د کرکټ په دې سیالیو کې د کرکټ د نړیوالې شورا د دویمې درجې هیوادونو له ډلې څخه د افغانستان سربیره سکاټلند، ایرلینډ، هالنډ، نیمیبیا، عمان، هانګ کانګ او د کوربه متحده اماراتو ملي لوبډلو ګډون درلود.
د جمعې په ورځ (د ۲۰۱۷ کال د جنورۍ ۲۰مه نېټه) د دې سیالۍ په پایلوبه کې افغانستان د ایرلینډ سره مخامخ شو. ایرلینډ هم په نړیواله کچه یو له غښتولو لوبډلو څخه شمارل کیږي او په لومړي سر کې داسې انګیرل کیدل چې ایرلینډ به د افغانستان له پاره لوی هدف وټاکي. خو د افغان بالرانو توپ اچونکو ښې توپ اچونې د ایرلینډ لوبډله له ستونزو سره مخ کړه.
ایرلینډ لوبډله په ۱۳ اورونو کې یوازې د ۷۱ منډو په اخیستو سره ټوله وسوځیده او افغانستان ته یې د ۷۲ منډو هدف وټاکه. د افغانستان له خوا محمد شهزاد او نوروز منګل د لوبي میدان ته راغلل او یاد هدف یې یوازې په ۷ اورونو او ۵ توپونو سره پوره کړ. د یادونې وړ ده چې په دې لوبه کې محمد شهزاد ډیره تیزه لوبه وکړه او په ۴۰ توپونو یې نیمه سلیزه هم پوره کړه.
د دې لوبې غوره لوبغاړی محمد نبي وټاکل شو چې په خپلو دوو اورونو او دوو توپونو یې د ایرلینډ څلور لوبغاړي وسوځل. هیره دې نه وي چې د صحرا د سیالۍ غوره لوبغاړی هم محمد نبي وټاکل شو.
بل لوري ته دغه لوبه د افغانستان د کرکټ لوبډلې د پخوانې مشر او تکړه لوبغاړي نوروز منګل وروستی لوبه وه. نوروز منګل په دې وروستیو د کرکټ بورډ لخوا د لوبډلې د غوراوي د کمیټې د مشر په توګه ټاکل شوی او له ملي لوبډلې یې استعفا کړې.
د دې لوبې د لیدو له پاره په متحده اماراتو کې میشت افغانان د خپلې لوبډلې د تشویق له پاره لوبغالي ته ورغلي وو. د فرانسې خبري آژانس په حواله په متحده عرب اماراتو کې میشت کابو ۱۵ زره افغانان د دې لوبې د لیدو له پاره په لوبغالي کې وو.
پر ورته موضوع یو انځوريز البوم زموږ له آرشيف څخه (04.09.2013):
په هرات کي د نجونو د کرکت لوبډلو سيالۍ
په هرات کي په لومړي ځل د نجونو د کرکت سيالۍ پيل سوې. دغه سيالي د دغه ولايت د منتخب ټيم د غوره کولو له پاره ترسره سوې.
انځور: DW/Hoshang Hashemiدا لومړی وار دی چي په هرات کي د نجونو ترمنځ د کرکت سيالۍ ترسره کيږي.
په دغه سياليو کي د نجونو د شپږو ښونځيو لوبډلو په خپل منځ کي سيالۍ کړي چي د لوبو په پای کي له دوی څخه يوه منتخبه لوبډله وټاکل سوه.
دغه سيالۍ د هرات ولايت د نجونو په هاتفي ليسه کي ترسره سوې.
د دغو سياليو مسئولي ديانا نارکزی رسنيو ته وويل چي سيالۍ د امریکا متحده ايالاتونو د سفارت په مالي ملاتړ پيل سوې.
دغه سياليو ته د هرات ولايت د مختلفو ښوونځيو ۱۰۲ تنو تمرينونه وکړل چي سياليو ته تياري سي.
دغه سيالو ته تياری شپږ مياشتي دوام وکړ. دوی ټول لازيم امکانات او ورزشي لباس ورکړل سوی وو.
دغه پروسه د افغانستان د نجونو د کرکت د پراختيا موسسې له خوا پر مخ يووړل سوې.
د دغه سيالو مسئولين وايي چي اوس د هرات ولايت د نجونو د کرکت منتخبه لوبډله وټاکله سوه.
دغه سيالۍ د افغانستان د کرکت بورد د هيئت تر څار لاندي ترسره سوې. دغه بورد د هرات د نجونو د کرکت دغه شپږ لوبډلي په رسميت پيژندلي دي.
که څه هم مخکي تر دې په هرات کي د نجونو د کرکت دومره زياته علاقه نه وه خو د دغه سياليو تر ترسه کيدو وروسته يې اوس هلته مينوال ډېر سوي دي.
په هرات کي د نجونو د کرکت مسئوله وايي چي اوس هم په دغه ولايت کي د نجونو ورزش ته ډېره زمينه نه ده برابره.
په هرات کي د ورزش مسئولين وايي چي په دغه ولايت کي ټولنيزي ستونزي هم د نجونو د ورزش په مخ کي خنډ دي.
په افغانستان کي د کرکت له پاره ډير ميدانونه نه دي جوړ سوي ولي دغه لوبه بيا هم د نارينوو په برخه کي په نړيواله کچه ډيري برياوي لري.
په هرات کي د سياليو په پای کي برياليو لوبډلو ته کپونه او مډالونه ورکړل سول.
د دغو سياليو نندارې ته ته د ښوونځيو پر زده کوونکو سربيره نور ننداره کوونکي هم ورغلي ول.
د لوبو په پای کي غوره لوبغاړو ته جايزې هم ورکړل سوې.
