د جنوبي کوريا د دفاع وزارت ويلي دي چي په دې پنځه ورځني پوځي تمريناتو کي د امريکا پر «USS Ronald Reagan» او دوو نادبودونکو جنگي کښتيو سربيره ۳۷ نوري جنگي کښتۍ برخه لري.
د امريکا د جنگي کښتيو د «۷ غونډ» په وينا دغه مانورونه بايد «د ايتلاف څرگند او همږه ماموريت» وښيي. دغه مانورونه به د جاپان او ژړ سمندر په لوېديځ ساحل کي جريان ولري. دغه دواړه متحدان معمولاً په اوبو، وچه او هوا کي پوځي تمرينونه کوي.
شمالي کوريا پر امريکا متحدو ايالاتو تور لگوي چي له جنوبي کوريا سره د گډو پوځي مانورونو موخه ئې يرغل ته تياری نيول دي، خو امريکا او جنوبي کوريا دغه تورونه ردوي. په تيرو مياشتو کي په دغه سيمه کي کړکېچ څرگند زيات سوی دئ.
د امريکا متحدو ايالاتو د بهرنيو چارو وزير ريک تيلرسن د يکشنبې په ورځ ټينگار وکړ چي جمهوررئيس دونالد ترمپ د شمالي کوريا د اټومي او توغندويي پروگرام په شخړه کي يو ديپلوماتيک حل غواړي.
هغه له CNN تلويزيون سره په خبرو کي وويل: «دغه ديپلوماتيک تلاښونه به تر هغه وخته پوري دوام ومومي، تر څو لومړی بم نوي استعمال سوی».
ترمپ څو واري د پيونگ يانگ کمونيستي رژيم گواښلی دی. د ملگرو ملتونو امنيت شورا د روان کال په سپتمبر مياشت کي د شمالي کوريا تر شپږمي اټومي ازمويني وروسته پر دغه هیواد بنديزونه نور هم پراخ کړل.
زموږ له ارشيف څخه:
د شمالي کوریا پوځ څومره غښتلی دی؟
نه يوازي دا چي شمالي کوریا اوس په نړۍ کي يو له تر ټولو ستر پوځ لري، بلکي د خپلو وسلو او تجهیزاتو د لا پیاوړتيا او ډېرښت لړۍ يې هم جاري ساتلې ده.
انځور: Reuters/KCNAدغه هیواد ۷۰۰۰۰۰ پوځ او ۴،۵ میلیونه ریزرف پوځ لري چې د اړتیا په صورت کې خدمت ته اماده وي. په دې توګه نو د دغه هیواد نږدې هر ۵ تن پوځي دی.
د وسلو او تجهیزاتو نړیوال شاخص د ۲۰۱۷م کال د رپوټ پر بنسټ، دغه هیواد ۷۶ اوبتلونه، ۵۰۲۵ زیري ټانکونه او ۴۵۸ جنګي الوتکې لري. په دغه انځور کې چې د ۲۰۱۳م کال دی د شمالي کوریا واکمن کم جونګ اون د قوماندې په مرکز کې لیدل کیږي.
شمالي کوریا هرکال په پلازمېنه پيونګ یانګ کې د یوه پوځي پرېډ په ترڅ کې خپلې وسلې او تجهیزات نندارې ته وړاندې کوي. د وسلو دا ډول ننداره د دغه کمونیستي هیواد له تاریخي او ملي ورځو سره مطابقت کوي.
امریکا متحدو ایالاتو د تيري سه شنبې په ورځ د شمالي کوریا له خوا، د بالستيک توغندي د آزموینې بریاليتوب تائید کړ. د امریکا د بهرنیو چارو وزیر ریکس ټیلرسن ویلي دي: دغه آزموینه د شمالي کوریا له خوا امریکا، د هغه متحدینو او نړیوالو ته د ورپیښ احتمالي نوي ګواښ جدیدت ښيي.
پر ډیرو سختو بندیزو سربیره شمالي کوریا خپل د اټومي پروګرام لړۍ جاري ساتلې ده. دغه هیواد په مجموع کې تر اوسه پورې ۵ اټومي آزمویني کړي دي. یوازي په ۲۰۱۶م کال کې یې دوې آزموینې کړي دي. د سویلي کوریا د دفاع وزیر وایي چې په ډیر قوي احتمال به شمالي کوریا ډیر ژر شپږمه آزموینه هم وکړي.
یوازي چين او روسیه تر اوسه پوري د شمالي کوریا متحدین دي. د شمالي کوریا رژیم د «امریکا متحدو ایالاتو امپریالیستي قدرت» خپل اصلي دښمن بولي او جاپان او سویلي کوریا په دویمه درجه کې ځای لري. شمالي کوریا د امریکا او سویلي کوریا د کلني ګډ پوځي مانورونو پر وړاندې په ډیر حساسیت سره غبرګون ښيي.
داسې ښکاري چې د شمالي کوریا له خوا د بالستيک توغندی تر ازموینې وروسته اوس د امریکا حوصله ختمه شوي وي. د شمالي کوریا د توغندو آزموینه د جې ۲۰ په سرمشریزه کې یوه د بحث موضوع وه.
