسو د ونډې ستاینه وکړه. په ځینو ځایونو کې ان خلک د پولیسو په موټرو کې د جشن سیمې ته ولیږدول شول.
په دغه جشن کې ډیرو ښځو گډون نه وو کړی خو بیا هم هغوی له خپلو کورونو او نورو ځایونو څخه په دې خوښۍ کې ونډه واخیسته.
د افغان لوبډلې بریا د ټولو له پاره خوښي ډالۍ کړه. د سړک د غاړې له کارگرو نیولې، بیا د ښوونځې تر زده کوونکو پورې په دغه جشن کې ونډه واخیسته.
ډیر شمیر افغانانو له ځان سره د خپل هیواد بیرغونه لیږدول.
د پنجشنبې په شپه هم ډیر شمیر افغانان سړکونو ته راوتلي ول.
تر دې مخکې هیڅ کله هم افغانانو دومره ډیر بیرغونه له ځان سره نه ول لیږدولي.
د افغان لوبډلې بریا په ټول افغانستان کې له خلکو ناامني او جگړه هیره کړه.
پر کابل سربیره د افغانستان په نورو ښارونو کې هم افغانانو د خپلې لوبډلې بریا ولمانځله.
په هرات کې هم د شپې ډیر کسان سړکونو ته راوتلي ول.
د ورزش په ډگر کې بریا تل افغانانو ته خوښي وربخښي.
په افغانستان کې د فوټبال د ملي لوبډلي بي سارې ستایني دا وښوله چې افغانان له هر راز توپیر پرته د ملي مسایلو په باب هم فکره او هم نظره دي. د کابل غازي لوبغالي ته راغلو څو تنو ځوانانو چې له ډیري خوشهالۍ یي خپل احساسات نه شوای کنترولولای له دویچه ویله سره په خبرو کې وویل چې د لوبغاړو د ستایلو له پاره د سلهاو زره کسانو را ټولیدل چې په هر قوم او ژبي پوري تړاو لري دا ښيي چي داسي لوبي د ملي یووالي په ټینګښت کې چې افغانان ورته سخته اړتیا لري ډیره مرسته کولای شي.
محمدالله یو له هغو ځوانانو څخه وو چې غازي ستیدیوم ته د افغان لوبډلې د تشویقولو له پاره راغلی وو. هغه چې د افغانستان بیرغ یي په لاس کې لاره او پر خپل بدن یي هم د افغانستان تور سور او زرغون بیرغ کښلي وو وویل چې افغانان کولای شي د دغه شان سیالیو په تر سره کولو سره له هغو ملکونو سره هم د سیاسي اړیکو په ښه کولو کې کارنده واقع شي چي نن سبا ورسره افغان دولت لانجي لري. محمد الله وویل: «ورزش په نړۍ کې د سولې پیغام راوړونکی دی. تاسو ووینئ موږ له هغو ملکونو سره چې سیاسي لانجې لرو له لوبغاړو سره یې لوبې کوو چې زموږ اړیکې ښې کولای شي.»
د ملي شورا یو شمیر غړي هم په غازي لوبغالي کې راټول شوي ول. د دغې جرګې غړې ناهید فرید، وویل چې هیله لري افغانستان په نورو برخو کې هم د فوټبال په څیر لاس ته راوړنې ولري.
د المپیک د ملي کمیټي د مشرتابه په وینا تر اوسه پورې څه نا څه یو میلیون ډالر د بیلا بیلو سوداګرو، حکومتي چارواکو، ولسي جرګې د غړو او عادي افغانانو له خوا د فوټبال ملي لوبډلي ته د ډالیو په توګه راټولې شوې دي.
