په داسې حال کې چې له میانمار څخه ان تر ونزویلا پورې، دیموکراسي له ګواښ سره مخامخ ده او زور واکي مخ په ډیریدو ده، په ملګرو ملتونو کې بیا د روسیې له لوري پر اوکراین باندې د پوځي حملې په هکله خبرې کیږي. بل لوري ته بیا له اوکراین څخه زرګونه کسان د جګړو د شدت له ویرې او د خوندیتوب له پاره خپل هیواد ترک کوي.

په ملګرو ملتونو کې پر اوکراین باندې د روسیې د پوځي حملې په تړاو تر بحثونو وروسته اوس له اوکراین څخه د روسیې د وتلو په هکله رایه اچول کیږي. په ملګرو ملتونو کې دغه پریکړه ليک الزامي بڼه نه لري خو که چیرته هغه تصویب شي نو په نړیواله سطحه به د روسیې خلاف وکارول شي او روسیه به د انزوا خوا ته یوسي. د دې مسودې د تصویب له پاره په ملګرو ملتونو کې دوه پر درې رایه ترلاسه کول لازم دي او ټاکل شوې افغانستان به هم په دې موضوع کې خپله رایه کاروي.

پوتین د تیرې فبرورۍ میاشتې پر ۲۴مه نیټه پر اوکراین باندې پراخ پوځي برید وکړ خو روسیې بیا دغه اقدام د ملګرو ملتونو د منشور د ۵۱ مادې په اساس د ځان دفاع ګڼلی دی. د روسیې دغه دریځ د غربي هیوادونو له لوري رد شوی دی او د روسیې حکومت یې د ملګرو ملتونو د منشور د ۲مې مادې په ماتولو تورن کړی دی په کوم کې چې د ملګرو ملتونو غړي هیوادونه ژمن دي چې د شخړې د هواري له پاره به د ځواک څخه کار نه اخلي.

په ملګرو ملتونو کې د دغې قطعنامې متن له اوکراین سره په همغږۍ اروپايي هیوادونو چمتو کړی دی چې د معلوماتو له مخې په تیرو څو ورځو کې پکې ډیر تغیرات هم راوستل شوي دي. د مسودې په نهايي متن کې پر اوکراین باندې د روسیې د یرغل «غندنه نه ده شوې» بلکې اوس پر اوکراین باندې د روسیې د فدراسیون تیری د ژور غم وړ بولي. په دغه مسوده کې همدا راز د پوتین له لوري د اتومي وسلو د تیارسي د اقدام غندنه هم شوې. څه موده وړاندې روسیې خپلو اتومي وسلو ته د تیارسي امر وکړ چې په غربي هیوادونو کې یې سخت غبرګرونونه هم را وپارول.

په ملګرو ملتونو کې د دوشنبې او سه شنبې ورځو (۲۸ فبروري او ۱ د مارچ) په غونډو کې د نړۍ نیږدې ټولو مشرانو د جګړې غندنه وکړه او د پوځي شخړو د پراخیدو پر خطرونو باندې یې خبر وکړې. په دې ترڅ کې یو شمیر هیوادونو د روسیې د بهرنیو چارو د وزیر د خبرو پرمهال د غونډې تالار هم ترک کړ او د روسیې پر وړاندې یې اعتراض وکړ.

افغانستان هم خپله رایه کاروي

په ورته وخت کې د افغان ډپلوماتانو په حواله، ټاکل شوې چې افغانستان او میانمار به په دې غونډه کې د قطعنامې په ملاتړ رایه وکاروي. د طالبانو په حاکمیت کې افغانستان او د میانمار حکومت چې د پوځ له لوري اداره کیږي، په ملګرو ملتونو کې د پخوانیو حکومتونو د استازو په واسطه د خپلو هیوادونو استازولي کوي.

طالبانو او میانمار ملګرو ملتونو ته خپل استازي وړاندیز کړي وو خو تر اوسه پورې دغه سازمان هغوی په رسمیت نه دي پیژندلي.

د فرانسې خبري آژانس د لومړینو معلوماتو له مخې، افغانستان او میانمار چې یو ځای دی، ټاکل شوې د ممتنع یا مخالفې رايې پر ځای، د قطعنامې په ملاتړ رایه ورکړي. تر اوسه پورې د ملګرو ملتونو د ټولو غړو ۱۹۳ هیوادونو له ډلې نیږدې ۱۰۰ هیوادونو یې ملاتړ کړی او اروپايي هیوادونه اوس هڅه کوي چې دغه قطعنامه تصویب کړي. دا په داسې حال کې ده چې د طالبانو د بهرنیو چارو وزارت د یوې اعلامیې په خپرولو سره له روسیې او اوکراین څخه غوښتي چې زغم وښيي او زیاتوي چې «ټولو لوریو ته په کار ده چې له داسې دريځونو ډډه وکړي چې د جګړې د شدت لامل کیږي.»