په افغانستان کې د کرونا پر ویروس د اخته کسانو شمیر ورځ تر بلې مخ پر ډریدو دی. د افغانستان د روغتیا وزارت د دوشنبې په ورځ (د اپريل ۶مه) اعلان وکړ چې په تیرو ۲۴ ساعتونو کې په هرات او کابل ولایتونو کې ۳ تنو د کرونا ویروس له امله خپل ژوند له لاسه ورکړی دی او ۳۰ نوي مثبتې پيښې ثبت شوي دي.
د روغتیا وزارت ویاند وحیدالله مایار وایي چې په دغه هیواد کې د کوویدـ۱۹ پر ناروغۍ د اخته کسانو شمیر۳۶۷ تنو ته رسیدلی دی او د یوه داکتر په ګډون ۱۱ تنو خپل ژوند له لاسه ورکړی او ۱۸ تنه نور بیا له دې ناروغۍ رغیدلي دي.
د افغانستان د روغتیا وزارت په حواله د کرونا تر ټولو ډيرې مثبتې پيښې په کابل او هرات ولایتونو کې ثبت شوي دي. د دغه وزارت د معلوماتو له مخې هغه داکتر چې د کرونا ناروغۍ له امله یې خپل ژوند له لاسه ورکړی دی د کابل په یوه شخصي روغتون کې یي کار کاوه.
د روغتیا وزارت ویاند وحیدالله مایار وایي چې د دې روغتون مسئولینو د دې پر ځای چې دغه داکتر یې د کرونا ویروس د ناروغانو له پاره مشخص کړای شوي روغتون ته ور وستلی وای، پخپله یي د هغه د درملنې هڅه کړې وه چې د همدې بی پروایې په پایله کې یي ژوند له لاسه ورکړی دی.
مایار زیاتوي د دې روغتون ۲۰ تنه نور داکتران او روغتیایي کارکونکي چې له دې داکتر سره په تماس کې وو، مشکوک ګڼل شوي او ټیسټونه یي اخیستل شوي دي.
کرونا او د افغانستان تړلي او خالي ښارونه
په افغانستان کې د کرونا ويروس د مثبتو پيښو په ډيريدو سره حکومت په ځينو ولايتونو کې د دوکانونو تړلو امر کړی او خلکو ته سپارښتنه شوې چې په خپلو کورنو کې پاتې شي. خلک دغه امر څومره رعایتوي. د درو ښارونو انځورنه وګورئ!
انځور: DW/M. Spesalay کندهار يو د هغو ولایتونو څخه دی چې د کرونا ويروس مثبتې پيښې په کې ثبت شوي دي.
په کندهار ښار کي له شنبې ورځي راهیسي د کرونا د وژونکی ناروغۍ د مخنیوي په موخه پر کاروبار محدودیت لګول شوی دی.
لوېې مغازې او مارکيټونه ټول بند دي.
په دغو ورځو کې به په کندهار ښار کې یوازي د خوراکي توکو، سبزیجاتو او نان وایانو دوکانونه پرانیستي وي.
سربيره پر دې چې خلک یو مخ په خپلو کورونو کې ناست دي، خو د ښار په هره برخه کي نقليه وسايط ليدل کيږي.
په دې منځ کې يوه کندهاري ځوان د بندو دوکانونو مخې ته د لارې په سر خوليانې د خرڅلاو له پاره ايښي دي. خالي بازار ورته ښه موقع په لاس ورکړې خو بازار له مشتریانو هم خالي دي.
د کونړ ولايت مرکز اسد آباد
د قرنطین په دویمه ورځ د کونړ د مرکز اسدآباد ښار په شهیدانو چوک کې د موټرو او خلکو ګڼه ګوڼه.
د کونړ ولايت چارواکي د اسعد آباد ښار ته رواتلي او خلکو په کورونو کې پاتې کيدو سپارښتنه کوي.
قرنطين او د خلکو اوږود کتار
ټول خلک نشي کولای د مختلفو مجبوريتونو له وجې، قرنطين يا په کور پاتې کيدل څرنګه چې لازم دی رعايت کړي. په کونړ کې د نوي کابل بانک څانګې مخې ته د معاش اخستونکیو دغه اوږد کتار يې يوه بيلګه ده.
دا د کونړ د ولایت مقام ته نژدې د منډه کول چینې واټ دی. په دغه واټ کې اکثره دوکانونه تړلي دي خو خلک ګرځي.
ښاروالۍ د خلکو دوکانونه او سرايونه تړۍ خو خلک بیا هم په ښار کې ګرځي.
ځینې واټونه مکمل بند شوي دي.
په خوست بازار کې هم د کرونا ويروس د خپريدو د مخنيوي په موخه ښار بند دی.
چارواکي هڅه کوي چې د کرونا ويروس پر وړاندې مبارزه کې د قرنطين تر څنګ له نورو چارو څخه هم کار واخلي لکه د درملو شيندل.
د خوست ښار په دغه واټ کې ټول دوکانونه بند دي.
د قرنطين او ښارونو تړل که له یوې خوا د کرونا ويروس پر وړاندې ښه چاره ګڼل کيږي له بل لوري ډيرو خلکو ته د يوې مړۍ ډوډۍ ګتلو له پاره انديښنې پيدا کړي دي.
د ښار په ځينو برخو کې دوکانونه خلاص دي. ډيری خلک دا هم وايي چې په کورونو کې پاتې کيدو سره يې زړه تنکيږي.
تر ښځو ډیر سړي پر کرونا اخته دي
د افغانستان د روغتیا وزارت وايي چې پر کرونا ویروس د اخته کسانو ډيري یي نارينه دي. په افغانستان کې تر اوسه پورې ۲۷ سلنه د اخته کسانو ښځې او تر ۷۲ سلنه ډیر یي سړي تشکيلوي.
نوموړی وزارت د بیلګې په توګه یادونه کوي چې په هرات ولایت کې له ۲۵۴ اخته کسانو څخه ۱۶۶ یي نارينه او ۸۸ تنه یي ښځي دي.
شکیلا ابراهیم خیل: ش.ن/ ا.ا
