المان یو وار بیا له افغانستان سره پرمختیایي مرستې کوي
۱۴۰۲ شهریور ۴, شنبه
د «شپیگل» المانۍ مجلې د یوه رپوټ پر بنسټ المان یو وار بیا له افغانستان سره خپلې مالي مرستې زیاتوي.
انځور: DW/S. Tanha
اعلان
نوموړي مجلې د المان د پرمختیایي چارو وزارت د ویاندې په نقل لیکلي دي چې په تیرو دوو کلونو کې د کله راهیسې نه چې طالبانو په افغانستان کې واک په خپل لاس کې نیولی دی، المان له دغه هیواد سره ۳۷۱ میلیونه یورو پرمختیایي مرستې کړي دي. په لومړیو کې المان له افغانستان سره خپلې پرمختیایي مرستې درولې وې.
دا له هغو مرستو څخه کمې دي چې المان په افغانستان کې د طالبانو له واک ته رسیدو مخکې له دغه هیواد سره کولې. د شپيگل په حواله د المان د پرمختیایي چارو وزارت ویاندې زیاته کړې ده چې یوازې په ۲۰۱۹ م کال کې ۳۶۵،۵ میلیونه یورو له افغانستان سره مرسته شوې ده او «نږدې ټولې دغه پيسې د بنسټیزو خدماتو د جاري ساتلو لکه، د عامو خلکو د اقتصادي پیاوړتیا له پاره، د حکومت له کنترول څخه بهر لگول شوي دي.»
نوموړي وزارت هغه اندیښنې رد کړې چې کیدای شي طالبان له دغو میلیونونو یورو گټه پورته کړې وي: «هیڅ ډول بودیجه د وزارتونو او رسمي ادارو له لارې نه لگول کیږي. دغه اقدامات په اساسي ډول د نړیوالو سازمانونو (ملگري ملتونه، نړیوال بانک) او غیر دولتي سازمانونو له لارې عملي کیږي.»
سربیره پر دې «یوازې هغه اقدامات عملي کیږي په کوم کې چې ښځې ونډه اخلي او له کوم سره چې ښځو او نجونو ته لاسرسی ممکن کیدلی شي.«
آژانسونه: ش.ن/ ن.ص
انځوریز رپوټ: له شاه امان الله څخه تر اوسه د آلمان او افغانستان اړیکي
آلمان او افغانستان ډیر تاریخي اړیکې لري. په دې انځوریز رپوټ کې د شاه امان الله خان څخه نیولې بیا تر اوسه له آلماني چارواکو سره د ملاقات او د دغو هیوادنو تاریخي دوستې نندارې ته وړاندی شوې.
انځور: CC-BY-SA-Bundesarchiv
شاه امان الله په برلين کي
برلین ته د شاه امان الله خان سفر. د دې سفر په ترڅ کې د آلمان د هغه وخت ولسمشر فون هیندنبورگ، په برلین کې شاه امان الله ته هرکلې ووایه. آلمانانو د امان الله خان تود هرکلی وکړ.
انځور: CC-BY-SA-Bundesarchiv
امان الله خان د برلين په تمځای کي
په دغه انځور کې لیدل کیږي چې شاه امان الله خان له خپلي مېرمني، زوم(سردار محمد حسن خان) او یو لوړ رتبه پلاوي سره د برلین لرتر مرکزي تمځای ته رسیږي. د آلمان د هغه وخت ولسمشر هیندنبورگ او نور چارواکي د هغه هرکلي ته ورغلي دي.
انځور: CC-BY-SA-Bundesarchiv
امان الله خان د برلين په تخنيکي پوهنتو کي
په دې ځای کې امان الله خان د آلمان له تخنیکي پوهنتون څخه د خپل افتخاري دوکتورا له ترلاسه کولو وروسته خدای پاماني کوي.
انځور: CC-BY-SA-Bundesarchiv
محمد ظاهر شاه په آلمان کي
د افغانستان پخوانې پادشا محمد ظاهر شاه له خپلې میرمنې ملکه حمیرا سره د آلمان د هغه وخت له ولسمشر هاینریس لوبکه او د هغه له مېرمنې سره د ملاقات پر مهال.
انځور: picture-alliance/dpa
محمد ظاهر شاه په سروبي کي
محمد ظاهر شاه په سروبي کې د برېښنا بند د پرانستې پر مهال. دغه بند د آلماني شرکت زیمنس له خوا جوړ شوی.
انځور: picture-alliance/dpa
د بن کنفرانس
په افغانستان کې د شاهي نظام تر پاشل کیدو وروسته آلمان او افغانستان چندان ښې اړیکې نه درلودې. په افغانستان کې د جگړی د لمن له پراخیدو سره د دغو دواړو هیوادونو اړیکې د نشت سره برابرې شوې. خو په افغانستان کې د طالبانو د رژیم تر رڼگیدو وروسته (۲۰۰۱م کال) د افغانستان له پاره لومړنې برخلیک ټاکونکي کنفرانس د آلمان په بن ښار کې جوړ شوې وو.
انځور: Getty Images
پترزبورگ ماڼۍ
دا ځای پترزبورگ نومیږي چې د آلمان په بن ښار کې موقعیت لري. په آلمان کې د افغانستان په اړه کنفرانسونه په همدې ځای کې جوړ شوې دي.
انځور: Getty Images
فرانسيس وندرل او لخضر براهيمي
د ملگرو ملتونو سازمان د سرمنشي مرستیال فرانسیس وندرل(کیڼ خواته) د بن په کنفرانس کې(۲۰۰۱) د افغانستان له پاره د ملگرو ملتونو ځانگړي استازي لخضر براهیمي سره د خبرو پر مهال.
د وخت په تیریدو سره د آلمان او افغانستان تر منځ خپل منځي اړیکو قوت وموند او د دواړو هیوادونو د چارواکو تر منځ تگ راتگ ډیر شو. په ۲۰۱۱م کال کې یو وار بیا پخوانې ولسمشر حامد کرزي د افغانستان د وضعیت په هکله د آلمان په بن ښار کي کنفرانس رابللی وو.
انځور: dapd
کرزی او انګلا ميرکل په برلين کي
د بن تر دویم کنفرانس وروسته ولسمشر حامد کرزی په ۲۰۱۲م کال کې یو وار بیا آلمان ته راغی او په برلین کې یې د آلمان له صدراعظمې انگلا ميرکل سره ولیدل. دا وار له افغانستان څخه د آلمان د جنگي سرتیرو د وتلو او له دغه هیواد سره د اوږدمهال مرستو موضوع مطرحه وه.
