امريکا جنوبي کوريا ته F-22 الوتکي ولېږلې
۱۳۹۲ فروردین ۱۲, دوشنبه![F-22 Raptor releases a 1 000-pound over the Utah Test and Training Range during weapons evaluation. October 20 2005. (BSLOC_2011_12_219) // eingestellt von se](https://static.dw.com/image/16711880_800.webp)
د رویترز خبري اژانس د راپور له مخي د یکشنبې په ورځ (۲۰۱۳ کال د مارچ ۳۱) جنوبي کوریا ته د F-22 جنگي الوتکو استول پر دې خبري دلالت کوي چې د شمالي کوریا له خوا پر خپل گاونډي هیواد جنوبي کوریا د احتمالي برید په صورت کې امریکا له سیول څخه دفاع کولو ته ژمنه ده.
په جنوبي کوریا کي د امریکا متحده ایالاتو د پوځي مرکز له خوا په خپره شوې خبرپاڼه کې راغلي دي، د F-22 یا هغه جنگي الوتکي چي رادار يې نه شي لیدلای له جاپانه د جنوبي کوریا د «اوسان ايئر بيس» په نامه امریکايي اډې ته لېږل شوي دي.
د خبرپاڼې په حواله دغه الوتکي به د «فول ایگل» په نامه د امریکا او جنوبي کوریا په گډو پوځې تمریناتو کې برخه واخلي.
په جنوبي کوریا کې د امریکا د پوځې ماموریت له خوا په خبر پاڼه کې دا هم راغلي دي چې« شمالي کوریا د هغو گواښونو او پاراونکو بیانيو څخه هیڅ هم نه شې ترلاسه کولای. دا نه یوازي د دې سبب گرځي چې پيونگ یانگ نور هم له انزوا سره مخامخ کړی، بلکي دا به د اسیا په شمال ختیځه سیمه کې د امنیت او ثبات په برخه کې نړیوال کوښښونه هم زیانمن کړي.»
په همدې حال کې د یکشنبې په ورځ چې د ایستر، په نامه د عیسویانو یوه مذهبي ورځ ده د کاتولیکي کلیسا مشر پاپ په خپل پيغام کې د شمالي کوریا او جنوبي کوریا د لانجې پر دپلوماتیک حل ټینگار وکړ.
د کاتولیکي کلیسا روحاني مشر فرانسس د یکشنبې په ورځ د عیسویانو د یوه ځانگړی عبادت پر مهال وویل:«د اسیا او په ځانگړې توگه په کوریا کې د امنیت او ثبات په حق دعا کوم چې اختلافات له منځه ولاړ شې او د خبرواترو د یوې نوې لړۍ روح پرمخ ولاړه شي.»
د پیونگ یانگ اټومې ازموینه، د کړکیچ د زیاتیدو سبب
د شمالي کوریا مشر کم جونگ اُن د روان کال د فبرورۍ په میاشت کې هغه وخت د ملگروملتونو له منشور څخه سرغړونه وکړه، چي د اټومي ازموينې حکم يې ورکړ. دغه ازموينه له ۲۰۰۶ کال راهیسي د پیونگ یانگ دریمه ازموېنه وه.
تر دغي آزمويني وروسته پر شمالي کوریا نور بندیزونه هم ولگول شول. شمالي کوريا د دغو نوو بنديزونو په غبرگون پر جنوبي کوریا او امریکا د يرغل کولو گواښونه پيل کړل. د امریکا او جنوبي کوریا گډ پوځې مانورونه هم د شمالي کوریا له پاره د زغملو وړ نه ول.
د پيونگ یانگ حکومت دوې ورځي دمخه په ډیري سختي لهجې سره وويل، چې له جنوبي کوریا سره د جنگ په حالت کې ده او د دواړو هیوادونو ترمنځ به هرې مسئلې ته د جنگي پروتوکول په اساس کتل کیږي.
د جبوبي کوريا تهديد
د جبوبي کوريا جمهور رئيسې پارک گون هويه، شمالي کوريا پر وړاندي د يوه چټک پوځي غبرگون گواښ کړی دئ. هغې په سئول کي د دفاع وزارت په غونډه کي وويل، چي که جنوبي کوريا او خلگ ئې وگواښل شي نو دوی به هم د گواښ جواب ورکړي.