په آلمان کې د پن (PEN) مرکز او د دارم شتت ښار، ۲۲ کلنې افغانې لیکوالې، مریم کشاورز ته تحصیلي بورسيه منلې ده. د پن يا د شاعرانو، شنونکو او ناول ليکوونکو د جلاوطنو لیکوالانو د مرکز استازې، استرید ویهستید د سه شنبې په ورځ په دارم شتت کې د اي پي ډي خبري آژانس ته وویل،  نوموړې لیکوالې چې واک ته د طالبانو له رسیدو مخکې لا خپلې مقالې یوازې له مخکیني سانسور سره خپرولې، د طالبانو تر واکمنۍ لاندې نور نه سو کولای کار وکړي.

د نوموړې په وینا د الیزابت وولفهایم د سکالر شیپ او هغې ته د آلمانۍ ویزې ورکول، آلمان ته د هغې داخلیدل ممکن کړل. پن آلمان، په کلتوري او رسنیزو چارو کې د آلمان د حکومت د کمیشنرۍ په ملاتړ، په مجموعي توگه ۱۵ تحصیلي بورسونه په جلاوطنۍ کې له ځورونې او تعقیب سره مخامخو ښځینه او نارینه لیکوالانو ته وړاندې کوي.

د بورسیې ترلاسه کوونکې آپارتمان او عاید ترلاسه کوي

د ویهستد په وینا، د دارم شتت په تحصیلي بورسیه یا سکالرشپ کې یو اپارتمان، میاشتنی عاید، او لارښوونه شاملیږي. هغه د یوه کال له پاره دوام کوي خو تمدید کیدای سي. ویهستد څرگنده کړه چې پن به د نوموړې لیکوالې له پاره غونډې او ژباړې تنظیم کړي. میرمن کشاورز په افغانستان کې د خلکو د ژوند د سختو شرایطو یوه ادبي کیسه لیکونکې ده. هغې له ځان سره ناچاپ سوي خطي نسخې راوړي دي.

 په افغانستان کې ښځې د زده کړو له سیستم او کار څخه منع کړای سوي دي. د الیزابت وولفهایم سکالر شیپ د هغې لیکوالې په نوم نومول سوی دی چې  په ۲۰۰۲ م کال کې په دارم شتت کې په همدغه نوم  مړه سوې ده او هغه څوک چې د پن له لارې یې تر سیاسي تعقیب لاندې لیکوالانو له پاره کمپاین کاوه.