امريکا ارام سمندر ته د توغنديو دفاعي سيستم ليږي
۱۳۹۲ فروردین ۱۵, پنجشنبه![The Pentagon again postponed a key test of its troubled "THAAD'''' anti-missile defense rocket, seen this file photo, due to a commercial power failure, the Defense Department said. (photo by Lockheed Martin)](https://static.dw.com/image/16190235_800.webp)
په واشنگټن کي د امريکا متحده ايالاتو د دفاع وزارت ويلي دي، چي غواړي په راتلونکې اوونۍ کي د توغنديو يو دفاعي سيستم په گوام جزيره کي ځای پرځای کړي.
د THAAD دفاعي سيستم چي کولای سي په ډيره لوړه ارتفاع کي توغندی خنثی کړي د شمالي کوريا د تهديدونو پر وړاندي «احتیاطي اقدام» دئ.
د توغنديو دغه سیار دفاعي سيستم پر يو لارۍ موټر باندي نصب سوی دئ. په واشنگټن کي د امريکا د دفاع وزارت وياند وويل: «متحده ايالات د شمالي کوريا د پارونکو خبرو پر وړاندي بيداره ده او دې ته اماده ده، چي د خپلو متحدينو له سيمي او زموږ د ملي دلچسپيو دفاع وکړي.»
تر دې دمخه متحده ايالاتو د آرام سمندر لوېديځ ته دوې جنگي جيټ الوتکي چي رادار ئې نسي کشفولای لېږلي وې.
د امريکا د دفاع وزير چاگ هېگل ويلي دي، چي د شمالي کوريا وروستي اقدامات يو «واقعي او روښانه خطر دئ» هغه د شمالي کوريا له خوا په آرام سمندر کي د امريکا متحده ايالاتو د گوام يا هوايی د پوځي اډو تهديد ته اشاره وکړه.
هېگل د واشنگټن په يوه پوځي پوهنتون کي تر وينا وروسته وويل: «هغوی اوس اتومي توان لري، هغوی اوس د توغنديو توغولو توان لري.»
د چهارشنبې په ورځ د جنوبي کوریا چارواکو وویل چې شمالي کوریا د کیاسونگ صنعي پارک ته د جنوبي کوریا کارکوونکي نه دي پرایښي. دغو چارواکو زیاته کړې ده چې که څه هم د جنوبي کوریا کارکوونکي له دې ځایه څخه د وتلو اجازه لري، خو نوي کارکونکي دغه صنعی پارک ته نه شي ننوتلای.
په همدې حال کې د جنوبي کوریا د دفاع وزیر ویلي دي چې که شمالي کوریا له دې صنعتي پارک څخه د جنوبي کوریا د کارکوونکو د وتلو اجازه ورنه کړي او هغوی برمته کړي، نو دغه هیواد به د خپلو وگړو د ساتلو له پاره په پوځي اقداماتو لاس پوري کړي.
خو د پنجشنبې په ورځ شمالی کوريا بيا هم د کياسونگ صنعتي پارک ته د جنوبي کوريا د کارکوونکوي د ورتگ مخه نيولې ده. دغه صنعتي پارک د جنوبي کوريا د سرحد په لس کيلومترۍ کي د شمالي کوريا په سيمه کي موقعت لري.
دغه صنعتي پارک په ۲۰۰۴ کال کي د دواړو هيوادونو د سرحدي همکاريو د پروژې په نوم تاسيس سو.
تر دې دمخه شمالي کوریا له خپل گاونډي هیواد جنوبي کوریا سره خپله یوازینۍ د رسمي اړیکو تلیفوني کرښه هم قطع کړې وه. د شمالي کوریا موضوع هغه وخت بیا شخړه ییزه شوه چې د روان کال په فبرورۍ میاشت کې دې هیواد خپله دریمه اتومي ازموینه ترسره کړه.