په دې اړه دقيق معلومات نه شته چې په ټوله نړۍ کې څومره ماينونو لا ښخ دي. خو اټکل کيږي چې دا به يو ميليون وي. د جنګونو دا پاته شوي د انسانانو ژوند ګواښي. د «اوتاوا تړون» يا په اصطلاح د اوتاوا کنوانسيون چې د ماينونو پر کارولو، ساتلو، توليد او تجارت بنديز لګول غواړي، ۱۶۲غړي لري.

ګل ته ورته د ماين پاکۍ دا آله د باد په زور چليږي: د «ماين چاودني» په نوم دا آله يوه افغان مسعود حسيني، چې په هالند کې ژوند کوي، جوړه کړې ده. دا ګردي شکل لرونکي ۱۷۵ پلاستيکي غابونه لري چې د باڼس په اوږدو لرګو پورې تړل شوي دي. دا آله په ساحو کې د باد په زور چليږي او ماينونو چوي.

حسيني ته د «ماين چاودونکی» جوړولو فکر د لوبو د هغه شي ور پيدا شو چې ده ورسره په ماشوماتوب کې لوبې کړي وې او دا هم په باد چليده. د هالند د دفاع وزارت په برکت دا آله اوس په آزمايښتي پړاو کې ده او لا پراختيا ورکوله کيږی. د څيړونکو يوه ډله دمګړۍ د دې ډيزاين په ښه کولو بوخته ده څو دا آله نه يوازې لا پسې خوندي شي، بلکې په هر ډول ساحو کې ښه کار ورکړي.

حسيني (ښي اړخ ته) د يوه «ماين چاودني بې پيلوټه الوتکې» په جوړولو هم بوخت دی چې ماينونه به د يوه سنسور په مرسته کشف کوي او د يوه بازو په واسطه به يې يوه خوندي ځای ته انتقالوي او هلته به يې چوي. د حسيني په حواله دا اختراع چې لا اوس په آزمايښتي مرحله کې ده د اوسنيو تخنيکونو په پرتله ډيره چټکه او ارزان بیه ده.

د بيلجيم يوه غیر دولتي موسسه ماين موندونکې مږي روزي چې په ډيرو هيوادونو کې به ترې د ماين پاکۍ په برخه کې کار واخيستل شي. مږې چې ډير ښه شامه حس لري، د ټي اين ټي د چاوديدونکې مادې د موندلو روزنه ورته ورکول کيږي. دا کار به ماين موندنه چټکه کړي. د «اپودو» په نامه دې اين جي او ويلي چې د ماين موندلو په ترڅ کې تر اوسه يوه مږه هم نه ده تلف شوې.

نه يوازې مږې د ماينونو له پاره ښه پزه لري، بلکې سپي هم دا کار په ډير ښه شان سره کولای شي. تر څو مياشتني روزني وروسته سپي چاوديدونکي مواد کشف کولای شي. «مارشل ليګيسي انستيتوت» په لومړي ځل په ۱۹۹۹م کال کې د سپو دا پروګرام رامنځته کړ. له هغه راهيسې د سپو په مرسته کابو ۴۵ مربع کيلومتره ځمکه خوندي ګرځول شوې. دمګړۍ په ټوله نړۍ کې تر۹۰۰ زياتو سپو څخه د ماين پاکۍ په برخه کې کار اخيستل کيږي.

دا ماشين داسې ښکاري لکه يو ټانک او تريشل چې سره يو ځای کړل شوي وي او دا کار هم همداسي کوي. د «آردوارک» په نوم د ماينونو شنډولو دا ماشين له ۷۲ زنځيرونو سره په ځمکه کې ښخو ماينونو ته چادونه ورکوي، بې له دې چې ماشين ته زيان ورسي.

ماينونه چې يو ځل په ځمکه کې ښخ کړل شي، تر۵۰ کالو هم زياته موده فعال پاته وي. په دې ترتيب ماينونه د مهاجرو او بې ځايه شويو بيرته دې سيمو ته د ستنيدو پروسه هم ورو کوي او تر جنګونو وورسته د بيارغوني او پراختيا مخه هم نيسي.

اوس يوازي په يولسو هيوادونو کې چې چين او روسيه هم پکښې شامل دي، ماينونه توليديږي. د ماينونو پر ضد مبارزه کې يو ستر ګام د اوتاوا کنوانسيون له عملي کيدو سره پورته کړل شو. خو تر څو چې ماينونه په ځمکو کې پراته وي او انسانان وژني او معلولوي یې، زموږ په مخکې لا ډيري ستونزي پرتې دي.

عبدالغفور افغانیار، هغه ځوان دی چې په ۱۳۸۹ لمریز کال کې يې د افغانستان په ملي پولیسو کې دنده پیل کړه.

هغه په لومړي سر کې په پولیسو کې معمولي دنده درلوده او په هلمند ولایت کې یې کار کاوه.

عبدالغفور چې کله په دې پوه شو چې ماینونه او بمونه د ملکي کسانو د سترې مرگ ژوبلې سبب گرځي، نو د چاودیدونکو توکو د شنډولو څانگې ته ورغی.

امریکایي ځانگړو ځواکونو هغه ته په لنډه موده کې روزنه ورکړه او د ماینونو په شنډولو یې پیل وکړ.

عبدالغفور، تر همدا تیرو اتو میاشتو پورې په تشو لاسونو بمونه شنډول. هغه وایي چې یوه ورځ یې آن تر ۴۰۰ ماینونه شنډ کړي دي، چې د طالبانو په یوه ډیپو کې کشف شول.

عبدالغفور له هغه وخته چې د ماینونو د شنډولو په برخه کې په کار پیل کړی دی، په دې توانیدلی دی چې تر شپږو زرو زیات ماینونه، بمونه او چاودیدونکي توکي شنډ کاندي.

د افغانستان د کورنیو چارو وزارت په وروستیو وختونو کې د هغه کار وستایه او هغه لومړي ساتنمن رتبې ته ترفیع وکړه. په دغه انځور کې عبدالغفور د افغانستان د کورنیو چارو وزارت د امنیتي معین جنرال محمد ایوب سالنگي سره لیدل کیږي.

د سیمي خلک وایي چې عبدالغفور د چاودیدونکو توکو په شنډولو سره د ډیرو خلکو ژوند ژغورلی دی.

هلمند د افغانستا يو له ناامنو ولايتونو څخه دی چې تل پکښې د یاغیانو له لوري ماینونه ځای پر ځای کیږي. زیاتره وخت ملکي کسان د دغو بمونو قرباني کیږي.

ځایي خلک عبدالغفور د یوه ځایي اتل په توگه پیژني او هغه ته ځانگړي احترام لري.