د المان د پولیسو فدرالي ادارې په خبره د اکتوبر میاشتې له ۱۶ نیټې راهیسې له پولنډ، چک جمهوریت او سویس سره د المان د سرحدي کنترول سختولو په پایله کې دغه هیواد ته غیرقانوني مهاجرت ډیر کم شوی دی.
د ويلټ آم زونتاګ (Welt am Sonntag) ورځپاڼې د رپوټ پر بنسټ همدا اوس د ورځې له ۳۰۰ څخه لږ پناه غوښتونکي په غیر قانوني ډول د المان خاورې ته داخلیږي. د سرحدي کنترول له سختیدو مخکې پورې به په ورځ کې شاوخوا ۷۰۰ تنه په غیر قانوني ډول المان ته داخلیدل.
د ۲۰۲۳م کال د فیبرورۍ له میاشتې څخه المان ته د غیرقانوني مهاجرو راتګ زیات شوی وو. د پولنډ، چک جمهوریت، سویس او همدرانګه اتریش په سرحدونو کې د کتنرول تر سختیدلو یو میاشت مخکې، المان ته د ۱۸۴۹۲ تنو غیر قانوني راتګ موارد ثبت شوي وو.
د سرحدي کنترول تر زیاتیدو وروسته المان ته په غیر قانوني ډول د راتګ د ۱۱۰۲۹ مواردو رپوټ ورکړل شوی یا په بل عبارت دغه هیواد ته په غیر قانوني ډول د داخلیدو موارد، ۴۰ سلنه کم شوي دي. دغه کمښت بیا له پولنډ سره د المان په سرحد کې ۵۶ سلنه وو.
المان او د اروپايي اتحادیې هیوادونو ته د غیر قانوني مهاجرت کړکیچ او ورسره د مقابلې موضوع ته اوسمهال د المان په سیاسي محفلونو کې د لوړې کچې لومړیتوب ورکول کیږي. د المان حکومت پریکړه کړې ده چې هغه مهاجر به په بیړه اخراجوي چې په دغه هیواد کې د پاتې کیدو یا اقامې اجازه نه لري.
د روان کال د نومبر په دریمه نیټه د المان صدراعظم اولاف شولڅ او د کورنیو چارو وزیرې نانسي فایزر، ټینګار وکړ چې د اخراج پروسه باید ګړندۍ شي.
د جرمني صدراعظم اولاف شولڅ له شپیګل ورځپاڼې سره په یوه مرکه کېد اخراج سیاست سختولو څخه د خپل ملاتړ په هکله وویل: «مونږ باید په پراخه پیمانه هغه کسان چې په المان کې د اقامې اجازه نه لري، اخراج کړو. هر څوک چې په المان کې د راتلونکي له پاره لیرلید نه لري، باید بیرته ستون شي.»
د المان ولسمشر فرانک والټر شټاینمایر هم مخکې تر دې د لومړي چينل تلویزوني شبکې ته ویلي وو چې یوازې په هغه صورت کې د غیرقانوني مهاجرت محدودیت عملي کیدلی شي چې المان د اروپايي اتحادیي له ټولو هیوادونو سره په ګډه بهرني سرحدونه کنترول کړي.
آژانسونه: ش.ن/ ن.ص
د جرمني څخه د مهاجرو د اخراج مقررات څه ډول دي؟
د جرمني داخله وزیر د ۱۶ ایالتونو د کورنیو چارو د وزیرانو سره تریوه ویدیو کنفرانس وروسته اعلان وکړ، چي د جنورۍ له اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي. نور جزيات دلته ولولئ:
انځور: picture-alliance/W. Rothermelد جرمني داخله وزارت وايي، چي د سوریایانو د اخراج د منع کیدو لایحه به تمدید نسي. داخله وزير هورست زېهوفر په دې تړاو مخکي هم څرګندونې کړي وې. خو منتقدین دا د پناه غوښتونکو څخه د ساتني بین المللي حقوقو خلاف بولي. د ویچه ویله دلته د دغي مسألې حقوقي اړخونو ته یوه کتنه کړې ده: هغه مقرره چي د ۲۰۱۲ م کال راهیسي په منظم ډول سره تمدیدیږي، په پام کي لري، چي سوریایان خپل هیواد ته د اخراج څخه وساتي.
په سوريه کي د امنيت نشته والی
په سوریه کي اوس هم جنګ دوام لري. دا په دې معنی ده، چي حتی رد سوي پناه غوښتونکي هم، د مجرمینو په شمول په جرمني کي پاته سي. منتقدین وايي، چي په سوریه کي هیڅ ډول امنیتي شرایط وجود نلري. خو داخله وزیر، هورست زیهوفر د ۱۶ ایالتونو د کورنیو چارو د وزیرانو سره تر یوه ویدیو کنفرانس وروسته اعلان وکړ، چي د جنورۍ میاشتي د اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي.
ولي د اخراجیدو ممانعت لغؤ سو؟
په جرمني کي د هغو پناه غوښتونکي، چي رد سوي، او یا یې جرمونه کړي وي، (دولدونګ) یا د پاته کیدلو مؤقتي ویزه ورکول کیږي. خو ددغو کسانو پرضد همیشه د ښی اړخو افراطیانو لخوا اعتراضونه کیږي او تر ټولو دمخه د مسلمانانو پر ضد. د ۲۰۱۱ م کال راهیسي د سوریې جنګ، چي تر ۳۸۷ زره اضافه انسانان پکښي ووژل او په ملیونو کسان د وطن پریښولو ته مجبوره سول، ددې سبب سو، چي شکمن کسان هم په جرمني کي پاته سي.
د جرمني په داخله وزارت کي د ساختماني او هیواد ساتني چارو معین، هانس ګیورګ انګلکه پرون جمعه خبریالانو ته وویل:«هغه کسان چي جرمونه کوي او یا تروریسټي اهداف مخته وړي، زموږ دولت او خلګو ته تاوان رسوي او باید د جرمني څخه اخراج سي.» خو د زیهوفر د اظهاراتو پراساس د تقریبأ ۷۷۰ زرو سوریایانو څخه چي په دې وروستیو وختونو کي جرمني ته راغلي دي، فقط تقریبأ ۹۰ کسانو ته یې د خطرناکو کسانو په سترګه کتل کیږي.
د اخراج څخه انتظارات محدود دي
د کرونا دویروس په سبب د سفر پر محدودیتونو سربیره، سوریې ته په نورو دلایلو هم اخراج ممکن ندی: د نیدرساکسن ایالت داخله وزیر، بوریس پستوریس په دې باب وویل،«په سوریه کي هیڅ داسي مؤسسه وجود نلري، چي موږ د هغه سره ډیپلوماتیک روابط ولرو.»په دې دلیل هغه او سوسیال دموکراټ حزب یې سوریې ته د نه اخراج د قاعدې لغؤ کیدل رد او کوښښ یې وکړ، چي هغه د ۶ نورو میاشتو دپاره تمدید کړي.
د یوه رپوټ پراساس آلمان په ۲۰۱۹ م کال کي۲۲۰۰۰ تنه اخراج کړي دي. البانیا، نایجریا، ګرجستان، روسیه او صربستان د هغو هیوادو د جملې څخه وه، چي په همدغه کال کي یې هر یوه ته زر زر تنه اخراج سول. په همدغه وخت کي تقریبأ ۹۳۰ افغانان او ۸۶۰ عراقیان هم اخراج سوي دي. د رپوټ پر بنأ په ۲۰۱۹ م کال کي د اخراجیدو تقریبأ ۴۰ فیصده موارده د اروپا د اتحادیې نورو هیوادو لکه فرانسې او ایټالیا ته تر سره سوي دي.
هغه کسان نباید د جرمني څخه اخراج سي، چي په خپلو هیوادونو کي یې د جنګونو، تعقیب او یا ازار په دلیل ژوند ته خطر موجود وي. په دغه صورت کي د هغوی اخراج د اروپا د بشر د حقوقو د کنوانسیون څخه سرغړونه ده. دغه کنوانسیون د هغوکسانو اخراجیدل هم منع کوي، چي په خپلو هیوادونو کي د شکنجې سره مخامخ کیدلای سي.
