د کابل په بګرامي ولسوالۍ کې د مدني فعالانو لخوا د بې وزلو ماشومانو لپاره یو وړیا ښوونځی جوړ شوی دی چې په کې شاوخوا زر تنه زده کوونکي په زده ګړو بوخت دي.

د کابل په ختیځ، بګرامي ولسوالۍ اړوند د بتخاک په لیري پرته سیمه کې چې سلګونه ماشومان ښوونځي ته لاسرسی نه لري د مدني فعالانو لخوا د زده کړو یو سیار ښوونځی جوړ شوی دی.

د یادې سیمې د اوسېدونکو په وینا، د دوی ماشومان له دولتي ښوونځيو څخه محروم دي. ځکه په خپله سیمه کې تراوسه دولتي ښوونځي نه لري او نورو ښوونځیو ته د ماشومانو تګ ستونزمن دی.

د « Today Child» په نوم سیار ښوونځی چې د څو محصلانو او مدني فعالانو لخوا جوړ شوی، د کابل په دې سیمه کې په وړیا توګه ماشومانو ته د زده کړو زمینه برابره کړې ده.

د دې سیار ښوونځي مشر وزیر خان چې خپل عمر ۲۳ کلن ښیي او په وینا یې د خپلو لوړو زده کړو ترڅنګ له نورو همکارانو سره په ګډه بېوزلو ماشومانو ته یې تدریس پیل کړی. هغه له دویچه ویله سره په خبرو کې وویل: «ما به په کلیوالو سیمو کې ماشومان لیدل چې ښوونځي ته به نه تلل، د زده کړو زمینه به ورته نه وه برابره. نو ما له ځان سره تصمیم ونیوو چې د تعلیم پر برخه کې فعالیت شروع کړم.»

په دې سیار ښوونځي کې زده کوونکي په ازاده فضا کې زده کړې کوي. دوی لا هم د زده کړو لپاره لومړینو امکاناتو ته لاسرسی نه لري. یو تن زده کوونکی عابد وایي: «زه له څلورو میاشتو راهیسې دلته درس وایم. صنف نه لرو. استاد کله یو ځای او کله بل ځای موږ ته درس راکوي.»

وږمه یو بله زده کوونکې ده چې له لیک او لوست سره مینه لري او وایي چې ډېره خوشحاله ده چې زده کړې کوي. هغې وویل: «ما دلته ډېر شیان زده کړل او ډېره خوشحاله یمه.» بتخاک سیمه چې د کابل له مرکز څخه په ۱۷ کیلومترۍ کې پرته ده، ډېری اوسېدونکي یې په کرنې او مالدارۍ اخته دي.