امريکايي چارواکي وايي چي پر افراطي ډلي «اسلامي دولت» باندي د دوی د بمباريو له پيل راهيسي تر اوسه پوري د دغي ډلي تر لس زره ډېر جنگيالي وژل سوي دي، خو دوی بيا هم پياوړي دي.
انځور: picture-alliance/AP Photo
اعلان
د امريکا متحدو ايالاتو د بهرنيو چارو وزارت مرستيال انتوني بلينکن، په پاريس کي د نړيوال ائتلاف غړو سره تر ليدني وروسته له «فرانس اينتر» راډيو سره په خبرو کي ويلي دي چي په تيرو ۹ مياشتو کي په عراق او سوريه کي د داعش تر لس زره ډېر جنگيالي وژل سوي دي.
بلينکن زياته کړې ده چي داعش دا هم ښوولې ده چي لا پياوړي دي او هروخت نوي يرغلونه پيلوي.
په قطر کي هم د امريکا متحدو ايالاتو ځانگړي استازي جان آلن هم خبرداری ورکړی چي «اسلامي دولت» يوازي د سوريې او عراق له پاره خطر نه دئ، بلکي دغه ډله سيمي او نړۍ ته گواښ بلل کيږي.
د هغه په خبره د ترکيې، سوريې او عراق سرحدونه وروستۍ پولي دي چي دباندي د داعش د فعاليتونو مخه نيول کيدای سي.
د فرانسې خبري آژانس د سوريې د يوه امنيتي چارواکي په حواله په خپل راپور کي ليکي چي په وروستيو اونيو کي نزدې ۷۰۰۰ ايراني او عراقي ځواکونه د دمشق د دفاع له پاره سوريې ته ننوتلي دي.
بله خوا بيا ويل کيږي چي د نړۍ له گوټ کوټ څخه په هغه ډله کي له مرکزي آسيا هيوادونو څخه ډېر شمېر جنگيالي له داعش سره د يو ځای کېدو له پاره دغي سيمي ته ورغلي دي.
د «بحران نړيوالي ډلي» ويلي دي چي له دغي سیمي (مرکزي آسيا) څخه نزدې ۴۰۰۰ کسان له داعش سره يو ځای سوي دي.
د «اسلامي دولت» ډلي مشر ابوبکر بغدادي اوس د نړۍ د امنيتي دستگاوو له خوا تر ټولو «خطرناکه تروريست» بلل کيږي. د آلماني ژورناليستانو يوه ډله توانېدلې ده چي د هغه د ژوند په اړه نوي او تر اوسه نه خپاره سوي اسناد راټول کړي.
انځور: NDR
دا په ۱۹۸۰م کال کي د نړۍ د «ترټولو خطرناکه تروريست» بغدادي لومړی کارت دئ. د په لاس راغلو اسنادو له مخي بغدادي د ۱۹۷۱م کال په جولای مياشتي کي د عراق په سامره ښار کي زېږېدلی دئ او اصلي نوم ئې ابراهیم عواد ابراهيم البدري دئ. د بغدادي د گاونډيانو په خبره د دغي بزگري کورنۍ له څلورو زامنو څخه يو بغدادي وو چي ډېر ارام خلک ول.
انځور: NDR
د ابوبکر بغدادي د تحصيل اسناد. هغه په خپلو درسونو کي په ځانگړې توگه په «اخلاق او انضبات» کي ښې نمرې لرلې. د اسنادو له مخي ښاري چي هغه يوازي د انگلېسي ژبي په مضمون کي لږ نمرې لرې. د دغو اسنادو له مخي هغه د ښوونځي د ۶۰۰ نمرو څخه ۴۸۱ اخيستي دي.
انځور: NDR
دا د ابوبکر بغدادي د عراقي تابعيت پاڼه ده. په دغه وخت کي بغدادي ۱۶ کلن وو او د عراق په سامره ښار کي ئې عادي ژوند کاوه او په خپل اصلي نوم ابراهيم عواد ابراهيم البدري باندي پيژندل کېدی او تحصيل ئې کاوه.
انځور: NDR
ابوبکر بغدادي په ۱۹۹۱م کال کي بريالی او ديپلوم ئې اخيستی دئ. په سندونو کي راغلي دي چي هغه يوار ناکامه سوی دئ، خو وروسته بيا د «شهيد ورور» له امتيازه څخه هغه ته څو نمرې ورکړل سوي دي. د بغدادي ورور د صدام حسين د پوځ عسکرو چي ووژل سو.
انځور: NDR
د ابوبکر بغدادي يو انډيوال وايي چي بغدادي به هروخت علاقه لرله چي مشر وي. بغدادي کوچنيانو ته د قرآن شريف درس ورکاوه. په سامره کي د هغه په پلرنی کور کي له ډيري مودې راهيسي هغه کورنۍ پرتې دي چي له اسلامي دولت ډلي له بيري څخه تښتېدلي دي. د بغدادي د گاونډيانو په خبره د هغه د کورنۍ خلک يا تښتېدلي يا بنديان دي.
انځور: NDR
ابوبکر بغدادي د ديپلوم تر اخيستلو وروسته خپل ټاټوبی پرېښود او بغداد ته تللی وو. بغدادي غوښتل چي حقوق ولولي او د هغه اسنادو له مخي چي موندل سوي دي هغه خپله دوهمه او دريمه رشته ښوونيزعلوم او بهرنۍ ژبي ټاکلي وې. خو د هغه د کمزوري ديپلوم په خاطر بغدادي په پوهنتون کي دغو رشتو ته نه بريالی کيږي.
انځور: NDR
ابوبکر بغدادي د جسمي ستونزو په دليل له عسکرۍ څخه معاف سو. د عراق د روغتيا وزارت په اسنادو کي ښوول کيږي چي بغدادي نزديک بينه دئ.
انځور: NDR
بغدادي په ۲۰۰۳م کال کي د عراق په انبار ولايت کي واده کوي او په دغه وخت کي د قرآن شريف د تفسير سند اخلي او په دې لاره کي خپله دکترا پيلوي.
انځور: NDR
په ۲۰۰۲م کال کي پر عراق باندي د امريکا تر يرغل وروسته د بغدادي يو انځور. بغدادي د ۲۰۰۴م کال په فيبرورۍ مياشت کي نيول گيږي او د عراق په جنوب «بوکا» اردوگاه کي لس مياشتي بندي کيږي. د دغه بند دليل تر اوسه پوري روښانه نه دئ.
انځور: NDR
په بوکا کمپ کي د صدام حسين پر عسکرو سربيره امنيتي مجرمان او تروريستان ساتل کيږي. بغدادي له زندانه تر راوتلو وروسته بيرته پوهنتون ته راگرځي او د بغداد په لوېديځ کي په «توبجي» سیمه کي استوگن کيږي.
انځور: picture alliance/AP Photo
امريکا د داسي اطلاعاتو له پاره چي له مخي ئې بغدادي ونيول سي لس ميليونه ډالره جايزه ټاکلې ده. د گاردن د راپور له مخي، بغدادي دوې مياشتي دمخه د شمزۍ د تاوني کېدو له کبله د عراق په موصل ښار کي دوو ډاکټرانو کتلی معاينه او معالجه کړی وو. داسي ويل کیږي چي هغه د ۲۰۱۵م کال په مارچ کي د امريکايي ځواکونو په يوه هوايي بريد کي سخت ټپي سوی دئ. امریکا دغه بريد تائيد کړی خو د بغدادي په اړه ئې څه نه دي ويلي.